នៅឯខេត្តរតនគិរី អ្នកភូមិជនជាតិដើមភាគតិច អះអាងថា ក្រុមហ៊ុនសម្បទានសេដ្ឋកិច្ចវៀតណាម មួយជំទាស់មិនឲ្យក្រុមការងារ និងនិស្សិតស្ម័គ្រចិត្តរបស់រាជរដ្ឋាភិបាលវាស់វែងដីចម្ការចាស់របស់អ្នកភូមិ ដែលបានគ្រប់គ្រងដាំដុះជាចម្ការវិលជុំតាមប្រពៃណីជនជាតិដើមនោះទេ។
ដោយ រដ្ឋា វិសាល
2013-03-26
RFA
ស្ដាប់ ឬ ទាញយកសំឡេង
អ្នកភូមិជនជាតិដើមភាគតិចចារ៉ាយ ៥គ្រួសារ រស់នៅភូមិមុយ ឃុំញ៉ាង ស្រុកអណ្ដូងមាស ខេត្តរតនគិរី កំពុងស្វែងរកកិច្ចគាំពារពីមន្ត្រីការពារសិទ្ធិមនុស្ស ជួយអន្តរាគមន៍សុំឲ្យក្រុមការងារ និងនិស្សិតស្ម័គ្រចិត្តរបស់រាជរដ្ឋាភិបាល វាស់វែងដីចម្ការចាស់ពួកគាត់កាត់ចេញពីដីសម្បទានសេដ្ឋកិច្ច ស្របតាមគោលនយោបាយចាស់សកម្មភាពថ្មីរបស់រាជរដ្ឋាភិបាល។
ប្រជាពលរដ្ឋរស់នៅភូមិមុយ លោក រចំ ប្យូន មានប្រសាសន៍បញ្ជាក់ថា ប្រពៃណីជនជាតិដើមភាគតិច គឺមានចម្ការចាស់សម្រាប់ដាំដុះវិលជុំ កាលណាដីនោះអស់ជីវជាតិ ដូច្នេះដីចម្ការចាស់ គឺជាដីដែលអ្នកភូមិបានគ្រប់គ្រង ហេតុនេះក្រុមហ៊ុនមិនត្រូវរារាំងការវាស់វែងចេញប័ណ្ណកម្មសិទ្ធិដល់អ្នកភូមិឡើយ៖ «បើក្រុមហ៊ុនថាឲ្យវាស់កន្លែងណាមួយ និស្សិតវាស់ឲ្យ បើក្រុមហ៊ុនថាអត់ឲ្យវាស់ និស្សិតអត់ហ៊ានវាស់ទេ។ ដឹងស្រាប់ហើយ ជនជាតិភាគតិចគេហៅចម្ការវិលជុំ។ អភិបាលស្រុកទៅ ហើយគេថាខុសហើយ ខុសស្អីចម្ការចាស់គេជាប់គ្នាហ្នឹង»។
កាលពីថ្ងៃច័ន្ទ ទី២៥ ខែមីនា អ្នកភូមិទាំង ៥គ្រួសារ បានមកដល់ស្នាក់ការសមាគមការពារសិទ្ធិមនុស្សអាដហុក (Adhoc) ខេត្តរតនគិរី ដើម្បីដាក់ពាក្យបណ្ដឹង និងបានចាត់ទុកករណីនេះជាការរំលោភសិទ្ធិដីធ្លីជនជាតិដើមភាគតិច។
ទាក់ទងករណីនេះ តំណាងក្រុមហ៊ុន ហុង អាញ់ (Hong An) លោក ថាច់ គៀន មានប្រសាសន៍បញ្ជាក់ថា ក្រុមហ៊ុនធ្វើតាមគោលការណ៍របស់រាជរដ្ឋាភិបាល ហើយមិនបានហាមឃាត់ក្រុមការងារវាស់វែងនោះទេ។ លោកបន្តថា ក្រុមហ៊ុនមិនមានអំណាចរារាំងក្រុមការងារនោះឡើយ៖ «យើងធ្វើតាមគោលការណ៍ ខ្លាចតែពួកគាត់ទារអ្វីផ្សេងទៀតខ្ពស់ជាងហ្នឹង ហើយក្រុមការងារវាស់មិនបាន ឬនិស្សិតវាស់មិនបាន។ អ៊ីចឹងទៅ ទម្លាក់លើក្រុមហ៊ុន»។
