សៀមរាប: ក្រុមមន្ដ្រីទេសចរណ៍ខេត្ដសៀមរាប បាននិយាយឱ្យដឹងថា យ៉ាងហោចណាស់ក៏មានភ្ញៀវទេសចរប្រមាណជា ៥ ពាន់ ៣ រយនាក់ មកពីតំបន់គ្រប់ទិសទី នៃព្រះរាជាណាចក្រកម្ពុជា និងមកពីក្រៅប្រទេសបានឡើងទៅទស្សនារមណីយដ្ឋានប្រវត្ដិសាស្ដ្រភ្នំគូលែន ក្នុងរយៈពេល៣ថ្ងៃ នាឱកាសបុណ្យចូលឆ្នាំថ្មីប្រពៃណីជាតិថ្មីៗកន្លងទៅនេះ។
ថ្ងៃទី 21 មេសា 2013
ដោយ: បាយ័ន
CEN
លោកឆើយ ឆន អនុប្រធានមន្ទីរទេសចរណ៍ខេត្ដសៀមរាប បាននិយាយឱ្យដឹងថា រយៈពេល៣ថ្ងៃក្នុងឱកាសបុណ្យចូលឆ្នាំប្រពៃណីជាតិខ្មែរពីថ្ងៃទី១៤ ដល់ថ្ងៃទី១៦ ខែមេសាកន្លងមកនេះ គឺមានភ្ញៀវទេសចរសរុបចំនួន៥ពាន់៣រយនាក់។ ក្នុងនោះភ្ញៀវទេសចរបរទេសមានចំនួន ២៥០ នាក់បានឡើងទៅទស្សនាតំបន់ទឹកធ្លាក់ភ្នំគូលែន។
លោកឆើយ ឆន បានឱ្យដឹងទៀតថា កត្ដាដែលនាំឱ្យរមណីយដ្ឋានទឹកធ្លាក់ភ្នំគូលែនស្ថិតនៅស្រុកស្វាយលើ ខេត្ដសៀម រាប ស្រូបទាញភ្ញៀវទេសចរយ៉ាងដូច្នេះ មានកត្ដាទីសំខាន់ គឺទី១.ទីនោះមានទឹកធ្លាក់ដ៏សំខាន់ និងទី២.គឺមានព្រះអង្គធំមួយព្រះអង្គដែលកសាងពីសម័យមុនបានបន្សល់ទុករហូតមកដល់បច្នុប្បន្ន ដែលព្រះអង្គចូលនិពាន្វមួយព្រះអង្គនេះត្រូវប្រជាពលរដ្ឋគ្រប់រូបមានជំនឿជឿជាក់យ៉ាងខ្លាំង។
លោកឆើយ ឆន បានឱ្យដឹងទៀតថា កត្ដាខាងលើវាគួបផ្សំ និងមានផ្លូវឡើងចុះបានស្រួល ដែលបង្កលក្ខណៈឱ្យភ្ញៀវទេសចរជាតិ និងអន្ដរជាតិ មានភាពងាយស្រួល ហើយធ្វើឱ្យបរិយាកាសបរិសុទ្ធនៃតំបន់ភ្នំ និងកាត់បន្ថយបាននៅភាពនឿយហត់គ្រប់បែបយ៉ាងជូនដល់ភ្ញៀវទាំងនោះទាំងទៀតផង។ ប៉ុន្ដែអ្វីដែលសំខាន់ចំណីចំណុក ការហូបចុកគ្រប់ប្រភេទដែលអាជីវករ លក់ដូរសំរាប់ភ្ញៀវទេសចរ គឺវាមានតំលៃខ្ពស់គួរឱ្យកត់សំគាល់មួយ ដែលមិនខុសពីរមណីយដ្ឋានានាក្នុងខេត្ដសៀមរាប ដែលឡើងខ្ពស់ដូចគ្នា បើប្រៀបធៀបទៅនឹងថ្ងៃធម្មតា។ ការឡើងថ្លៃកប់ពពកលើចំណីចំណុកត្រូវបានភ្ញៀវទេសចររិះគន់ដល់អាជ្ញាធរដែនដីស្រុក-ខេត្ដថា មានភាពកម្សោយក្នុងការគ្រប់គ្រងដែលករណីនេះ វាធ្វើឱ្យភ្ញៀវទេសចរមានភាពរាងចាល មានន័យថាភ្ញៀវទេសចរទៅលេងម្ដង គឺគេឈប់ទៅរហូត។
រមណីយដ្ឋានភ្នំគូលែន ត្រូវបានគេសិក្សាឃើញកាលពីថ្មីៗថា មានប្រាសាទយ៉ាងតិចជាង ៤០ ត្រូវបានរកឃើញតាមរយៈការថតពីផ្កាយរណប និងមានប្រាសាទជិត ១០ បានបណ្ដែតខ្លួននៅតាមតំបន់ព្រៃនៃរមណីយដ្ឋានភ្នំគូលែន។ រមណីយដ្ឋានភ្នំគូលែនជាទីក្រុងបុរាណចំណាស់មួយកើតមានមុនសម័យអង្គរ។
