Tuesday, 23 July 2013
សេត គឹមសឿន
ភ្នំពេញ ប៉ុស្តិ៍
ភ្នំពេញៈ ពិធីការិនីនៅក្នុងទ្រនំទូរទស្សន៍បាយ័ននាង ហ៊ិន ច័ន្ទនីរ័ត្ន ត្រូវបានគេសង្កេតឃើញថា តារារូបនេះហាក់ដូចជាស្រពោនចិត្តបន្តិច និងមានរាងរៅចុះស្គមជាងមុនដែលគេម្នាក់ៗនិយាយថា ទំនងជាស្រីស្រស់ធ្មេញច្រពើសរូបនេះបានជួបនឹងវិបត្តិស្នេហាជាមួយនឹងបុរសជាគូស្នេហ៍មិនខាន ខណៈក្នុងអំឡុងពេលថ្មីៗនេះមានព័ត៌មានថា បុរសជាគូស្នេហ៍ដែលនាងធ្លាប់បដិសេធពីមុននោះ បានបែរចិត្តងាកទៅសាងស្នេហ៍នឹងតារាចម្រៀង ទេព បូព្រឹក្ស វិញ។ តែនៅពេលឮព័ត៌មាននេះស្រាប់តែ ហ៊ិន ច័ន្ទនីរ័ត្ន បដិសេធ ដោយនាងបញ្ជាក់ថា នៅពេលនេះ បេះដូងនាងនៅទំនេរស្អាត។
ពិធីការិនីវ័យ២២ឆ្នាំ ហ៊ិន ច័ន្ទនីរ័ត្ន បានចាប់ផ្តើមអាជីវកម្មជាលើកដំបូងក្នុងអាជីពដោយហាងថ្មីដែលមានលក់ម្ហូបអាហារ និងភីហ្សាកាលពីឆ្នាំ២០១២ដាក់ឈ្មោះថា Relax Restaurant ស្ថិតនៅខាងលិចវត្តលង្កានៅក្រោយ The Place ។ ហាងថ្មីដែលចំណាយទុនច្រើនគួរសមប្រមាណ៤ទៅ៥ម៉ឺនដុល្លារនេះ ត្រូវហ៊ិន ច័ន្ទនីរ័ត្ន ឲ្យដឹងថា នាងបានបោះទុនវិនិយោគជាមួយនឹងមិត្តភ័ក្តិ។ ភោជនីយដ្ឋានមួយនេះហើយត្រូវបានគេទម្លាយថា ហ៊ិន ច័ន្ទនីរ័ត្ន ទទួលបានការជួយឧបត្ថម្ភជ្រោមជ្រែងពីនិស្សិតរៀននៅអាមេរិកម្នាក់ ដែលជាកូនអ្នកធំមានទ្រព្យសម្បត្តិស្តុកស្តម្ភម្នាក់នៅកម្ពុជាដែលតែងចុះឡើងអាមេរិកស្រុកខ្មែរនោះហើយព័ត៌មាននេះហើយដែលនាំឲ្យពិធីការិនីរបស់ស្ថានីយទូរទស្សន៍បាយ័នរូបនេះឆេះដុំ ក្តៅស្លឹកត្រចៀកនិងចេញមុខបញ្ជាក់ប្រាប់ ភ្នំពេញ ប៉ុស្តិ៍ ថា ព័ត៌មានទាំងនោះមិនមែនជាការពិត។
នៅពេលថ្មីៗនេះ ពិធីការិនីមុខស្រទន់នាង ហ៊ិន ច័ន្ទនីរ័ត្ន បានឲ្យដឹងថាមួយរយៈនេះនាងដូចជាឆ្ងល់ណាស់ មិនដឹងជាយ៉ាងម៉េចបានជានាងរួមរឹតដោយចំណងរឿងអាស្រូវស្នេហាទាំងមិនដឹងខ្លួន។ នាងបន្តថា នៅសុខៗស្រាប់តែគេថា នាងនិងទេព បូព្រឹក្ស មានស្នេហាបុរសតែម្នាក់ ហើយបុរសរូបនោះបានបោះបង់នាងចោលស្រវា ទេព បូព្រឹក្ស វិញទាំងរូបនាង និង ទេព បូព្រឹក្ស សុទ្ធតែមិនដឹងខ្លួន។
ពិធីការិនីប្រចាំកម្មវិធីកម្សាន្តរបស់ទូរទស្សន៍បាយ័នវ័យ២២ឆ្នាំរូបនេះបាននិយាយទាំងហួសចិត្តថា៖«ខ្ញុំអត់ដឹងថា រឿងនោះគេបានមកពីណាទេ គេដឹងពីណាទេ ហើយខ្ញុំអត់បានដឹងរឿងនេះដែរ។ អាបូព្រឹក្ស បានទូរស័ព្ទ មកសួរខ្ញុំ ពីរឿងនេះ ព្រោះយើងសុទ្ធតែភ្ញាក់ផ្អើលដូចគ្នា។ ខ្ញុំនិងអាបូព្រឹក្ស ថ្វីដ្បិតនៅក្នុងសិល្បៈដូចគ្នា តែមិនសូវមានទំនាក់ទំនងគ្នាប៉ុន្មានទេ»។
គ្រាន់តែរំលងបានតែប្រមាណមួយសប្តាហ៍ ក៏មានព័ត៌មានមួយលេចធ្លាយថា នាង ហ៊ិន ច័ន្ទនីរ័ត្ន មានឧកញ៉ាវ័យក្រាស់ម្នាក់តាមស្អិតដូចតុកកែ និងធានាឧបត្ថម្ភនាងគ្រប់យ៉ាង ឲ្យតែរូបនាងព្រមទទួលយកស្នេហាមួយនោះ។ ទោះបីជាយ៉ាងណាស្នេហ៍ដែលកើតចេញពីទឹកចិត្តឧកញ៉ាម្នាក់នោះ ត្រូវបានហ៊ិន ច័ន្ទនីរ័ត្ន និយាយយ៉ាងសាមញ្ញថា រូបនាងមិនមានជាប់ជំពាក់បេះដូងជាមួយបុរសណាម្នាក់ឡើយ ពោលគឺបេះដូងនាងនៅទំនេរស្អាតដូចក្រដាសសមួយសន្លឹកអ៊ីចឹង។
នាងបាននិយាយថា៖«រឿងឧកញ៉ាអីនោះ ក៏អត់មានដែរ ពោលគឺបេះដូងខ្ញុំនៅទំនេរស្អាតតែម្តង តែបើនិយាយថា អត់សោះក៏មិនកើតដែរ គឺមានដែរ តែខ្ញុំអត់ទទួលទេ ព្រោះចង់គិតរឿងការងារសិន»៕