Friday, 19 July 2013 សេត គឹមសឿន
ភ្នំពេញ ប៉ុស្តិ៍
ភ្នំពេញៈ កំពូលតារាចម្រៀងប្រចាំប្រទេសលោក ព្រាប សុវត្ថិ បានឡើងយន្តហោះបោះពួយចាកចេញពីប្រទេសកម្ពុជាឆ្ពោះទៅកាន់ប្រទេសអូស្ត្រាលីកាលពីល្ងាចថ្ងៃទី១៨ កក្កដា ម្សិលមិញ ដើម្បីចូលរួមនៅក្នុងកម្មវិធីការប្រគំតន្ត្រីគម្រប់ខួប១០ឆ្នាំរបស់អង្គការជួយក្មេងកំព្រាមួយនៅប្រទេសអូស្ត្រាលី ហើយក្រោយពេលបញ្ចប់ការសម្តែងច្រៀងនៅទីនោះ លោក ព្រាប សុវត្ថិ នឹងមិនទាន់ត្រឡប់មកកម្ពុជាវិញភ្លាមទេពោលគឺលោកនឹងបន្តដំណើរទៅកាន់ប្រទេសនូវែលសេឡង់បន្តទៀត។
នេះជាលើកទី៥ហើយសម្រាប់កំពូលតារាចម្រៀង ព្រាប សុវត្ថិ ចេញទៅប្រទេសអូស្ត្រាលី តែនេះទើបតែជាលើកដំបូងប៉ុណ្ណោះសម្រាប់ការចេញសម្តែងរបស់លោកនៅប្រទេសនូវែលសេឡង់។ លោក ព្រាប សុវត្ថិ រួមជាមួយនឹងក្រុមតន្ត្រីកររបស់លោកបានចេញដំណើរតាមជើងយន្តហោះសិង្ហបុរីកាលពីល្ងាចម៉ោងជាង៦កាលពីម្សិលមិញ ដើម្បីចូលរួមអបអរខួប១០ឆ្នាំរបស់អង្គការនោះនៅថ្ងៃសៅរ៍។
តារាចម្រៀងដ៏មានឥទ្ធិពលរូបនេះបាននិយាយថា៖«ខ្ញុំបានធ្វើការជាមួយនឹងអង្គការមួយហ្នឹង១០ឆ្នាំមកហើយ ហើយឆ្នាំនេះជាខួប១០ឆ្នាំ ដូច្នេះខ្ញុំគិតថា ព្រឹត្តិការណ៍នេះនឹងធំជាងរាល់ដង។ យើងធ្វើការរួមគ្នានេះគឺដើម្បីជួយក្មេងកំព្រា ជនមានជំងឺផ្ទុកជំងឺអេដស៍ជាដើម»។
ការទៅជាន់ទឹកដីអូស្រ្តាលីជាលើកទី៥នេះ លោក ព្រាប សុវត្ថិ បានឲ្យដឹងថា លោកនឹងនៅទីនោះរយៈពេល១ខែពេញ ហើយក្រោយចប់សព្វគ្រប់រូបលោកនឹងឡើងយន្តបន្តទៅកាន់ទឹកដីប្រទេសនូវែលសេឡង់តែលោកបានបញ្ជាក់ថា លោកសម្តែងច្រៀងនៅប្រទេសនូវែលសេឡង់តែ១សប្តាហ៍ប៉ុណ្ណោះ។
តារាចម្រៀងដែលនៅតែគ្រងតំណែងលេខ១ជាង១០ឆ្នាំលើវិស័យចម្រៀងលោក ព្រាប សុវត្ថិ បាននិយាយថា៖«ខ្ញុំច្រៀងនៅប្រទេសអូស្ត្រាលីនោះតែ១ខែទេ បន្ទាប់មកខ្ញុំ និងក្រុមការងារនឹងទៅកាន់ប្រទេសនូវែលសេឡង់បន្ត១សប្តាហ៍ទៀត ព្រោះពួកគាត់កំពុងទន្ទឹងរង់ចាំខ្លាំងណាស់ ពួកគាត់ចង់ជួបផ្ទាល់ ចង់មើលការសម្តែងរបស់យើង ហើយខ្ញុំក៏មិនដែលទៅទីនោះដែរ។ ខ្ញុំគិតថា នៅនូវែលសេឡង់មិនសូវមានបងប្អូនខ្មែរយើងច្រើនដូចនៅអូស្ត្រាលីទេ តែពួកគាត់ពិតជាចង់បានយើងទៅលេងទីនោះណាស់»។
ក្នុងជីវិតជាតារាចម្រៀងលោក ព្រាប សុវត្ថិ ធ្លាប់ចេញទៅច្រៀងនៅក្រៅប្រទេសជាញឹកញាប់ ប៉ុន្តែចំណុចពិសេសដែលគ្មានអ្នកណាអាចធ្វើដូចនោះគឺលោកមិនត្រឹមតែអាចចេញទៅច្រៀងតែម្នាក់ឯងនោះទេ តែលោកថែមទាំងអាចធានាក្រុមតន្ត្រីករ៤នាក់ទៅជាមួយដោយងាយស្រួលទៀតផងខណៈអ្នកសិល្បៈមួយចំនួនត្រឹមតែយោងអាត្មាសឹងតែមិនរួចផងនោះ។
សម្រាប់ភាពពិសេសលើសគេនោះ លោក ព្រាប សុវត្ថិ បានបញ្ចេញស្នាមញញឹម ហើយនិយាយថា៖«សម្រាប់អ្នកសិល្បៈដទៃខ្ញុំមិនដឹងទេ តែសម្រាប់ខ្ញុំ ពេលចេញទៅគ្រប់ប្រទេសដូចជា សហរដ្ឋអាមេរិក កាណាដា អូស្ត្រាលី ជាដើម ខ្ញុំតែងមានក្រុមតន្ត្រីរបស់ខ្ញុំទៅជាមួយ។ នេះខ្ញុំចង់ប្រាប់គេថា យើងមានលក្ខណសម្បត្តិគ្រប់គ្រាន់សម្រាប់ការសម្តែងយើងមានសមត្ថភាពពេញលេញសម្រាប់អ្នកទស្សនា។ ម្យ៉ាងយើងទៅពីស្រុកខ្មែរ យើងមិនធ្លាប់សម្តែង ឬហាត់សមជាមួយនឹងក្រុមភ្លេងនៅទីនោះទេ ដូច្នេះបើយើងមានក្រុមភ្លេងទៅពីស្រុកខ្មែរស្រាប់ គឺវាងាយស្រួលជាង»៕