ថ្ងៃទី 2 កក្កដា 2013
ដោយ: ពិទូរ្យ
CEN
ភ្នំពេញ: បន្ទាប់ពីជោគជ័យក្នុងការទៅសម្តែងច្រៀងរាំ នៅប្រទេសជប៉ុនរួចមក តួឯកសម្ដែងក្នុងសាច់រឿងបទចម្រៀងបទ “អស់ឱកាស” លោក រតនៈ វិសិដ្ឋ កំពុងរៀបចំខ្លួន ចេញទៅសម្ដែងនៅប្រទេសអូស្ត្រាលី នៅថ្ងៃទី៦ ខែកក្កដាខាងមុខនេះ រួមជាមួយតារាស្រីប្រុស បួនដួងទៀត។
ទោះបីជាការចេញទៅសម្ដែងនៅប្រទេសអូស្ត្រាលីជាលើកដំបូងក្តី តែតារាបង្ហាញម៉ូដរូបនេះ ហាក់មានភាពជឿជាក់ ហើយសង្ឃឹមថា បងប្អូនខ្មែរដែលរស់នៅប្រទេសអូស្ត្រាលី ប្រាកដជាគាំទ្រ និងផ្តល់ជាកម្លាំងចិត្តដល់រូបលោកជាក់ជាមិនខាន។
រតនៈ វិសិដ្ឋ បានឲ្យដឹងថា “ខ្ញុំនឹងប្រឹងសម្តែងច្រៀងរាំ ឲ្យអស់សមត្ថភាពតែម្តង ព្រោះពួកគាត់ ដែលរស់នៅទីនោះ ប្រាកដគាត់ពិតជាស្រលាញ់នឹងចូលចិត្តខ្ញុំហើយបានជាគាត់យកពួកខ្ញុំទៅ។ ចឹងហើយបានជាខ្ញុំសង្ឃឹមថា និងទទួលបានផ្លែផ្កា ពេលដែលទៅដល់ទីនោះ”។
រតនៈ វិសិដ្ឋ ត្រូវបានគេស្គាល់កាន់តែច្បាស់ តាមរយៈវ៉ុលចម្រៀងរបស់ផលិតកម្មថោន ក្នុងបទ I’m Sorry របស់ មាស សុខសោភា និងបទ អស់ឱកាស របស់លោកករុណា ពេជ្រ។ ក្រៅពីនោះ លោកក៏បានលេចមុខមាត់ក្នុងវ៉ុលមួយចំនួនទៀតរបស់ផលិតកម្ម M និងផលិតកម្ម Big Man ផងដែរ។
តារាសម្តែងវ័យ ២៧ ឆ្នាំរូបនេះ បានចេញសម្ដែងច្រើនស្ទើរគ្រប់ផលិតកម្មទាំងក្នុង និងក្រៅស្រុក ពិសេសផលិតកម្មហង្សមាស ក្នុងកម្មវិធីថតចូលឆ្នាំជាដើម និងបានចូលរួមសម្តែងក្នុងរឿង (ភ័ព្វសំណាង) របស់ស្ថានីយទូរទស្សន៍ស៊ីធីអិន។
ការចេញមុខស្ទើរគ្រប់ផលិតកម្មបែបនេះហើយ ដែលបានប្រែក្លាយខ្សែជីវិតរបស់តារាបង្ហាញម៉ូតរូបនេះ ឲ្យបោះជំហ៊ានបន្តិចម្តងៗ ដើម្បីឈានទៅដល់គោលដៅនៃភាពល្បីល្បាញ ទីបំផុតរតនៈ វិសិដ្ឋ អាចឈានជើងទៅសម្តែងនៅក្រៅប្រទេសជាហូរហែរ។
តារាបង្ហាញម៉ូតមាឌមាំ ខ្ពស់ស្រលះ រតនៈ វិសិដ្ឋ បានឲ្យស៊ីអ៊ីអិន ដឹងតាមទូរស័ព្ទថា លោកនឹងចាកចេញពីទឹកដីកំណើតនៅថ្ងៃទី៦ធ្នូ ឆ្នាំ២០១៣ ក្រោមការធានា និងឧបត្ថម្ភរបស់សមាគមន៍ខ្មែរនៅអូស្ត្រាលី ដែលមានឈ្មោះថា “សមាគមន៍ខ្មែរ-អូស្ត្រាលី ខាងត្បូង” ហើយការចាកចេញទៅសម្តែងលើកនេះ មានរយៈពេលមួយខែកន្លះ។
នេះជាឱកាសទី២ សម្រាប់តារាសម្តែងរាងសង្ហារ រតនៈ វិសិដ្ឋ ដែលបានឈានជើងជាន់ទឹកដីអូស្ត្រាលី បន្ទាប់ពីលើកទីមួយ លោកបានចេញទៅច្រៀងរាំ នៅប្រទេសជប៉ុន កាលពីអំឡុងខែសីហា ឆ្នាំ២០១២ កន្លងមក៕