Tuesday, 04 June 2013
ម៉ៃ ទិត្យថារ៉ា
ភ្នំពេញ ប៉ុស្តិ៍
ទីតាំងផលិតប្រេងវល្លិរមៀត នៅក្នុងអាងស្តុកទឹក ទំនប់វារីអគ្គិសនីស្ទឹងអាតៃ ។ រូបថត សហការី
ភ្នំពេញៈ ក្រសួងកសិកម្មរុក្ខាប្រមាញ់និងនេសាទបានសម្រេចអនុញ្ញាតឲ្យក្រុមហ៊ុន អឹម ឌី អេស អាហ័រណ នីហរ័ណ របស់លោកឧកញ៉ា ទ្រី ភាព ទីប្រឹក្សាលោកនាយករដ្ឋមន្ត្រីប្រមូល និងកែច្នៃវល្លិរមៀតនៅក្នុងអាងស្តុកទឹកវារីអគ្គិសនីស្ទឹងអាតៃ ស្ថិតនៅក្នុងជួរភ្នំក្រវាញភាគកណ្តាលស្រុកវាលវែងខេត្តពោធិ៍សាត់និងអនុញ្ញាតឲ្យបង្កើតរោងកែច្នៃវល្លិរមៀតដែលមិនប៉ះពាល់មជ្ឈដ្ឋានព្រៃឈើនិងបរិស្ថាន ខណៈដែលក្រសួងមហាផ្ទៃបានធ្វើការហាមកាលពីឆ្នាំ២០០៥ ដោយសារជាសារធាតុផ្សំអាចផលិតជាគ្រឿងញៀន។ នេះបើយោងទៅតាមឯកសារដែលភ្នំពេញ ប៉ុស្តិ៍ទទួលបានកាលពីថ្ងៃម្សិលមិញ។
យោងតាមលិខិតដែលបានចុះហត្ថលេខាដោយលោក ឡោ រស្មី អគ្គលេខាធិការក្រសួងកសិកម្ម រុក្ខាប្រមាញ់និងនេសាទនៅថ្ងៃទី១ ខែមីនា ឆ្នាំ២០១៣ បានជម្រាបជូនប្រតិភូរាជរដ្ឋាភិបាលទទួលបន្ទុកប្រធានរដ្ឋបាលព្រៃឈើថា យោងតាមចំណារលោករដ្ឋមន្ត្រី ក្រសួងកសិកម្មរុក្ខាប្រមាញ់និងនេសាទចុះថ្ងៃទី០១ ខែមីនាឆ្នាំ២០១៣លោកជម្រាបជូនលោកប្រតិភូរាជរដ្ឋាភិបាលទទួលបន្ទុកប្រធានរដ្ឋបាលព្រៃឈើជ្រាបថា ចំពោះសំណើសុំគោលការណ៍អនុញ្ញាតប្រមូល និងកែចៃ្នវល្លិរមៀតនៅក្នុងអាងស្តុកទឹកវារីអគ្គិសនីស្ទឹងអាតៃរបស់ក្រុមហ៊ុន អឹម ឌី អេសយោងតាមលិខិតដែលបានចុះហត្ថលេខាដោយលោក ឡោ រស្មី អគ្គលេខាធិការក្រសួងកសិកម្ម រុក្ខាប្រមាញ់និងនេសាទ នៅថ្ងៃទី១ ខែមីនា ឆ្នាំ ២០១៣ បានជម្រាបជូនប្រតិភូរាជរដ្ឋាភិបាលទទួលបន្ទុកប្រធានរដ្ឋបាល ព្រៃឈើថា យោងតាមចំណារលោករដ្ឋមន្ត្រី ក្រសួងកសិកម្មនិងនេសាទចុះថ្ងៃទី០១ ខែមីនា ឆ្នាំ ២០១៣ ចំពោះសំណើសុំគោលការណ៍អនុញ្ញាតប្រមូល និងកែចៃ្នវល្លិរមៀត នៅក្នុងអាងស្តុកទឹកវារីអគ្គិសនីស្ទឹងអាតៃរបស់ក្រុមហ៊ុនអឹម ឌី អេស អាហ័រណនីហរ័ណនោះក្រសួងកសិកម្មរុក្ខាប្រមាញ់ និងនេសាទ បានសម្រេចឯកភាពមតិរដ្ឋបាលព្រៃឈើ។
នៅក្នុងលិខិតដដែលនោះបានសរសេរទៀតថា៖ «អនុញ្ញាតឲ្យក្រុមហ៊ុនអឹម ឌី អេស អាហ័រណនីហរ័ណប្រមូល និងកែច្នៃវល្លិរមៀត និងអនុញ្ញាតឲ្យបង្កើតរោងកែច្នៃវល្លិរមៀត នៅក្នុងអាងស្តុកទឹកវារីអគ្គិសនីស្ទឹងអាតៃដែលមិនប៉ះពាល់មជ្ឈដ្ឋានព្រៃឈើនិងបរិស្ថានដើម្បីបង់ថ្លៃសួយសារនិងបុព្វលាភចូលថិវការដ្ឋ»។
