លោក ហោ ណាំហុង រដ្ឋមន្ត្រីក្រសួការបរទេស និងសហប្រតិបត្តិការអន្តរជាតិ បានថ្លែងអះអាង នាព្រឹកថ្ងៃទី០២ ខែមេសានេះថា វិស័យទេសចរណ៍កម្ពុជាអាចនឹងមានភ្ញៀវទេសចរកើនឡើងប្រមាណជាង ៧លាននាក់ នៅឆ្នាំ២០១៥ ខាងមុខនេះ ហើយបើធៀបនិង ឆ្នាំ២០១២ វិស័យទេសចរណ៍កម្ពុជាមានការកើនឡើង តែជាង៣លាន់នាក់ប៉ុណ្ណោះ ។
វ.គីម
Wednesday 03 April 2013
The Free Press Magazine
លោក កុយ គួង អ្នកនាំពាក្យក្រសួងការបរទេសកម្ពុជា បានថ្លែងប្រាប់ក្រុមអ្នកសារព័ត៌មាន ក្រោយពីបញ្ចប់កិច្ចពិភាក្សារវាងលោកឧបនាយករដ្ឋមន្ត្រី ហោ ណាំហុងនិងជាមួយលោក A.V.Radkov ប្រធានគណៈ កម្មការអន្តរ រដ្ឋាភិបាល កម្ពុជា-រុស្ស៊ី និងជាប្រធាន ទីភ្នាក់ងារ ទេសចរណ៍នៃ សហព័ន្ធរុស្ស៊ី ក្នុងសម័យ ប្រជុំលើកទី៧ របស់គណៈ កម្មការ អន្តររដ្ឋាភិបាល កម្ពុជា-រុស្ស៊ី កាលពីព្រឹក ថ្ងៃទី០២ ខែមេសា ឆ្នាំ២០១៣ នាក្រសួងការ បរទេស ។
លោក កុយ គួង បានលើកឡើងពីការថ្លែងរបស់លោកឧបនាយករដ្ឋមន្រ្តី ហោ ណាំហុង ទៀតថា ប្រជាពលរដ្ឋកម្ពុជាមិនបានភ្លេចជំនួយរបស់រុស្ស៊ី ដែលផ្តល់មកឲ្យកម្ពុជានាពេលកន្លងមក នោះទេ ។ លោកឧបនាយករដ្ឋមន្ត្រី បានសង្កត់ធ្ងន់លើវិស័យ១០សំខាន់ៗ ដើម្បីឲ្យរុស្ស៊ី ជួយបន្តទៀត ក្នុងនោះមាន វិស័យទេសចរណ៍ ពាណិជ្ជកម្ម សេដ្ឋកិច្ច វិទ្យាសាស្ត្របច្ចេកទេស វិនិយោគ វប្បធម៌ អប់រំ ថាមពល សំណង់ ជាពិសេសរុស្ស៊ីក៏បានផ្តល់វគ្គបណ្តុះបណ្តាលផ្នែក យោធាដល់កម្ពុជាផងដែរ ដើម្បីធ្វើយ៉ាងណាឲ្យកម្ពុជាបានសម្រេចគោលដៅសហសវត្ស ។
អ្នកនាំពាក្យរូបនេះ ក៏បានបញ្ជាក់ពីអនុសាសន៍របស់លោកឧបនាយករដ្ឋមន្ត្រីទៀតថា «ចំពោះ វិស័យសំខាន់ៗមួយចំនួនខាងលើ ក្នុងនោះក៏មានវិស័យកសិ-ឧស្សាហកម្ម ព្រោះកន្លងមក ផលិតផលស្រូវរបស់យើងមានការកើនឡើងជារៀងរាល់ឆ្នាំ ពី៣ ទៅ៤លានតោន ចំពោះស្រូវ សម្រាប់នាំចេញ ប៉ុន្តែអ្វីដែលសំខាន់គឺយើងនៅខ្វះម៉ាស៊ីនកិនស្រូវនៅឡើយ»។
លោក A.V.Radkov ក៏បានឯកភាពទាំងស្រុងនូវអ្វីដែលជាអនុសាសន៍របស់ លោកឧប នាយករដ្ឋមន្ត្រី ហោ ណាំហុង បានលើកឡើងនោះ ហើយជាពិសេសជាងនេះទៀតនោះ កម្ពុជា-រុស្ស៊ី បានឯកភាពគ្នាទៅវិញទៅមក គឺធ្វើយ៉ាងណាពង្រឹងពង្រីក និងជម្រុញផ្នែក សេដ្ឋកិច្ច វិនិយោគ ពាណិជ្ជកម្ម ទេសចរណ៍ នយោបាយ និងការទូតមានលក្ខណៈខ្លាំង ក៏ប៉ុន្តែ ទំហំពាណិជ្ជរវាងប្រទេសទាំងពីរ នៅមានលក្ខណៈខ្សត់ខ្សោយ និងមិនទាន់បានធំធេងនៅ ឡើយទេ ដូច្នេះតម្រូវឲ្យមានកិច្ចពិភាក្សាគ្នាបន្ថែមទៀត ក្នុងការរិះរកដំណោះស្រាយនាពេល ខាងមុខ ដើម្បីធ្វើយ៉ាងឲ្យប្រទេសទាំងពីរមានការអភិវឌ្ឍន៍យ៉ាងឆាប់រហ័សផងដែរ៕