Monday, 13 May 2013
សេត គឹមសឿន
ភ្នំពេញ ប៉ុស្តិ៍
អ្នកស្រី អង្គ ឃីម (ស្លៀកពាក់ហូលអាវប៉ាក់) និងសមាជិកក្រុម Cartoon Emo ទាំង៥រូប។ រូបថត សេត គឹមសឿន
ភ្នំពេញៈ ក្រុមតារាចម្រៀងបែបរ៉ុក ដំបូងគេ ដែលអាចឈរជើងល្បីមធ្យមនៅលើទីផ្សារកម្ពុជារហូតមកទល់នឹងពេលនេះ គឺក្រុម Cartoon Emo ហាក់មានទឹកមាត់លេបកាន់តែខ្លាំងនៅពេលដែលក្រុមតារាចម្រៀងបែបរ៉ុកមួយក្រុមនេះបានទទួលដុំប្រាក់មួយកញ្ចប់ធំពីនារីអាណិកជនខ្មែររស់នៅសហរដ្ឋអាមេរិកម្នាក់ដើម្បីផ្តល់ឱកាសឲ្យក្រុមតារាចម្រៀងវ័យក្មេងមួយនេះមានលទ្ធភាពបើកផលិតកម្មដោយខ្លួនឯងផ្ទាល់ដោយដាក់ឈ្មោះថា KD Extreme Entertainment ។
ក្រុម Cartoon Emo ដែលទើបផ្តាច់ចេញពីផលិតកម្មស្វាងតារា ត្រូវបានគេមើលឃើញថា ជាក្រុមតារាចម្រៀងបែបរ៉ុកដំបូងគេដែលអាចមានលទ្ធភាពឈរជើងបានគ្រាន់បើនៅក្នុងទីផ្សារសិល្បៈកម្ពុជា ខណៈពេលដែលបទចម្រៀងបែបរ៉ុកមួយនេះប្រជាជនខ្មែរភាគច្រើនមិនទាន់មានការពេញនិយមស្តាប់នៅឡើយនោះ ដោយសារតែបទច្រៀងនេះភាគច្រើនមានការបញ្ចូលភ្លេងច្រើនប្រភេទរួមគ្នារញ៉េរញ៉ៃ និងមានភ្លេងញាក់កន្ត្រាក់ហួសហេតុនោះ។ ប៉ុន្តែទោះយ៉ាងណា គេសង្កេតឃើញថា ក្រុមតារាចម្រៀង Cartoon Emo ហាក់ទទួលបានការគាំទ្រច្រើន ខណៈក្រុមតារាចម្រៀងប្រភេទនេះជាច្រើនបានបរាជ័យ និងបំបែកក្រុមជាហូរហែកាលពីពេលកន្លងមកនោះ។
ជាញឹកញយក្រុមតារាចម្រៀងនេះបានទទួលការងារច្រៀងនៅក្នុងកម្មវិធីការប្រគំតន្ត្រីតាមខេត្តនានាជាច្រើនផងដែរ ហើយដោយសារស្នាដៃនេះហើយ ទើបក្រុមតារាចម្រៀងមួយនេះមានឱកាសបានចេញទៅសម្តែងនៅសហរដ្ឋអាមេរិកជាលើកដំបូងកាលពីឆ្នាំ២០១២កន្លងទៅ។ ជាមួយនឹងទេពកោសល្យនៃការសម្តែងច្រៀងនេះហើយ ទើបអ្នករស់នៅសហរដ្ឋអាមេរិកចាប់អារម្មណ៍ និងមានបំណងជួយជំរុញឲ្យក្រុមតារាចម្រៀងវ័យក្មេងមួយក្រុមនេះមានកេរ្តិ៍ឈ្មោះបន្ថែម។ ជាក់ស្តែងក្រោយពីបានសិក្សាពីស្នាដៃក្រុមតារាចម្រៀងនេះហើយ ទើបអ្នកស្រី អង្គ ឃីម ដែលជាអាណិកជនខ្មែររស់នៅលើទឹកដីអាមេរិក បានចំណាយពេលវេលា និងប្រាក់កាសជាច្រើនសន្ធឹកសន្ធាប់ផ្ទាល់ខ្លួនបើកផលិតកម្មមួយឈ្មោះ KD Extreme Entertainment កាលពីថ្ងៃទី៨ ខែមេសា ឆ្នាំ២០១៣ ដើម្បីផ្តល់ជាជម្រកដ៏កក់ក្តៅសម្រាប់ក្រុមតារាចម្រៀងរ៉ុកខ្មែរមួយនេះអាចមានលទ្ធភាពពង្រឹងខ្លួនកាន់តែខ្លាំងឡើងបន្ថែមទៀត។
អ្នកស្រី អង្គ ឃីម អគ្គនាយកផលិតកម្ម KD Extreme Entertainment បាននិយាយថា៖«ខ្ញុំចេះតែមានអារម្មណ៍ឆ្ងល់ថា បងប្អូនខ្មែរយើងក៏មានសមត្ថភាពដែរ តែហេតុអ្វីមិនអាចធ្វើបានដូចប្រទេសគេ ដូច្នេះខ្ញុំគិតថា ខ្ញុំនឹងសម្រេចចិត្តជួយក្រុម Cartoon Emo ដើម្បីឲ្យពួកគេមានឱកាសកាន់តែច្រើននៅក្នុងការបញ្ចេញស្នាដៃសិល្បៈ របស់ពួកគេ ខ្ញុំសង្ឃឹមថា ពួកគេនឹងទទួលបានភាពជោគជ័យជាក់ជាមិនខាន។
ជាមួយគ្នានោះ លោក សាន់ សុវណ្ណឌីន ដែលជានាយករងផលិតកម្ម KD Extreme Entertainment និងជាប្រធានក្រុម Cartoon Emo បានឲ្យដឹងថា អ្នកស្រី អង្គ ឃីម គឺជាអាណិកជនខ្មែររស់នៅសហរដ្ឋអាមេរិក ហើយអ្នកស្រីក៏ជាអ្នកធានាក្រុមតារាចម្រៀងកម្ពុជាទៅសម្តែងច្រៀងនៅសហរដ្ឋអាមេរិកផងដែរហើយការណ៍ដែលអ្នកស្រីសម្រេចជួយក្រុមរបស់លោកក៏ព្រោះតែអ្នកស្រីស្រឡាញ់សិល្បៈជាតិ ដែលនោះក៏ស្របគ្នានឹងការងារអ្នកស្រី អង្គ ឃីម នៅសហរដ្ឋអាមេរិកជាអ្នករៀបចំកម្មវិធីកម្សាន្តនានា ជាអ្នកថតស្ប៉ត និងកម្មវិធីនានា។
ជាមួយជម្រកដ៏កក់ក្តៅ និងឯករាជ្យទោះបីជាពលរដ្ឋខ្មែរមិនទាន់មានការគាំទ្របទចម្រៀងបែបរ៉ុកច្រើនក្តីតែលោក សុវណ្ណឌីន បានបញ្ជាក់ថា៖«យើងដឹងពីទំនោររបស់បងប្អូនខ្មែរ តែខ្ញុំជឿជាក់ ថាក្រុមរបស់ខ្ញុំនឹងទទួលបានជោគជ័យ ហើយពួកគាត់នឹងគាំទ្រពួកខ្ញុំនៅពេលខាងមុខមិនខាន»៕