Wednesday, 17 July 2013
ស៊ូ វុទ្ធី
ភ្នំពេញ ប៉ុស្តិ៍
ភ្នំពេញៈ តារាសម្តែង កុល ដាវី បានរួមដៃគ្នាជាមួយតារាចម្រៀង សុខ រក្សា បង្កើតក្រុមតន្រ្តីរួមគ្នាបន្ទាប់ពីទទួលបានឱកាសបណ្តើរគ្នាដូចលលកញីឈ្មោល ហោះហើរទៅច្រៀងនិងសម្តែងឆ្លងទ្វីប ក្រោមពាក្យលេចឮមិនដាច់សូរពីនាយសមុទ្រថាពួកគេបង្កាត់ភ្លើងស្នេហ៍យល់ចិត្តថ្លើមគ្នា ចាក់ទឹកមិនលេចតាំងពីមុនទៅសម្តែងនៅអាមេរិកនោះ។
ប្រភពនៅអាមេរិកបានបង្ហើបឲ្យដឹងទៀតថា សុខ រក្សា និង កុល ដាវី បានសម្តែងនូវកាយវិការកាន់តែបង្ហាញឲ្យគេដឹងថា ពួកគេកំពុងមានស្នេហានឹងគ្នាកាន់តែលេចធ្លោដោយពួកគេបណ្តើរគ្នាទៅណាមកណាតែពីរនាក់ និងឱបកៀកកើយគ្នាល្អូកល្អិនដូចគូស្នេហ៍ដែលដូចវាស់ស្ទង់ជម្រៅបេះដូងគ្នារាប់ឆ្នាំហើយ។ ប្រភពដដែលនោះបានបញ្ជាក់ថា នៅពេលនេះ អ្នកអាមេរិកដែលបានជួបពួកគេម្នាក់ណាក៏ដឹងថា ពួកគេគឺជាគូស្នេហ៍នឹងគ្នាដែរ។
យ៉ាងណាក៏ដោយភាពស្និទ្ធស្នាលរបស់តារាពីរដួងដែលបានបង្អួតភ្នែកមហាជននៅឯនាយសមុទ្រនោះមិនត្រូវបានតួឯកប្រុសស្រីមួយគូនេះទទួលស្គាល់ការពិតនេះឡើយ។ ពួកគេអះអាងថា ទំនាក់ទំនងពួកគេនោះមានត្រឹមតែឱកាសរួមដំណើរទៅសម្តែងនៅក្រៅប្រទេសតែប៉ុណ្ណោះ។ ដូចគ្នានោះ ពួកគេក៏បញ្ជាក់ដែរថា បើទៅជាមួយគ្នាតែពីរនាក់ដៃគូសម្តែងបើមិនឲ្យស្និទ្ធស្នាលជាមួយគ្នាតើឲ្យទៅស្និទ្ធស្នាលជាមួយអ្នកណា។ ពួកគេគ្រាន់តែ រាប់អានគ្នាធម្មតាប៉ុណ្ណោះមិនមានអ្វីលើសនោះទេ។
ប៉ុន្តែអ្វីដែលមហាជនមិនបាននឹកស្មានដល់និងផ្ទុយពីការអះអាងរបស់ពួកគេមុននោះគឺក្រោយពីដឹកដៃគ្នាចុះពីយន្តហោះមកដល់ប្រទេសកំណើតភ្លាម ពួកគេក៏បង្ហាញនូវលទ្ធផលវិជ្ជមានមួយដ៏គួរឲ្យភ្ញាក់ផ្អើលនោះគឺពួកគេបានចូលហ៊ុនគ្នាក្នុងចំនួនទឹកប្រាក់រាប់ម៉ឺនដុល្លារបើកក្រុមតន្រ្តីរួមគ្នា ដោយប្រគល់ក្តីទុកចិត្តឲ្យលោក សុខ រក្សា ជាអ្នកកាន់និងគ្រប់គ្រង ដែលរូបភាពនេះមានតែគូស្នេហ៍ទេ ទើបហ៊ានចំណាយប្រាក់ដាក់ហ៊ុនជាមួយគ្នា។
ថ្លែងបកស្រាយពីហេតុផលដ៏គួរឲ្យចាប់អារម្មណ៍នេះនាង កុល ដាវី បានប្រាប់ថា៖«មានហេតុផលច្រើនដែលនាំឲ្យខ្ញុំសម្រេចបោះទុនបើកក្រុមតន្រ្តីដោយចូលលុយគ្នាជាមួយលោក សុខ រក្សា និងប្រគល់ឲ្យគាត់ជាអ្នកគ្រប់គ្រងនោះ»។ កុល ដាវី បានប្រាប់ថា៖«ក្រោយពីខ្ញុំបានឱកាសចេញសម្តែងក្រៅប្រទេសជាមួយបង រក្សាពីរលើកនៅកាណាដា និងអាមេរិកពួកយើងហាក់មាននិស្ស័យនិងមានគោលដៅក្នុងការងារពង្រីករបររកស៊ីដូចគ្នា»។
កុល ដាវីបញ្ជាក់ថា៖«បង រក្សា គាត់ជាមនុស្សស្មោះត្រង់ អត្តចរិតល្អ និងសំខាន់មួយទៀត គឺគាត់ចេះនិពន្ធបទភ្លេងផង ទើបពួកខ្ញុំឯកភាពដាក់ទុនជាមួយគ្នា បង្កើតក្រុមតន្រ្តីនោះឡើង»។ ប៉ុន្តែនាង កុល ដាវី បែរជាបដិសេដយ៉ាងដាច់អហង្ការថា រវាងនាង និងសុខ រក្សាមិនមានទំនាក់ទំនងណាមួយលើសពីការរាប់អានគ្នា និងយល់ចិត្តគ្នា ត្រឹមដៃគូសិល្បៈ និងដៃគូរកស៊ីជាមួយគ្នាទេ គឺមិនមានស្នេហាក្រៅឆាកដូចគេលើកឡើងនោះឡើយ។
