Wednesday, 03 July 2013
សេត គឹមសឿន
ភ្នំពេញ ប៉ុស្តិ៍
ភ្នំពេញៈ កំពុងតែមមាញញឹកយ៉ាងខ្លាំងក្នុងយុទ្ធនាការឃោសនារកសំឡេងឆ្នោតឆ្នាំ២០១៣អ្នកសិល្បៈមួយចំនួនក៏បានឲ្យដឹងផងដែរថា តារាសម្តែងរូបសង្ហា ស៊ុក សុភា ក៏កំពុងបារម្ភពីភរិយារបស់លោកដែលកំពុងតែពពោះកូនទី២។
នៅក្នុងសិល្បៈអ្នកណាក៏បានដឹងថា តារាសម្តែង ស៊ុក សុភា មានតួនាទីធំដុំមួយនៅក្នុងជួររដ្ឋាភិបាល ហើយលោកក៏ជាគណៈពង្រឹងបក្សប្រជាជននៅខេត្តកំពតផងដែរហើយសម្រាប់ការវិលមកកាន់ប្រទេសកម្ពុជាលើកនេះ គេបានដឹងថា លោកមកដើម្បីចូលរួមនៅក្នុងចលនាឃោសនាការបោះឆ្នោតថ្នាក់ជាតិដែលប្រព្រឹត្តទៅនៅចុងខែកក្កដាខាងមុខ។
ការមកកាន់ប្រទេសកម្ពុជាដើម្បីបម្រើការងារក្នុងអំឡុងពេលបោះឆ្នោតនៅកម្ពុជានេះ ស្របពេលដែលភរិយារបស់លោកគឺនាង សារីណា ស៊ូហ្សាណា មានផ្ទៃពោះកូនទី២ដែរ។ សារីណា ស៊ូហ្សាណា បានសរសេរនៅលើហ្វេសប៊ុករបស់ខ្លួនដោយបង្ហោះរូបថតពិនិត្យមើលអេកូកូនប្រុសឬក៏ស្រីថា តើកូនប្រុស ឬក៏ស្រី ដែលធ្វើឲ្យទស្សនិកជនភ្ញាក់ផ្អើលយ៉ាងខ្លាំង។ តែយ៉ាងណាមកទល់នឹងពេលនេះ នាងមិនបានបញ្ជាក់ថាកូនប្រុស ឬក៏ស្រីនៅឡើយ។
អ្នកនាងស៊ូហ្សាណាបាននិយាយថា៖«ខ្ញុំចង់បានកូនស្រីម្នាក់ទៀត តែនៅពេលនេះ ខ្ញុំអត់ទាន់ប្រាប់ថា កូននោះស្រី ឬក៏ប្រុសទេ ចាំមើលពេលកើតដឹងហើយ»។
ដោយឡែកលោក ស៊ុក សុភា វិញ ក៏បានទទួលស្គាល់ថា ភរិយារបស់លោកពិតជាពពោះកូនទី២មែន តែលោកក៏បដិសេធមិនព្រមប្រាប់ថា កូនស្រីឬក៏ប្រុសដែរ។ តារារូបនេះនិយាយថា៖«រឿងថា កូនប្រុស ឬស្រីនេះ ចាំមើលចុះ ព្រោះខ្ញុំអត់ហ៊ាននិយាយដែរ ខ្លាចខុស ហើយក៏មិនហ៊ានបញ្ជាក់ថា ប្រពន្ធខ្ញុំពពោះប៉ុន្មានខែដែរ»។
តារារូបនេះបានឲ្យដឹងថា លោកនឹងចាកចេញពីប្រទេសកម្ពុជាទៅកាន់ប្រទេសអូស្ត្រាលីរស់នៅជុំគ្នាជាមួយនឹងភរិយា និងកូនៗវិញនៅក្រោយពេលបោះឆ្នោតរួច៕