ភ្នំពេញ: តារាសម្តែងស្រអែមស្រស់ សារ៉ាយ សក្កណា កន្លងមកបានចេញសេចក្តីប្រកាសពីការលាលែងតំណែងជាតារាសម្តែង បន្ទាប់ពីនាងត្រូវចូលរោងជ័យជាមួយអនាគតស្វាមីឆ្លងទ្វីបរបស់នាងដែលសល់តែប៉ុន្មានខែខាងមុខនេះប៉ុណ្ណោះ។
ថ្ងៃទី 17 ឧសភា 2013
ដោយ: ពិទូរ្យ
CEN
សក្កណា ដែលបានបោះបង់ទឹកប្រាក់ក្រាស់ក្រែលរបស់នាង ក៏ព្រោះតែស្នេហាផ្អែមល្ហែមឆ្លងទ្វីប។ តែអ្នកបង្ហាញម៉ូដរូបនេះ រវល់ស្ទើរតែគ្មានលស់ថ្ងៃ បើទោះបីជារដូវនេះ មិនចំរដូវមង្គលការក្តី។ហាងឆេងច្រៀងតាមរោងការនៅតែបន្តជារៀងរាល់ថ្ងៃ។
អ្នកស្រីសម្ភស្ស ម្តាយរបស់តារាក្រមិចក្រមើម បានឲ្យស៊ីអ៊ីអិន ដឹងតាមទូរស័ព្ទថា “សព្វថ្ងៃនេះ មិនសូវជារវល់ណាស់ណាទេចំពោះការថតខ្សែររឿង ព្រោះបានផ្អាកថតហើយ តែការសម្តែងឈុតឆាកខារ៉ាអូខេ និងច្រៀងតាមមង្គលការ នៅតែមានជារៀងរាល់ថ្ងៃហ្នឹង សក្កណាគ្រាន់តែផ្អាកថតរឿងប៉ុណ្ណោះ តែច្រៀងនៅតែភ្នំពេញនេះទេ”។
តាមការគ្រោងទុក តារាស្រីញញឹមស្រស់ សារ៉ាយ សក្កណានឹងចូលរោងជ័យនៅថ្ងៃទី ១២ ខែធ្នូ ២០១៣ ខាងមុខនេះហើយ។
ទាក់ទងទៅនឹងការសុំសិទ្ធិទៅនៅស្របច្បាប់តាមស្វាមីនោះ អ្នកស្រីសម្ភស្ស បានបន្តថា “សក្កណា នឹងចូលទូតសម្ភាសន៍សុំវីសាខែក្រោយនេះហើយ បើសិនជាទទួលបានទិដ្ឋការ បន្ទាប់ពីរៀបការហើយពួកគេនឹងទៅអាមេរិកជាមួយគ្នាតែម្តង ព្រោះខាងអនាគតកូនប្រសាសុំច្បាប់មកលេងស្រុកខ្មែរ បានតែមួយខែប៉ុណ្ណោះ”៕ S