មេឃុំញ៉ាង លោក រចំ សឿន មានប្រសាសន៍ថា ដីចម្ការចាស់របស់អ្នកភូមិគួរត្រូវបានវាស់វែងជូនអ្នកភូមិ។ លោកបន្តថា ក្នុងនាមអាជ្ញាធរ លោកនឹងជួបពិភាក្សាជាមួយក្រុមហ៊ុន ដើម្បីសម្របសម្រួលបញ្ហានេះ៖ «ខ្ញុំថាទៅដោះឲ្យ កុំវាស់ព្រៃឈើធំៗ ព្រៃបុសរបស់គាត់វាស់ជូនទៅ។ ក្រុមហ៊ុនឯណាចរចាជាមួយប្រជាពលរដ្ឋជូនប្រជាពលរដ្ឋ»។
ផ្ទុយពីការលើកឡើងនេះ អភិបាលស្រុកអណ្ដូងមាស លោក នង ដារិទ្ធ មានប្រសាសន៍បញ្ជាក់ថា គោលនយោបាយចាស់សកម្មភាពថ្មី គឺតម្រូវឲ្យវាស់វែងតែដីដែលប្រជាពលរដ្ឋបានដាំដុះគ្រប់គ្រងជាក់ស្តែង ស្ថិតក្នុងបរិវេណដីក្រុមហ៊ុនសម្បទានសេដ្ឋកិច្ច ក៏ប៉ុន្តែដីចម្ការចាស់របស់អ្នកភូមិបានតវ៉ានេះ គឺជាដីអ្នកភូមិបោះបង់ចោលច្រើនឆ្នាំហើយ៖ «ពីណាហ៊ាន បើដើមឈើដុះធំៗឡើងវិញអស់ហើយ។ អាហ្នឹងមិនដឹងធ្វើម៉េចអនុវត្តន៍តាមបទបញ្ជាសារាចរហ្នឹងហើយ គេឲ្យតែដីអាស្រ័យផល។ បើគាត់បោះចោលមួយឆ្នាំពីរបីឆ្នាំទៅ យើងចេះតែសម្របសម្រួល តែនេះ ៨ឆ្នាំជាងហើយ»។
មន្ត្រីជាន់ខ្ពស់ផ្នែកអង្កេតគម្រោងដីធ្លីសមាគមអាដហុក លោក ប៉ែន បុណ្ណារ៍ កត់សម្គាល់ថា ប្រពៃណីជនជាតិដើមភាគ គឺមានចម្ការវិលជុំ ហេតុនេះរាជរដ្ឋាភិបាលគួរពិនិត្យឡើងវិញពីគោលនយោបាយចេញកម្មសិទ្ធិដីជូនពលរដ្ឋ ជាពិសេសជនជាតិដើមភាគតិចមានដីចម្ការវិលជុំនេះ៖ «ចម្ការវិលជុំ គឺជាសិទ្ធិរបស់ពួកគាត់ ដូច្នេះរាល់ចម្ការដែលពួកគាត់ធ្លាប់បានកាប់រាន ហើយផ្លាស់ប្ដូរវេន គឺជាចម្ការរបស់គាត់ ព្រោះជាតំបន់ពិសេសមួយសម្រាប់ជនជាតិដើមភាគតិច»។
ចំពោះបញ្ហានេះ អ្នកភូមិ ៥គ្រួសារ អះអាងថា ក្រុមហ៊ុនមានចេតនាពង្រីកដីសម្បទានមកលើដីចម្ការចាស់របស់ពួកគាត់ ហេតុនេះពួកគាត់នឹងបន្តធ្វើការតវ៉ារកយុត្តិធម៌ក្នុងបញ្ហានេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
ក្រុមនិស្សិតស្ម័គ្រចិត្ដសម្ដេចតេជោអើយ….កុំយកឈ្មោះ
សម្ដេចពាំងទ្រូង…ហើយគិតថាទៅដល់ទីណាគេទទួល
ស្វាគមន៍ដូចដែលខ្លួននឹកឃើញអោយសោះ….ឩទាហរណ៍
ជារឿយៗយើងឃើញ មានថ្នាក់មន្ត្រីធំៗទទួលរាក់ទាក់ មាន
រៀបពិធីជប់លាងអោយ….ខ្ញំមិនជឿថាអស់លោកទាំងនោះ
ធ្វើដោយសុទ្ធចិត្ដទេ។ បើថាធ្វើដើម្បីមុខមាត់គឺមាន..ធ្វើ
ដើម្បីសម្ដែងការលត់ក្រាប អែបអប ពួកគេចំពោះសម្ដេចតេជោ
នោះខ្ញំជឿខ្លះ ។ សម្រាប់ពួកយួនវាមិនខ្វល់ទេ ។ចង់ឱសម្ដេច
ទឿតក៍វាមិនឈឺក្បាលហាលថ្ងៃដែរ។ តែទោះយ៉ាងណាអស់
លោក ក៍បានជួយរាស្រ្តក្រីក្រ បាន១ចំណែកដែរ ទោះក្នុងន័យ
ទាញប្រជាប្រិយភាពរបស់សម្ដេចក៍ដោយ។