ភ្នំពេញៈ សហព្រះរាជអាជ្ញានៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានបញ្ចប់ការស៊ើបអង្កេតរបស់ខ្លួន និងបានធ្វើរបាយការណ៍ស្តីពីការស្រាវជ្រាវ ដើម្បីស្វែងរកអំពីមូលហេតុនៃមរណភាពរបស់លោក អៀង សារី។
Wednesday, 03 April 2013
លាង ផាន់ណារ៉ា
ភ្នំពេញ ប៉ុស្តិ៍
ពិធីបុណ្យសព លោក អៀង សារី នៅស្រុកម៉ាឡៃ ខេត្តបន្ទាយមានជ័យកាលពីខែមុន។ រូបថតហេង ជីវ័ន
យោងតាមសេចក្តីប្រកាសព័ត៌មានដែលភ្នំពេញប៉ុស្តិ៍ទទួលបាន បានឲ្យដឹងថា សហព្រះរាជអាជ្ញាបានធ្វើសេចក្តីសន្និដ្ឋានថា មរណភាពរបស់លោក អៀង សារី គឺដោយសារមូលហេតុ ធម្មជាតិ។
សេចក្តីសន្និដ្ឋានចុងក្រោយស្តីពីមូលហេតុមរណភាពលោក អៀង សារី គឺបានបញ្ជាក់ថា គាត់ស្លាប់ដោយសារមូលហេតុធម្មជាតិ នាម៉ោង ៨:៤៥ នាទីព្រឹក នៅថ្ងៃទី១៤ ខែមីនា ឆ្នាំ២០១៣ ដែលបណ្តាលមកពីជំងឺស្ទះសរសៃឈាមបេះដូង ដែលមិនអាចធ្វើឲ្យប្រសើរឡើងវិញបាន និងបណ្តាលមកពីការស្ពៀតសរសៃឈាមចិញ្ចឹមបេះដូងដែលមានជាយូរមកហើយ តាំងពីមុនការចាប់ខ្លួន និងការជាប់ឃុំឃាំងនៅ អ.វ.ត.ក មកម្ល៉េះ។
ការរកឃើញនេះត្រូវបានបញ្ជាក់អះអាងដោយ របាយការណ៍វេជ្ជសាស្ត្រចុងក្រោយ និងលិខិតបញ្ជាក់មរណភាពដែលបានចេញក្រុមគ្រូពេទ្យព្យាបាលលោក អៀង សារី, បណ្តាឯកសារនានាដែលជាប្រវត្តិវេជ្ជសាស្ត្រជាយូរមកហើយ, និងចម្លើយរបស់ក្រុមគ្រូពេទ្យ និងកូនស្រីលោក អៀង សារី ដែលជាគ្រូពេទ្យ និងដែលមានវត្តមាននៅពេលមរណភាព។
ដោយសារមានភ័ស្តុតាងច្បាស់លាស់ និងភាពស៊ីចង្វាក់គ្នាចំពោះមូលហេតុនៃមរណភាពនេះ ការវះកាត់សាកសពលោក អៀង សារី និងការធ្វើពិសោធន៍រកជាតិពុលក្នុងឈាម គឺពុំចាំបាច់។ នេះបើយោងតាមសេចក្តីបញ្ជាក់ពីសេចក្តីប្រកាសព័ត៌មានរបស់ អ.វ.ត.ក ដែលដកស្រង់ចេញពីរបាយការណ៍សន្និដ្ឋាន។
បើតាមសេចក្តីប្រកាសព័ត៌មាន របាយការណ៍ពេញលេញស្តីពីមរណភាពនេះត្រូវបញ្ជូនទៅលោក ប្រធានការិយាល័យរដ្ឋបាលស្តីទី និងលោក អនុប្រធានការិយាល័យរដ្ឋបាលរួចហើយនៅថ្ងៃម្សិលមិញ និងបានចាត់ថ្នាក់ជា ឯកសារសម្ងាត់បំផុត ហើយមិនអាចបង្ហាញជាសាធារណៈបានឡើយ ដោយអនុលោមតាមវិធាន ៣២ ស្ទួននៃវិធានផ្ទៃក្នុងសម្រាប់ អ.វ.ត.ក។