ឡោ រស្មី អគ្គលេខាធិការក្រសួងកសិកម្មរុក្ខាប្រមាញ់ និងនេសាទដែលចុះហត្ថលេខាលើលិខិតនោះបដិសេធពុំធ្វើការអត្ថាធិប្បាយបានទេកាលពីថ្ងៃម្សិលមិញដោយលោកមានប្រសាសន៍ថា៖ «ខ្ញុំជាប់រវល់ប្រជុំ»។ រីឯលោក ឆេង គឹមស៊ុន ប្រតិភូរាជរដ្ឋាភិបាលទទួលបន្ទុកប្រធានរដ្ឋបាលព្រៃឈើពុំអាចទាក់ទងដើម្បីធ្វើការអត្ថាធិប្បាយបានទេ។
តំណាងក្រុមហ៊ុនអឹម ឌី អេស អាហរ័ណ នីហរ័ណ ប្រចាំនៅ ខេត្តពោធិ៍សាត់ដែលបដិសេធ មិនបញ្ចេញឈ្មោះបានឲ្យដឹងថាការប្រមូលទិញអនុផលព្រៃឈើនោះពុំមានអ្វីជាបញ្ហាចោទនោះទេព្រោះវាខុសពីសារធាតុគ្រឿងញៀន។ លោកបានថ្លែងឲ្យដឹងថា៖«យើងមិនផលិតសារធាតុញៀននោះទេបើយើងល្មើសច្បាប់ក្រសួងមិនចេញអាជ្ញាប័ណ្ណឲ្យនោះទេ»។
យោងទៅតាមច្បាប់ព្រៃឈើនៅក្នុង ជំពូកទី៨ ស្តីពីការហាមឃាត់ការប្រមូលផល អនុផលព្រៃឈើនិងការពារព្រៃឈើនៅក្នុងមាត្រាទី ៣២ ចំណុចទី ៥ បានចែងថា បង្កើតមូលដ្ឋានកែច្នៃវល្លិរមៀតឬអនុផលព្រៃឈើផ្សេងទៀតដែលនាំមកនូវការបំពុលឬបំផ្លាញមជ្ឈដ្ឋានព្រៃឈើ។ រីឯជំពូកទី ១៥ ស្តីពីបទល្មើសព្រៃឈើនិងទោសប្បញ្ញត្តិ នៅក្នុងមាត្រាទី ៩៧ បានចែងថាត្រូវផ្តន្ទាទោសក្រោមបទល្មើសព្រៃឈើថ្នាក់ទី ១ ដែលត្រូវជាប់ពន្ធនាគារពីប្រាំឆ្នាំទៅដប់ឆ្នាំ នឹងត្រូវរឹបអូសវត្ថុតាងទាំងអស់មកជាសម្បត្តិរដ្ឋដកហូតកិច្ចព្រមព្រៀងអាជ្ញាប័ណ្ណ លិខិតអនុញ្ញាត និងកម្ទេចចោលវត្ថុតាងក្លែងចំពោះជនណាដែលបានប្រព្រឹត្តបទល្មើសណាមួយដូចជាបង្កើតមូលដ្ឋានកែច្នៃវល្លិរមៀតឬមូលដ្ឋានសិប្បកម្មអនុផលព្រៃឈើផ្សេងទៀតដែលនាំមកនូវការបំផ្លាញព្រៃឈើនិងមជ្ឈដ្ឋានព្រៃឈើ។ ជនណាប្រព្រឹត្តបទល្មើសថ្នាក់ទី ១ មិនរាងចាលត្រូវផ្តន្ទាទោសទ្វេដងនៃបទល្មើសថ្នាក់ទី ១ នៃច្បាប់នេះ។
យោងទៅតាមលិខិតរបស់ក្រសួងមហាផ្ទៃកាលពីថ្ងៃទី៦ ខែតុលាឆ្នាំ ២០០៥ បានស្នើសុំឲ្យ អគ្គលេខាធិការក្រសួងកសិកម្ម រុក្ខាប្រមាញ់ និងនេសាទ ផ្តល់ដំបូន្មានទៅប្រធានរដ្ឋបាលព្រៃឈើ សុំបញ្ឈប់ការផលិតប្រេងម្រះព្រៅ និងវល្លិរមៀតពីព្រោះ ប្រេងម្រះព្រៅនិងវល្លិរមៀតគឺជាធាតុផ្សំផលិតគ្រឿងញៀនពេលដែលលាយជាមួយនឹងអាស៊ីត។
លោក ឈឹម សាវុធ មន្ត្រីស៊ើបអង្កេតជាន់ខ្ពស់របស់មជ្ឈមណ្ឌលសិទ្ធិមនុស្សកម្ពុជាដែលធ្វើការស្រាវជ្រាវបទល្មើសព្រៃឈើនៅជួរភ្នំក្រវាញភាគកណ្តាលបានថ្លែងឲ្យដឹងថា យោងលើច្បាប់ព្រៃឈើឆ្នាំ២០០២ គឺហាមឃាត់ដាច់ខាតមិនឲ្យមានការបង្កើតរោងចក្រផលិតម្សៅ វល្លិរមៀតនោះទេ។
