ថ្ងៃទី 10 មិថុនា 2013
ដោយ: ពិទូរ្យ
CEN
ភ្នំពេញ:
កាលពីរសៀលម្សិលមិញ តារាចម្រៀង ពេជ្រ សោភា ត្រូវបានអ្នកគាំទ្រ រៀបចំពិធីខួបកំណើត ឲ្យតារាចម្រៀង នៅក្នុងដួងចិត្តរបស់ពួកគេ។ ការរៀបចំនេះ បានធ្វើឡើងនៅក្នុងហាងមួយក្នុងទីក្រុងភ្នំពេញ ចំថ្ងៃទី៩ ខែមិថុនា ឆ្នាំ២០១៣ ដែលជាថ្ងៃកំណើតរបស់នាង។
ឆ្លៀតក្នុងឱកាសនោះ ពេជ្រ សោភា បានសរសរនូវពាក្យអរគុណ និងផ្តល់អនុសាសន៍ដល់បណ្តាអ្នកគាំទ្រ(Fans)ទាំងអស់ និងបង្ហោះរូបថតមួយសន្លឹកដែលមាន Fans ប្រហែល ៣០នាក់ “ អរគុណ ប្អូនៗសម្រាប់ថ្ងៃនេះ និងតែងតែគាំទ្រ ហើយផ្ដល់កម្លាំងចិត្តឲ្យបងរហូតមក… កុំភ្លេចណា ស្រឡាញ់បង គឺត្រូវស្រឡាញ់ក្រុមគ្រួសារ ស្រឡាញ់ការសិក្សា ហើយចាំស្រឡាញ់បងតាមក្រោយ… អរគុណ”។
ម្ចាស់បទ “សង្សារគ្រាន់តែជាអ្នកដទៃ” រូបនេះ តែងតែផ្តាំផ្ញើជាមួយនឹងសារខ្លីៗជូនដល់យុវជន-យុវតី ឲ្យចេះស្រឡាញ់ការសិក្សា មិនត្រូវសេពគ្រឿងញៀន ជាពិសេសអ្វីដែលតារាចម្រៀងរូបនេះ តែងតែផ្តោតសំខាន់ គឺការដឹងគុណ និងគោរពស្រឡាញ់អ្នកមានគុណជានិច្ច។
នៅក្នុងបណ្តាញទំនាក់ទំនងសង្គម ហ្វេសប៊ុក តារាចម្រៀងកំពុងពេញនិយម ពេជ្រ សោភា គេឃើញនាងបង្ហោះរូបនំខួបកំណើតដែលសុទ្ធសឹងជានំខួបរបស់ Fans របស់នាង រួមជាមួយនឹងកាដូផ្សេងៗទៀត។
ទាក់ទងនឹងពិធីដែលរៀបចំឡើងដោយ Fans សម្រាប់ខួបកំណើតតារាចម្រៀងដែលពោរពេញទៅដោយក្បាច់រាំដ៏រស់រវើក ដែលទស្សនិកជនទស្សនាហើយ មិនចង់ដាក់ភ្នែកនោះ ស៊ីអ៊ីអិន មិនអាចទាក់ទងសុំការសម្ភាសន៍បានទេ ខណៈដែលទូរស័ព្ទរបស់នាង ចូលហើយ តែគ្មានអ្នកលើក។
តារាចម្រៀងដែលបោះជំហាននៅលើសិល្បៈជាង១០ឆ្នាំមកហើយ នាងពេជ្រ សោភា បានឡើងប្រជាប្រិយភាពដល់កំពូលនៅឆ្នាំ២០០៤ នៅពេលនាងចេញបង្ហាញខ្លួនជាដំបូងនូវបទចម្រៀង ” Better Day ” និងបន្ទាប់មក ” បេះដូងត្រដរខ្យល់ “។ ក្រៅពីទឹកមុខពោរពេញដោយមនោសញ្ចេតនា ពេជ្រ សោភា ថែមទាំងត្រូវបានទទួលស្គាល់ពីទេពកោសល្យនៃក្បាច់រាំតាមរយៈបទ ” Driving It this way ” នៅឆ្នាំ២០០៧ ហើយសម្រាប់ឆ្នាំ២០១៣នេះ ពេជ្រ សោភា បានក្តោបតំណែងតារាស្រី ដែលមានក្បាច់រាំល្អផ្តាច់គេ៕