នៅពេលថ្មីៗកន្លងទៅនេះ អាជ្ញាធរអប្សរាក្រោមការដឹកនាំពីទីស្ដីការគណៈរដ្ឋមន្ដ្រី បានចុះសិក្សានៅតំបន់រមណីយដ្ឋាន ភ្នំគូលែន ដើម្បីត្រៀមដាក់បញ្ជូនទៅក្នុងបញ្ជីបេតិកភណ្ឌពិភពលោក។ អនាគតដ៏ខ្លីកម្ពុជា និងមានភ័ព្វវាសនាពិតប្រាកដមួយថា រមណីយដ្ឋានភ្នំគូលែន អង្គការបេតិកភណ្ឌពិភពលោកបានវាយតំលៃ ហើយចុះបញ្ជីជាបេតិកភណ្ឌពិភពលោកសំរាប់មនុស្សជាតិ ទូទៅជាក់ជាពុំខាន។
យោងតាមទស្សនាវដ្ដីស្រាវជ្រាវរបស់មន្ទីរវប្បធម៌ និងវិចិត្រសិល្បៈខេត្ដសៀមរាប បានចេញឆ្នាំទី១ លើកទី២ បានឱ្យដឹងថា ភ្នំគូលែនស្ថិតនៅប៉ែកខាងជើង ឆៀងខាងកើតទីរួមខេត្ដសៀមរាប និងមានចំងាយ ៥៣ គីឡូម៉ែត្រពីទីរួមខេត្ដសៀមរាប។ ភ្នំនេះមានរយៈកំពស់ ៤៩២ ម៉ែត្រ គេអាចឡើងទៅលើភ្នំបានយ៉ាងងាយស្រួល តាមរយៈរថយន្ដ ឬក៏ថ្មើរជើងក៏បាន។ ទៅដល់ជើង ភ្នំគេសង្កេតឃើញមានផ្ទាំងថ្មធំៗហាក់់ដូចបីជាជញ្ជាំង នៃនាវាដ៏ធំមួយដែលចតនៅកណ្ដាលទីស្មសាន រំលេចដោយសម្រស់ស្រស់ត្រកាល និងបង្កប់នូវអាថ៌កំបាំងដ៏សន្ធឹកសន្ធាប់នាអតីតកាលសម័យអង្គរ ដែលជារមណីយដ្ឋានមួយក្នុងចំណោមរមណីយដ្ឋានជាច្រើននៅខេត្ដសៀមរាប។
ជួរភ្នំគូលែនចែកជា២ ដោយខាងកើត និងខាងត្បូងហៅថាភ្នំគូលែន និងប៉ែកខាងជើង ទៅខាងលិចហៅថាភ្នំហប់។ បច្នុប្បន្នដោយប្រទេសជាតិទទួលបាននូវសន្ដិភាព ស្ថេរភាព នយោបាយល្អធ្វើឱ្យរមណីយដ្ឋានភ្នំគូលែនមួយនេះបានស្វាគមន៍ភ្ញៀវជាតិ និងអន្ដរជាតិ យ៉ាងច្រើនជារៀងរាល់ថ្ងៃ និងមានប្រជាពលរដ្ឋមកពីគ្រប់ទិសទី មកតាំងទីលំនៅប្រកបអាជីវកម្ម កសិកម្ម យ៉ាងច្រើនកុះករ។ ភ្នំគូលែនមានរមណីយដ្ឋានធម្មជាតិ និងប្រវត្ដិសាស្ដ្រជាច្រើនដូចជា ទឹកធ្លាក់ , ព្រះអង្គធំ , ស្រះដំរី , វាលស្ដេចគម្លង់ , វាលព្រះសព , វាលព្រះក្រាល , សំពៅធ្លាយ។ល។
ទឹកធ្លាក់ជាប្រភពទាក់ទាញជាងគេ ព្រោះវាជាប្រភពដើមរបស់ស្ទឹងសៀមរាប ហូរកាត់កណ្ដាលទីរួមខេត្ដចាក់ឆ្ពោះទៅ បឹងទន្លេសាប មានទឹកថ្លាយ៉ង់ជាទីនិយមរបស់អ្នកដំណើរកំសាន្ដ ក្នុងការមុជទឹកជ្រោះធ្លាក់សំយ៉ុងទៅប៉ះនិងថ្មដាបែកផ្កាត្រែង។ នៅក្បែរទឹកជ្រោះធ្លាក់មានប្រាសាទ ២ ធ្វើពីថ្មបាយក្រៀម សង់អមសងខាងមាត់អូរ ដែលគេឱ្យឈ្មោះថា ក្រោលមាស។ ប៉ុន្ដែនៅប៉ែកខាងលិចត្រូវដួលរលំ និងបាត់ថ្មអស់មួយចំនួនធំនៅសល់តែខឿនជញ្ជាំងបន្ដិចបន្ដួចតែប៉ុណ្ណោះ៕
