ភ្នំពេញៈ រាជរដ្ឋាភិបាលប្រទេសជប៉ុន នឹងចុះហត្ថលេខាផ្តល់ជំនួយឥតសំណងថ្មីដល់វិស័យថាមពល សុខាភិបាល និងអប់រំ នៅប្រទេសកម្ពុជា ដែលមានទឹកប្រាក់សរុប ចំនួនបីពាន់មួយរយម្ភៃបីលានយ៉េន (3,123,000,000 Yen) ប្រហាក់ប្រហែលនឹង ៣៤ លានដុល្លារអាមេរិក។
Thursday, 28 March 2013
លាង ផាន់ណារ៉ា
ភ្នំពេញ ប៉ុស្តិ៍
ពិធីចុះហត្ថលេខាផ្តល់ជំនួយខ្នាតតូចរបស់ជប៉ុន កាលពីម្សិលមិញ ។ រូបថតហេង ជីវ័ន
ពិធីចុះហត្ថលេខានេះ ត្រូវបានធ្វើឡើងនៅថ្ងៃព្រហស្បតិ៍នេះ ទី២៨ មីនានេះ នៅក្រសួងសេដ្ឋកិច្ចនិងហិរញ្ញវត្ថុ ដោយលោក គាត ឈុន ឧបនាយករដ្ឋមន្រ្តី និងជារដ្ឋមន្រ្តី ក្រសួងសេដ្ឋកិច្ច និងហិរញ្ញវត្ថុ និងលោក Izaki Hiroshi ប្រធានតំណាងការិយាល័យ JICA កម្ពុជា។
យោងតាមសេចក្តីប្រកាសព័ត៌មានបានឲ្យដឹងថា កិច្ចព្រមព្រៀងជំនួយឥតសំណងចំនួនបី រួមមាន៖
គម្រោងសាងសង់ និងស្តារឡើងវិញនូវវារីអគ្គិសនីខ្នាតតូចក្នុងខេត្តរតនគីរី ដែលមានទឹកប្រាក់ចំនួន មួយពាន់ពីររយប្រាំមួយលានយ៉េន (1,206,000,000 Yen) ប្រមាណជា ១៣.១ លានដុល្លារអាមេរិក ។ គម្រោងនេះនឹងធ្វើឲ្យប្រសើរឡើងនូវសេវាសាធារណៈរបស់អគ្គិសនីខេត្តសម្រាប់ប្រជាជនជាង ៨០.០០០នាក់ ដែលរស់នៅក្នុងទីក្រុងបានលុង និងស្រុកជិតៗនោះដែលមានចំនួនប្រជាជនស្មើរនឹងជាងពាក់កណ្តាលនៃចំនួនប្រជាជនសរុបរបស់ខេត្តរតនគីរី។
សកម្មភាពរបស់គម្រោងនេះបូករួមទាំងការសាងសង់វារីអគ្គិសនីខ្នាតតូចទំនប់អូរជុំ១ ការជួសជុលសំណង់នានាដែលមានស្រាប់រួមទាំងសំណង់ស្ទាក់ទឹក និងប្រឡាយនៅទំនប់អូរជុំ១ ការសាងសង់បណ្តាញចែកចាយអគ្គិសនីចាប់ពីរោងចក្រវារីអគ្គិសនីទំនប់អូរជុំ១ថ្មី ការផ្លាស់ប្តូរោងចក្រដែលមានស្រាប់រួមទាំងម៉ាស៊ីនភ្លើងនៅទំនប់អូរជុំ២ ការជួសជុលផ្លូវរដ្ឋបាលនៅតំបន់ទំនប់អូរជុំ២ ស្ថានីយអគ្គិសនីនិងជំនួយបច្ចេកទេសសម្រាប់ប្រតិបត្តិការសកម្មភាពទាំងនេះ។
គម្រោងកែលំអមន្ទីរពេទ្យបង្អែកខេត្តព្រះសីហនុ ដែលមានទឹកប្រាក់ចំនួន មួយពាន់បីរយម្ភៃមួយលានយ៉េន (1,321,000,000 Yen) ប្រមាណជា ១៤.៣៥លានដុល្លារអាមេរិក ។ គម្រោងនេះនឹងធ្វើឲ្យប្រសើរទ្បើងនូវសេវាថែទាំវេជ្ជសាស្រ្ត និងប្រព័ន្ធមន្ទីរពេទ្យបង្អែកតាមរយៈការសាងសង់អគារថ្មីចំនួន៥ រួមមានអគារសង្រ្គោះបន្ទាន់ អគារវះកាត់ អគាររដ្ឋបាល អគារព្យាបាលជំងឺកុមារ ។ល។
គម្រោងសាងសង់អគារមជ្ឈមណ្ឌលស្រាវជ្រាវវិទ្យាសាស្រ្ត និងបំពាក់បរិក្ខារមន្ទីរពិសោធន៍នៅវិទ្យាស្ថានបច្ចេកវិទ្យាកម្ពុជា ក្នុងទឹកប្រាក់ចំនួន ប្រាំរយកៅសិបប្រាំមួយលានយ៉េន (596,000,000 Yen) ប្រហាក់ប្រហែលនឹង ៦.៤៧ លានដុល្លារអាមេរិក ។ គម្រោងនេះនឹងសាងសង់អគារពិសោធន៍និងបំពាក់សំភារៈពិសោធន៍នៅវិទ្យាស្ថានបច្ចេកវិទ្យាកម្ពុជា ដើម្បីរៀបចំបើកថ្នាក់បរិញ្ញាប័ត្រជាន់ខ្ពស់នៅគ្រប់ដេប៉ាតឺម៉ង់ទាំងអស់ក្នុងឆ្នាំសិក្សា ២០១៤-២០១៥ និងគម្រោងបើកថ្នាក់បណ្ឌិតវិស្វកម្មនៅតាមដេប៉ាតឺម៉ង់ជំនាញមួយចំនួនក្នុងឆ្នាំសិក្សា ២០១៥-២០១៦។
គម្រោងនេះរួមជាមួយគម្រោងសហប្រតិបត្តិការបច្ចេកទេសរបស់ជប៉ុនដែលកំពុងអនុវត្តសព្វថ្ងៃនេះនៅវិទ្យាស្ថានបច្ចេកវិទ្យាកម្ពុជា ក៏រំពឹងផងដែរថានឹងទទួលបានលទ្ធផលកាន់តែប្រសើរឡើង។
សូមបញ្ជាក់ថា ជប៉ុនគឺជាប្រទេសមួយក្នុងចំណោមប្រទេសផ្តល់ជំនួយឥតសំណងធំៗទាំងអស់នៅកម្ពុជា ដែលមានទឹកប្រាក់សរុបចំនួន ២.២៣លានកោដិដុល្លារអាមេរិក គិតចាប់តាំងពីឆ្នាំ១៩៩២មក ហើយចំនួនទឹកប្រាក់ជំនួយប្រចាំឆ្នាំសម្រាប់ឆ្នាំថ្មីៗនេះមានចំនួនជាង ១២០លានដុល្លារអាមេរិក។