បុគ្គលិកសាលាក្តីខ្មែរក្រហមផ្នែកប្រតិចារិក ចំនួន ៧នាក់ បានប្រកាសជាផ្លូវការ កាលពីថ្ងៃចន្ទ១១ មិនាម្សិលមិញ អំពីការធ្វើពហិការមិនបំពេញការងាររបស់ពួកគេដូចក្រុមបកប្រែដែរ ដើម្បីទាមទារប្រាក់បៀវត្សរ៍។ នេះបើយោងតាមការបញ្ជាក់របស់អ្នកនាំពាក្យសាលាក្តីខ្មែរក្រហម លោក នេត ភក្ត្រា នៅថ្ងៃអង្គារនេះ។ រហូតដល់ពេលនេះ នៅតែគ្មានដំណឹងអំពីការទទួលប្រាក់បៀវត្សរ៍សម្រាប់បុគ្គលិកជាតិឡើយ ខណៈសវនកាថ្មីត្រូវបានគ្រោងបើក នៅថ្ងៃទី២៥ មិនា ខាងមុខនេះ។
ថ្ងៃ អង្គារ 12 មីនា 2013
ដោយ លាង ដឺលុច
RFI
ច្រកចូលទៅកាន់សាលាក្តីខ្មែរក្រហម © ដឺលុច/rfi
បុគ្គលិកផ្នែកប្រតិចារិកនៅសាលាក្តីខ្មែរក្រហម ចំនួន ៧នាក់ បានប្រកាសជាផ្លូវការធ្វើកូដកម្មមិនធ្វើការ នៅថ្ងៃទី១១មិនា ម្សិលមិញ។ នេះបើតាមការអះអាងរបស់អ្នកនាំពាក្យសាលាក្តីខ្មែរក្រហមលោក នេត ភក្ត្រា។ លោក នេត ភក្ត្រា បញ្ជាក់ថា បុគ្គលិកផ្នែកប្រតិចារិកដែលជាអ្នកសរសេរដំណើរការសវនាកានោះ ក៏ទាមទារប្រាក់បៀវត្សរ៍ដែលពួកគេមិនបានទទួល៣ខែមកហើយនោះ ដូចក្រុមអ្នកបកប្រែភាសាដែរ។
ការប្រកាសធ្វើពហិការមិនបំពេញការងាររបស់បុគ្គលិកផ្នែកប្រតិចារិកនេះ ធ្វើអោយចំនួនអ្នកប្រកាសធ្វើកូដកម្មមិនធ្វើការងារទាំងអស់ ឡើងដល់ជាង៣០នាក់ ជាផ្លូវការ។ ប៉ុន្តែ កូដកម្មនេះបានទទួលការគាំទ្រដោយស្ងាត់ស្ងៀម ជារួមពីបុគ្គលិកជាតិទាំងអស់នៅផ្នែកផ្សេងៗទៀតដែរ។
បើតាមការរៀបរាប់របស់អ្នកនាំពាក្យ វិបត្តិថវិកាពេលនេះ គឺជាវិបត្តិដែលមានរយៈពេលយូរជាងពេលមុនៗទាំងអស់ បើគិតចាប់ពីមានដំណើរការសាលាក្តីពិសេសនេះមក។ បុគ្គលិកជាតិទាំងអស់មានចំនួន ២៨៧នាក់។ ប៉ុន្តែមានតែបុគ្គលិកជាតិចំនួន ១៧នាក់ប៉ុណ្ណោះ ដែលធ្វើការនៅក្នុងអង្គភាពជនរងគ្រោះដែលបានទទួលថវិកាឧបត្ថម្ភពីរដ្ឋាភិបាលអាល្លឺម៉ង់ ដែលមិនមានវិបត្តប្រាក់បៀវត្សរ៍។ គឺបុគ្គលិកជាតិ ២៧០នាក់ផ្សេងទៀតឯណេះទេ ដែលកំពុងស្រែកទាមទារប្រាក់បៀវត្សរ៍នោះ។
លោក នេត ភក្ត្រា បានបញ្ជាក់ឡើងវិញថា សាលាក្តីខ្មែរក្រហមនៅតែរង់ចាំថវិការបស់សហភាពអឺរ៉ុបដែលបានសន្យាផ្តល់ជំនួយ ៣សែនដុល្លារ ដល់ភាគីជាតិដើម្បីដោះស្រាយវិបត្តិថវិការនេះ។ ហើយថាចាប់តាំងពីមានការប្រកាសធ្វើកូដកម្មមិនធ្វើការរបស់បុគ្គលិកសាលាក្តីមក ក៏នៅមិនទាន់មានប្រទេសដៃគូអភិវឌ្ឍន៍ណាបានប្រកាសសន្យាផ្តល់ជំនួយមកសាលាក្តីពិសេសនេះដែរ។
ប្រសិនបើនៅមានស្ថានភាពដូចនេះ តើសវនាកាថ្មីដែលគ្រោងបើកនៅថ្ងៃទី២៥ មិនា ខាងមុខនេះ អាចប្រព្រឹត្តិទៅបានដែរឬទេ?
រហូតដល់ពេលនេះ វិបត្តិថវិកាមិនមានភាពប្រសើរឡើយ រីឯសុខភាពរបស់ជនជាប់ចោទ អៀង សារីក៏គ្មានភាពប្រសើរដូចគ្នាដែរ។ សហមេធាវីជាតិ លោក អាង ឧត្តម បានប្រាប់វិទ្យុបារាំងអន្តរជាតិនៅថ្ងៃអង្គារនេះថា លោកបានទៅសួរសុខទុក្ខកូនក្តីរបស់លោកជារៀងរាល់ថ្ងៃ ហើយថា លោកនៅតែសង្កេតឃើញស្ថានភាពសុខភាពកូនក្តីលោកនៅតែធ្ងន់ធ្ងរដដែល។ លោកសហមេធាវី បន្តថា លោកព្រួយបារម្ភអំពីស្ថានភាពជំងឺរបស់លោក អៀង សារី ដែលបានសម្រាកព្យាបាលនៅមន្ទីរពេទ្យ៩ថ្ងៃមកហើយនោះ៕
—————————————-
