ថ្ងៃទី 5 មិថុនា 2013
ដោយ: ម្លិះ
CEN
ភ្នំពេញ: បន្ទាប់ពីបានរសាត់ឃ្លាតឆ្ងាយពីសិល្បៈមួយរយៈធំ តារាចម្រៀង កញ្ញា គង់ ច័ន្ទសូរិយា បានប្រកាសថា នាងនឹងចូលប្រឡូក សារជាថ្មី ក្នុងវិស័យសិល្បៈ ដោយទឹកចិត្តស្រឡាញ់ ចូលចិត្តការងារនេះ ជាមួយនឹងការត្រៀមបើកឆាក ចេញទៅសម្តែងនៅ លើទឹកដីប្រទេសកាណាដា។
ស្របពេលដែលកេរ្តិ៍ឈ្មោះរបស់តារាចម្រៀង កញ្ញា គង់ ច័ន្ទសូរិយា កំពុងតែងើបឡើងវិញជាសន្សឹមៗ នៅក្នុងវិស័យសិល្បៈនេះ ក៏ស្រាប់តែមានព័ត៌មានថា កញ្ញា គង់ ច័ន្ទសូរិយា ពេលនេះកំពុងតែត្រៀមខ្លួន ដើម្បីចាកចេញទៅសម្តែង និងច្រៀងនៅលើទឹកដីប្រទេសកាណាដា នាពេលដ៏ខ្លី ខាងមុខនេះ តបតាមការអញ្ជើញរបស់ប្រធានសមាគមខ្មែរនៅទីនោះ។
បើតាមការបញ្ជាក់របស់កញ្ញា គង់ ច័ន្ទសូរិយា បានឲ្យដឹងតាមទូរស័ព្ទថា “ខ្ញុំពិត ជាមានគម្រោងចេញទៅច្រៀង នៅប្រទេស កាណាដាពិតមែន។ ប៉ុន្តែខ្ញុំនៅមិនទាន់ប្រាកដថា អាចនឹងបានចេញទៅនៅពេលណានោះទេ”។
កញ្ញាបានបន្តថា បើតាមគម្រោង នាងនឹងត្រូវចាកចេញពីស្រុកខ្មែរទៅកាណាដា នាអំឡុងខែកក្កដា ខាងមុខនេះ តែនាងនៅមិនទាន់ ប្រាកដក្នុងចិត្តនៅឡើយទេថា អាចនឹងបានទទួលទិដ្ឋាការឆ្លងដែន ឬមួយយ៉ាងណានោះ ព្រោះនាងត្រូវឆ្លងកាត់ការសម្ភាសន៍នៅស្ថានទូតកាណាដាប្រចាំនៅប្រទេសថៃជាមុនសិន។
ទោះបីជាយ៉ាងណាក្តី កញ្ញា គង់ ច័ន្ទសូរិយា ក៏នៅមិនទាន់ច្បាស់ក្នុងចិត្តទេថា នាងអាចនឹងសម្ភាសន៍ជាប់ ឬយ៉ាងណានោះទេ។ កញ្ញាបានលើកឡើងថា ការសម្ភាសន៍ចេញទៅប្រទេសកាណាដា គឺពិបាកជាងការសម្ភាសន៍ ចេញទៅប្រទេសដទៃទៀតណាស់។ សម្រាប់ឯកសារ នាងបានរៀបចំរួចរាល់អស់ហើយ គឺនៅរង់ចាំតែការធ្វើការសម្ភាសន៍តែប៉ុណ្ណោះ។
ជាមួយនឹងសម្រស់ មិនចាញ់តារាដទៃទៀត កញ្ញា គង់ ច័ន្ទសូរិយា ក៏បានរំពឹងទុកដែរថា ប្រសិនការសម្ភាសន៍របស់នាងជាប់ ហើយបានចេញទៅច្រៀងនៅលើទឹកដី ប្រទេសកាណាដា ក្នុងខែកក្កដា ដូចជាការគ្រោងទុកមែននោះ នាងសង្ឃឹមថា នឹងទទួល បានការគាំទ្រពីសំណាក់បងប្អូនអាណិកជខ្មែរ ដែលរស់នៅទីនោះជាមិនខាន។ ម្យ៉ាងទៀត ដោយសារតែពួកគាត់ ដែលរស់នៅទីនោះ ក៏កំពុងចង់ឃើញមុខរបស់នាងផងដែរ៕
.jpg)
.jpg)
.jpg)