Thursday, 01 August 2013
សេត គឹមសឿន
ភ្នំពេញ ប៉ុស្តិ៍
កណ្តាលៈ ក្រោយបោះទុនថ្លៃទឹកដោះចំនួន៤ម៉ឺនដុល្លារ និងបំពាក់ចិញ្ចៀនគ្នាតម្លៃរាប់ម៉ឺនដុល្លារក្នុងពិធីភ្ជាប់ពាក្យយ៉ាងអធិកអធមកាលពី៤ខែមុនហើយគ្រោងនឹងដឹកដៃគ្នាចូលរោងការឲ្យបានឆាប់រហ័សនៅចុងឆ្នាំ២០១៣នេះ ស្រាប់តែនៅពេលនេះមានព័ត៌មានបែកធ្លាយថា ស្នេហាក្រោមចំណងភ្ជាប់ពាក្យរវាងតារាវ័យក្មេង ភិន សុដាលីស និងតារាសម្តែង ប៉ែន តុលា កំពុងជួបបញ្ហារង្គោះរង្គើ រហូតត្រូវលើកពេលរៀបការទៀតផង។
គួរបញ្ជាក់ថា ដោយសារឪពុកបង្កើតរបស់ខ្លួនជាម្ចាស់ផលិតកម្មមហាហង្សស្រាប់ និងតែងផ្តល់ឱកាសឲ្យខ្លួនឈរតំណែងជាតួឯកគ្រប់រឿងនោះ ភិន សុដាលីស ក៏បានឡើងកូដខ្លាំងជាងមុនបន្តិចនៅក្នុងឆ្នាំ២០១២ និងត្រូវបានមហាជនស្គាល់យ៉ាងច្រើន។ ប៉ុន្តែស្របពេលដែលការស្ទុះឡើងនូវប្រជាប្រិយភាពដោយឪពុកជួយជំរុញនេះមិនបានប៉ុន្មានផង ភិន សុដាលីស ក៏ត្រូវធ្លាក់ក្នុងរណ្តៅស្នេហាទាំងវ័យក្មេង និងបានសម្រេចភ្ជាប់ពាក្យជាផ្លូវការជាមួយនឹងតារាសម្តែងវ័យក្មេងស្រករក្រោយ ក្រោមដំបូលសិល្បៈតែមួយលោក ប៉ែន តុលា កាលពីថ្ងៃទី៣១ ខែមីនា ឆ្នាំ២០១៣។
នៅពេលជួបផ្ទាល់ជាមួយនឹងកញ្ញា ភិន សុដាលីស នាងហាក់ស្ទាក់ស្ទើរនៅក្នុងការឆ្លើយប្រាប់ចំពោះរឿងនេះ តែយ៉ាងណានាងបានទទួលស្គាល់ពីបញ្ហាដែលបានកើតឡើងចំពោះរូបនាង និងគូដណ្តឹង។ នាងបានឲ្យដឹងថា ស្នេហារបស់នាងពិតមានបញ្ហាមែន ប៉ុន្តែមិនមានអ្វីធំដុំដូចដែលគេលើកឡើងនោះឡើយ។
តារាសម្តែងស្រករក្រោយដើរតំណែងតួឯករហូតដោយសារមានឪពុកជាចាងហ្វាងផលិតកម្មមហាហង្សស្រាប់នាង ភិន សុដាលីស បាននិយាយថា៖«និយាយទៅពួកខ្ញុំគ្មានរឿងអ្វីឈ្លោះទាស់ទែងគ្នាខ្លាំងក្លានោះទេ គឺគ្រាន់តែប៉ះពាក្យសម្តីគ្នាតិចតួចតែប៉ុណ្ណោះ»។
ទស្សនិកជននៅតែមិនទាន់ជឿសម្តីរបស់អនាគតកូនក្រមុំនាង ភិន សុដាលីស ១០០ភាគរយនៅឡើយរឿងថា គ្រាន់តែប៉ះពាក្យសម្តីគ្នាតិចតួចនោះ ដោយសារតែស្នេហារបស់ពួកគេទាំងពីរក៏មិនមែនទើបតែចាប់ផ្តើមភ្លាម ភ្ជាប់ពាក្យភ្លែតនោះដែរ ពោលគឺពួកគេបានស្គាល់គ្នាចំនួន២ឆ្នាំកន្លះមកហើយ ហើយក៏បានចំណាយពេលស្វែងយល់ចិត្តគ្នាមិនតិចឆ្នាំដែរ ទម្រាំតែមានការព្រមគ្នារវាងសាមីខ្លួន