លោកបានឲ្យដឹងទៀតថា៖«ចំពោះលិខិតអនុញ្ញាតដែលទើបតែចេញឲ្យលោក ឧកញ៉ាទ្រី ភាព ប្រមូលទិញនិងកែច្នៃរល្លិ៍រមៀត ព្រមទាំងអនុញ្ញាតឲ្យបង្កើតរោងកែច្នៃវល្លិរមៀតនោះគឺល្មើសទៅនឹងច្បាប់ទាំងស្រុង ហើយប្រេងម្រះព្រៅនិងវល្លិរមៀតនេះគឺអាចនាំចេញទៅផ្សំជាសារធាតុគ្រឿងញៀនដូច្នេះវាប៉ះពាល់ធ្ងន់ធ្ងរសម្រាប់មនុស្ស»។
លោកបានថ្លែងឲ្យដឹងទៀតថា វល្លិរមៀតដែលក្រុមហ៊ុនប្រមូលទិញពីពលរដ្ឋនោះគឺតម្លៃត្រឹមតែ ៣០០រៀលទៅ៥០០រៀលហើយការប្រមូលទិញវល្លិរមៀតនោះគឺចាប់តាំងពីឆ្នាំ ១៩៩៣ រហូតមកដល់បច្ចុប្បន្នជាពិសេសនៅក្នុងស្រុកវាលវែងនិងស្រុកថ្មបាំង ខេត្តពោធិ៍សាត់ ដែលមានទីតាំងរោងកែច្នៃវល្លិរមៀតចំនួនពីរកន្លែងដែលទីតាំងទី ១ ស្ថិតនៅក្នុងឃុំ អូរសោម ត្រង់ចំណុចស្ទឹងត្រចាន់ និងទីតាំងទីពីរស្ថិតនៅក្នុងឃុំប្រមោច ស្រុកវាលវែងនៅត្រង់ភូមិផ្ចឹកជ្រុំ ភូមិឈើទាលជ្រុំជាប់និងក្រុមហ៊ុនតែម្តង។
លោកបានឲ្យដឹងទៀតថា៖ «គោលដៅរបស់ លោកឧកញ៉ា ទី្រ ភាពគឺដាំដំណាំកៅស៊ូ ម្រេច តែសកម្មភាពដែលគាត់ធ្វើគឺដើរទិញឈើប្រណីតគ្រប់កន្លែងដើម្បីនាំចេញទៅវិញ យើងមិនដឹងថា គាត់មានទំនាក់ទំនងជាមួយមន្ត្រីថ្នាក់ណានៅក្នុង ជួររដ្ឋាភិបាលទេ ដែលគាត់ធ្វើអ៊ីចឹងបាន»។
លោកបានថ្លែងឲ្យដឹងទៀតថាតំបន់ស្ថិតនៅក្រោមរដ្ឋបាលព្រៃឈើនិងអង្គការស៊ីអាយ ហើយក៏មានច្បាប់ព្រៃឈើតែកន្លងមកមន្ត្រីមួយចំនួនដែលបានរួមគ្នាបំផ្លាញព្រៃឈើនិងធនធានធម្មជាតិគឺពុំដែលទទួលទោសទណ្ឌនោះទេ។
លោកបានថ្លែងឲ្យដឹងទៀតថា៖ «ធនធានធម្មជាតិនៅប្រទេសកម្ពុជានឹងរលាយឆាប់ៗក្នុងពេលខាងមុខនេះហើយបញ្ហាដែលនឹងជួបប្រទះនៅពេលអនាគតនោះគឺប្រជាពលរដ្ឋខ្លួនឯងទេ ពីព្រោះឈ្មួញរកស៊ីល្មើសច្បាប់គេនឹងរួចខ្លួនពីសំណាញ់ច្បាប់ហើយនឹងក្លាយខ្លួនទៅជាមហាសេដ្ឋី»។
លោកបានថ្លែងឲ្យដឹងទៀតថា លោកឧកញ៉ាទ្រី ភាព មិនត្រឹមតែមានសិទ្ធិប្រមូលនិងកែច្នៃវល្លិរមៀត នៅក្នុងអាងស្តុកទឹកវារីអគ្គិសនីស្ទឹងអាតៃប៉ុណ្ណោះទេ ថែមទាំងមានសិទ្ធិប្រមូលទិញឈើពីក្រុមហ៊ុនសម្បទានសេដ្ឋកិច្ចនៅក្នុងខេត្តរតនគិរីផ្តាច់មុខ ប្រមូលទិញឈើប្រណីតនៅក្នុងស្រុករវៀងនិងស្រុកជ័យសែននៅក្នុងខេត្ត ព្រះវិហារទៀតផង និងមានដីសម្បទានសេដ្ឋកិច្ចនៅក្នុងជម្រកសត្វព្រៃបឹងពែរ នៅខេត្តព្រះវិហារ និង នៅដែនជម្រកសត្វព្រៃភ្នំសំកុស ខេត្តពោធិ៍សាត់៕