យ៉ាងណា ទាំងដាវី និងលោក រក្សា មិនបានបញ្ជាក់ពីទុនចំណាយក្នុងការចូលប្រាក់គ្នាបើកក្រុមតន្ត្រីនេះឡើយ ក្រៅពីប្រាប់ថា ឧបករណ៍តន្រ្តីទាំងអស់គឺទិញនៅអាមេរិកទាំងអស់ហើយពេលនេះផ្ញើតាមកប៉ាល់មិនទាន់មកដល់ទេ។
ដាវី បានប្រាប់ដែរថា វង់តន្រ្តី ដែលនាងបើកជាមួយលោក រក្សានោះ ដាក់ឈ្មោះថា band star។ នាងក៏បានអះអាងថា៖«ដ្បិតថា ឧបករណ៍តន្រ្តីរបស់ពួកខ្ញុំមិនទាន់បានមកដល់ប្រទេសកម្ពុជាមែន តែមានគេនិយាយជួលហើយហ្នឹង តែពេលនេះខ្ញុំមិនទាន់ទទួលច្រើនទេ គឺតែពីរបីរោងសិនប៉ុណ្ណោះ»។
ក្នុងពាក្យសម្ដីដែលលាយលំជាមួយសំណើចផងនោះ កំពូលតារាចូលចិត្តលេងខ្លួនសិចស៊ី កុល ដាវី បានបញ្ជាក់ថា នៅថ្ងៃទី២-៣ និងទី៤ខែ៨ ខាងមុខនេះ ក្រុមតន្រ្តីរបស់នាងនឹងចេញលេងកម្មវិធីធំមួយក្នុងពិធីបើកសម្ពោធកាស៊ីណូ Diamond star នៅច្រកស្រែខ្លុងកំពង់ចាម-វៀតណាម ហើយក៏ជាការសម្ពោធបើកដំណើរការក្រុមតន្រ្តី band star របស់ពួកខ្ញុំដែរ។
ដូចគ្នានឹងកុល ដាវី ដៃគូភាគហ៊ុនក្នុងជំនួញថ្មី លោក សុខ រក្សាក៏បានបដិសេធមិនទទួលស្គាល់ថា ភាពស្និទ្ធស្នាលរវាង លោក និងដាវី ជាគូស្នេហ៍ដែរ ដោយលោកនិយាយយ៉ាងដូច្នេះថា ភាពស្និទ្ធស្នាលរវាងលោកនិងកញ្ញាកុល ដាវីកន្លងមក វាគ្រាន់តែជាភាពស្និទ្ធស្នាលបែបសិល្បៈនិងមិត្តភក្ដិប៉ុណ្ណោះមិនឈានដល់ស្នេហានោះឡើយ»។
តារាដែលកំពុងជាប់សង្ស័យរឿងស្នេហាជាមួយដៃគូភាគហ៊ុន សុខ រក្សាបញ្ជាក់ថា Band Star ដែលលោកបង្កើតនេះ ជាបំណងប្រាថ្នារបស់លោកយូរមកហើយ ម្យ៉ាងវាក៏ជាបំណងរបស់កុល ដាវីដែលចង់មានមុខរបររកស៊ីផងដែរ។ រក្សា និយាយថា៖«ខ្ញុំមានឧបករណ៍ខ្លះហើយ គ្រាន់តែទិញចូលបន្ថែម អ៊ីចឹងវាមិនលំបាកនោះទេ គេចង់ជួលវង់ភ្លេងប្រភេទណាក៏យើងអាចធ្វើបានដែរ ព្រោះទាំងពីរនាក់សុទ្ធតែមានបណ្ដាញអ្នកសិល្បៈច្រើនដូចគ្នា»។
លោក សុខ រក្សា បានបន្ថែមថា ជំហានដំបូងលោកបើកលក្ខណមធ្យម តែទៅថ្ងៃអនាគត លោកមានគម្រោងបើកទ្រង់ទ្រាយធំ ដោយអាចទទួលរៀបចំខនស៊ឺតធំៗ ក្នុងនោះមានឆាក និងភ្លើង ផ្ទាល់ខ្លួនតែម្ដង។ លោកនិយាយថា៖«ពេលហ្នឹងយើងអាចទទួល កម្មវិធីជប់លៀង អាពាហ៍ពិពាហ៍ ឬបុណ្យទានផ្សេងៗ បើយើងធ្វើដូចគេអស់ច្រើនណាស់ អាធុនកណ្ដាល ៧ ទៅ៨ម៉ឺន បើធំជាងនេះអស់មិនក្រោម១០ម៉ឺនដុល្លារនោះទេ អត់ទាន់ឈានដល់ដំណាក់កាលនេះទេ សាកធ្វើប៉ុណ្ណឹងសិន»។ ប៉ុន្តែដោយឡែក ដៃគូជំនួញរបស់សុខ រក្សា នាង កុល ដាវី បង្ហើបប្រាប់ថា៖«ក្នុងគម្រោងរបស់ពួកយើង ឆ្នាំក្រោយ ក្រោយពេលវង់តន្រ្តីនេះមានជំហររឹងមាំហើយនោះ ពួកយើងមានគម្រោងបើកភោជនីយដ្ឋានមួយជាមួយគ្នាទៀតផង»៕