Tuesday, 23 July 2013
Chloe Cann
ភ្នំពេញ ប៉ុស្តិ៍
ភ្នំពេញ : កាលពីព្រឹកម្សិលមិញនៅឯបរិវេណសាកលវិទ្យាល័យភូមិន្ទភ្នំពេញផ្នែកមហាវិទ្យាល័យភាសាឬវិទ្យាស្ថានភាសាបរទេសនោះមានការសម្តែងសិល្បៈវប្បធម៌ជប៉ុនមួយតាមរយៈល្ខោនប្រពៃណីបុរាណអូតាគុ។ វាជាលោ្ខនមួយដែលមានក្រុមនារីប្រាំរូបស្លៀកពាក់តុបតែងខ្លួននិងលេងម៉ូដសក់តាមបែបក្រុមក្មេងស្រីជំទង់របស់ជាតិជប៉ុន។
ឈុតសម្តែងល្ខោននោះបានទាក់ទាញចំណាប់អារម្មណ៍អ្នកទស្សនាខ្លាំងណាស់ជាពិសេសក្រុមបុរសៗពួកគេបានទាញកាមេរ៉ាថតឲ្យព្រោងព្រាតតែម្តងជាមួយនឹងឈុតស្លៀកខ្លីរបស់តួអង្គ។
និស្សិតស្រីជនជាតិថៃដែលដើរតួជានាងមីកូហាត់ស៊ូនីនៃរឿងល្ខោននោះបានបកស្រាយប្រាប់ដល់អ្នកព័ត៌មានថា៖«យើងបានស្វែងយល់ពីវាច្រើននិងព្យាយាមចង់សម្តែងឲ្យដូចជាតួអង្គនេះតែម្តងទៀតផង»។
មានអ្នកគាំទ្រស្វាគមន៍ពេញពិភពលោកសម្រាប់សិល្បៈលោ្ខនប្រពៃណីបុរាណជប៉ុនមួយនេះ។ ម្យ៉ាងទៀតវាជាសិល្បៈមានលក្ខណៈច្នៃប្រឌិតដូចជាខ្សែភាពយន្តគំនូរជីវចលជប៉ុននិងរឿងបែបកំប្លែងម៉ុងហ្គាដែរ។
ព្រឹត្តិការណ៍សម្តែងល្ខោនវប្បធម៌ប្រពៃណីជប៉ុននោះបានរៀបចំឡើងនៅមជ្ឈមណ្ឌលសហប្រតិបត្តិការកម្ពុជាជប៉ុនឬហៅកាត់ថាCJCCស្ថិតនៅក្នុងបរិវេណវិទ្យាស្ថានភាសាបរទេស។ គេឃើញមានអ្នកចូលរួមទស្សនាចំនួនប្រមាណជា៤០០នាក់ ដោយអ្នកទស្សនាភាគច្រើនជានិស្សិតកម្ពុជា។
អ្នករៀបចំកម្មវិធីលោកហ៊ីដេកាហ្សូកុនដូវ័យ៤៤ឆ្នាំបាននិយាយថាកាលពីខែកុម្ភៈកន្លងមក CJCCបានរៀបចំព្រឹត្តិការណ៍មានឈ្មោះJapan Cambodia Kizuna Festival 2013មានភាគីជប៉ុនចូលរួមរៀបចំតែព្រឹត្តិការណ៍សម្តែងល្ខោនប្រពៃណីជប៉ុនកាលពីម្សិលមិញនេះត្រូវបានភាគីកម្ពុជាជាអ្នករៀបចំ។ អ្នករៀបចំកម្មវិធីរូបនេះបានបង្ហើបប្រាប់ថាយើងនឹងមានកម្មវិធីមួយទៀតត្រូវចំដែរនៅខែតុលាខាងមុខ។
