ខេត្តបន្ទាយមានជ័យ: ភ្ញៀវក្នុងស្រុករាប់រយពាន់នាក់ ចាប់ផ្តើមទៅលេងទឹក នៅរមណីយដ្ឋានពាក់កណ្តាលធម្មជាតិ និងកែច្នៃ នៅអាងត្រពាំងថ្ម ស្ថិតក្នុងឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ចាប់តាំងពីថ្ងៃទី១៣មេសា ឆ្នាំ២០១៣ ក្នុងឱកាសបុណ្យចូលឆ្នាំថ្មី ប្រព្រៃណីជាតិខ្មែរ ឆ្នាំម្សាញ់នេះ។
ថ្ងៃទី 15 មេសា 2013
ដោយ: សូផុន
CEN
ពលរដ្ឋ ជាអ្នកលក់ដូរនៅទីនោះ បានប្រាប់គេហទំព័រ CEN កាលពីថ្ងៃទី១៣-១៤ ខែមេសា ឆ្នាំ២០១៣ ថា ពួកគាត់បានរៀបចំកន្លែងលក់អាហារភេសជ្ជៈ ពោះវៀនកង់ឡាន ទូក និងកាណូតជិះកំសាន្ត ព្រមទាំងរោងរានអង្គុយកំសាន្តស្រេចបាច់ហើយ នៅតំបន់អាងត្រពាំងថ្ម សម្រាប់ទទួលភ្ញៀវកំសាន្ត។ រាល់ឆ្នាំ ក្នុងថ្ងៃបុណ្យភ្ជុំបិណ្ឌ និងថ្ងៃបុណ្យឆ្នាំខ្មែរ និងចូលឆ្នាំចិន មានភ្ញៀវក្នុងស្រុក ប្រហែលជា ១៥.០០០ នាក់ ទៅ ៣០.០០០ នាក់ ក្នុង ១ថ្ងៃៗ ទៅលេងនៅអាងទឹកត្រពាំងថ្ម។
ពលរដ្ឋដែលជាអាជីវករបន្តថា ពួកគាត់សង្ឃឹមថា ឆ្នាំថ្មី ឆ្នាំម្សាញ់នេះ ជាពេលដែលអាកាសធាតុក្តៅខ្លាំងផង រមណីយដ្ឋានលេងទឹកដ៏ធំជាងគេបង្អស់នៅខេត្តបន្ទាយមានជ័យ ក្នុងអាងកេរិ៍្តខ្មែរក្រហមនេះ នឹងមានភ្ញៀវពពាក់ពួនច្រើន មកលេង ហើយគេសង់រោងសម្រាកកំសាន្ត រាប់សិប។ ឯពោះវៀនកង់ឡានរាប់រយ និងកន្លែងលក់ដូររាប់សិប បានត្រៀមលក្ខណៈ។
ប៉ុន្តែតម្លៃឡើងខ្ពស់ ឬយ៉ាងណានៅ ១ថ្ងៃ ដំបូងនៃបុណ្យចូលឆ្នាំនេះ ពុំទាន់ឃើញមាន ឡើងថ្លៃទេ។ នៅទីនោះ គេឃើញមានម្ហូបធ្វើពីត្រីធំៗ ពស់ព្រលិត កណ្តុរអាំង មាន់ទា និងសាច់ច្រើនទៀត។
ឆ្នាំនេះ ផ្លូវភ្ជាប់ទៅអាងត្រពាំងថ្ម ខ្សែចេញពីផ្លូវជាតិលេខ ៦ ត្រង់ភូមិព្រៃមាន់ កាត់ទីរួមស្រុក ទៅអាងគឺ ១កំណាត់ជាផ្លូវកៅស៊ូ ទើបស្ថាបនា តែស្ពានលូខ្លះ កំពុងសាងសង់។
ដើម្បីទៅលេងអាងទឹកដ៏ធំជាងគេ នៅភូមិភាគពាយ័ព្យ និងឧត្តរនៃប្រទេសនេះគឺមានផ្លូវក្រាលគ្រួសច្រើនខ្សែ ដូចជា ផ្លូវចេញពីផ្លូវជាតិលេខ ៦ ត្រង់ទីរួមស្រុកព្រះនេត្រព្រះកាត់ឃុំពន្លៃ រួចធ្វើដំណើរតាមខ្នងអាង។ ផ្លូវចេញពីផ្លូវលេខ ៦ កាត់តាមភូមិព្រៃមាន់ ឃុំរហាល ស្រុកព្រះនេត្រព្រះ ផ្លូវចេញពីផ្លូវជាតិលេខ៦ កាត់តាមឃុំទឹកជោរ ស្រុកព្រះនេត្រព្រះ, ឃុំស្ពានស្រង, ឃុំភ្នំដី ឃុំស្រះជីក, ឃុំប៉ោយចារ ស្រុកភ្នំស្រុក។
ក្នុងនោះ ក៏មានផ្លូវជាច្រើនខ្សែភ្ជាប់ពីស្រុកស្វាយចេក, ថ្មពួកខេត្តបន្ទាយមានជ័យ និងពីស្រុកចុងកាល់ បន្ទាយអម្ពិល ខេត្តឧត្តរមានជ័យ និងពីស្រុកស្រីស្នំ, ស្រុកក្រឡាញ់ខេត្តសៀមរាប ក៏ភ្ជាប់ទៅអាងត្រពាំងថ្មដែរ។ នៅទីនោះ ភ្ញៀវអាចងូតទឹក ជិះទូក, មើលត្រី, មើលសត្វស្លាបទឹក និងសត្វស្លាបគោក និងទេសភាពស្រែចម្ការរដូវប្រាំង៕
រូបថត៖ ទិដ្ឋភាពនៅអាងទឹកត្រពាំងថ្ម នៅខេត្តបន្ទាយមានជ័យ៖