និងចាស់ទុំទាំងសងខាងនោះភ្ជាប់ពាក្យ និងគ្រោងរៀបមង្គលការនៅចុងឆ្នាំនោះ។ ទស្សនិកជនបានលើកឡើងថា បើពួកគេពិតជាមានបញ្ហាតូចតាចមែននោះ ប្រហែលជាពួកគេក៏មិនទុកចំណងស្នេហ៍ចោល ហើយលើកថ្ងៃចូលរោងការដោយគ្មានពេលកំណត់បែបនេះដែរ។ តែយ៉ាងណាក៏ការលើកពេលនេះ ត្រូវបានភិន សុដាលីស បញ្ជាក់ថា ដោយសារតែពួកគេទាំងពីរមានការងាររវល់រៀងៗខ្លួន។
តារាសម្តែងស្ថិតក្នុងត្រកូលអ្នកជំនួញស្តុកស្តម្ភរូបនេះបាននិយាយថា៖«បញ្ហាលើកពេលការរៀបចំមង្គលការនេះ គឺដោយសារតែយើងទាំងពីរនាក់មានការងាររវល់រៀងៗខ្លួន ខ្ញុំកំពុងជាប់ការងារសិល្បៈផង ហើយខ្ញុំក៏ជាប់រៀននៅមហាវិទ្យាល័យដែរ ទាល់តែ៣ឆ្នាំទៀត ទើបចប់។ រីឯគាត់(តុលា) ក៏ជាប់រៀនសូត្រដែរ»។
នាងបានបញ្ជាក់ថា៖«ទោះបីជាយ៉ាងណាការរៀបការនៅតែធ្វើដដែល គ្រាន់តែយើងមិនទាន់ដឹងពេលច្បាស់លាស់។ រីឯចាស់ទុំពួកគាត់ធម្មតាទាំងអស់គ្នាអត់មានបញ្ហាទេ»។
ភិន សុដាលីស បានឲ្យដឹងថា នាង និងគូដណ្តឹងនៅតែមានទំនាក់ទំនងល្អនឹងគ្នាដដែល ហើយក៏នៅតែដើរទៅណាមកណាជាមួយគ្នាដែរ គ្រាន់តែប្រហែលមួយខែនេះមិនសូវញឹកញាប់ប៉ុណ្ណោះ។
ប៉ុន្តែតារាសម្តែង ប៉ែន តុលា ជាគូដណ្តឹងបានបដិសេធមិនចង់ធ្វើការបកស្រាយជុំវិញចំណងស្នេហ៍រង្គោះរង្គើរបស់ពួកគេនេះទេ តែលោកបានប្រាប់យ៉ាងខ្លីថា លោកនៅតែមានគម្រោងរៀបការជាមួយនឹង ភិន សុដាលីស ជាគូដណ្តឹងដដែល រីឯរឿងផ្សេងៗទៀតទាល់តែសួរភាគីខាងគូដណ្តឹងរបស់លោក។
គួរបញ្ជាក់ថា ភិន សុដាលីស និងប៉ែន តុលា ជាតារាសម្តែងដូចគ្នា តែគេបានដឹងថា អ្នកទាំងពីរសុទ្ធតែស្ថិតនៅក្នុងគ្រួសារស្តុកស្តម្ភដូចគ្នាដែលមានលោកឪពុកអ្នកម្តាយជាអ្នកជំនួញ។ បើគេក្រឡេកមើលគ្រួសាររបស់ ភិន សុដាលីស ដែលកំពុងរស់នៅក្នុងផ្ទះវីឡាដ៏ស្តុកស្តម្ភនិងមានក្រុមហ៊ុនជាច្រើនកន្លែងនោះ ប្រាកដណាស់ថា តារាសម្តែង ប៉ែន តុលា ត្រូវបោះទុនថ្លៃទឹកដោះមិនតិចម៉ឺនដុល្លារនោះទេទម្រាំតែអាចឆក់យកបានបេះដូងក្រមុំកូនអ្នកមានទ្រព្យនាង ភិន សុដាលីស ។ កន្លងមក ប៉ែន តុលា បានបង្ហើបឲ្យដឹងថា ថ្លៃទឹកដោះរបស់ ភិន សុដាលីស មានចំនួន៤ម៉ឺនដុល្លារសហរដ្ឋអាមេរិក។
នៅពេលនេះ ទស្សនិកជនកំពុងរង់ចាំមើលថា តើស្នេហាពួកគេនឹងមានការប្រែប្រួលបែបណាទៀត ក្រោយជួបព្យុះភ្លៀងមួយប្រាវនេះ?