លោកថាល្ខោនប្រពៃណីជប៉ុនមួយត្រូវបានសម្តែងស្ទើរតែគ្រប់តំបន់នៅអាស៊ីទៅហើយ។ លោកថាយើងទទួលស្គាល់ចំពោះប្រជាប្រិយភាពល្ខោននេះខណៈកាលពីដើមវាមានភាពល្បីតិចតួចខ្លាំងណាស់នៅក្នុងប្រទេសកម្ពុជាជាងបណ្តាប្រទេសជិតខាង។
លោកបន្តថាទោះបីលោ្ខននេះវាមានលក្ខណៈបែបជាការកម្សាន្តលេងក្តីតែវាក៏ជាផ្នែកមួយនៃវប្បធម៌របស់ជប៉ុនដែរដោយវាច្រើនតែបង្ហាញពីរបៀបបែបបទម៉ូដរបស់ក្មេងៗ។
លោកណាំងម៉ូនីនវ័យ២៦ឆ្នាំដែលជាមន្រ្តីរាជការបម្រើការនៅឯក្រសួងមហាផ្ទៃបានឲ្យដឹងពីចំណាប់អារម្មណ៍ខ្លួនថាយើងសង្ឃឹមថាសិល្បៈល្ខោនប្រពៃណីជប៉ុនមួយនេះនឹងមានការគាំទ្រនិងចូលចិត្តច្រើននៅកម្ពុជា។
លោកណាំងម៉ូនីនបានបន្តថា៖«លោ្ខនប្រពៃណីជប៉ុននេះវាមានលក្ខណៈថ្មីសន្លាងសម្រាប់ប្រជាជនខ្មែរដោយអ្នកគាំទ្រភាគច្រើនមិនបានស្គាល់វាផងទេ។ តែចាប់ពីព្រឹត្តិការណ៍ធំមួយបានរៀបចំនៅខែកុម្ភៈមកនោះយើងឃើញមានមនុស្សជាច្រើនបានចូលរួមនិងចាប់អារម្មណ៍»។
ទោះបីជាគេសង្កេតឃើញមានអ្នកគាំទ្រភាគច្រើនជាបុរសក្តី តែអ្នកសម្តែងវិញភាគច្រើនគឺជាស្ត្រីដែរ។
ការីនិពន្ធទស្សនាវដ្តីជប៉ុនល្បីឈ្មោះម្នាក់គឺស៊ីនូស៊ូកិកូបាយ៉ាស៊ីវ័យ២៤ឆ្នាំបាននិយាយថា៖«នៅប្រទេសជប៉ុនគេច្រើនតែឃើញមានបុរសចូលរួមសម្តែងព្រោះគេចាប់អារម្មណ៍នូវសម្លៀកបំពាក់ប្រពៃណីនេះ»។
ចំណែកមិត្តរួមការងាររបស់លោកស៊ីនូស៊ូកិកូបាយ៉ាស៊ីគឺកញ្ញារីនហ៊ូស៊ីណូវ័យ២០ឆ្នាំវិញបានស្លៀកពាក់ឈុតពណ៌ស៊ីជម្ពូដែលនាងបានទិញពីប្រទេសជប៉ុនមកដើម្បីចូលរួមនៅទីនេះ។
ស៊ីនូស៊ូកិកូបាយ៉ាស៊ីបានពន្យល់ទៀតថាលោ្ខនប្រពៃណីនោះជាភាសាជប៉ុនថា«អូតាគុ»ដែលគេសំដៅទៅលើក្រុមក្រមិចក្រមើម តែវាភាគច្រើនសាច់រឿងមានលក្ខណៈដូចជារឿងបែបគំនូរជីវចលនិងរឿងម៉ង់ហ្គាដែរ។
លោកអះអាងថាទោះបីជាពេលនេះមានការគាំទ្រតិចតួចក្តី តែមិនយូរឡើយល្ខោនបែបប្រពៃណីជប៉ុនមួយនេះនឹងត្រូវបានប្រជាជនកម្ពុជាចាប់អារម្មណ៍ជាពិសេសលើការសម្តែងជាលោ្ខនប្រពៃណីជប៉ុនឈ្មោះអូតាគុជាមិនខាន៕PR