Tuesday, 06 August 2013
សេត គឹមសឿន
ភ្នំពេញ ប៉ុស្តិ៍
កំពង់ចាមៈ ទើបតែត្រឡប់មកពីអាមេរិកវិញ ហើយក៏ចាប់ដៃគ្នារកស៊ីដោយបើកក្រុមការងាររៀបចំកម្មវិធីផ្សេងៗដោយដាក់ឈ្មោះថា «Star Band» នោះ នៅពេលនេះ កុល ដាវី និង សុខ រក្សា ដែលគេសង្ស័យថា អ្នកទាំងពីរមានពន្លកស្នេហ៍នឹងគ្នានោះ ក៏មានហុងស៊ុយខ្ពស់ភ្លាមតែម្តងដោយពួកគេបានទទួលឱកាសរៀបចំកម្មវិធីនៃការបើកសម្ពោធកាស៊ីណូដ៏ធំមួយនៅត្រពាំងផ្លុង។
តារាសម្តែង និងជាពិធីការិនីនាង កុល ដាវី បានឲ្យដឹងថា ការរៀបចំកម្មវិធីនៅត្រពាំងផ្លុងជាការបើកឆាកលើកដំបូងក្រោយពេលរូបនាង និងសុខ រក្សាបានសម្រេចចិត្តបោះទុនរកស៊ីរួមគ្នានោះ។ កម្មវិធីនោះគឺការបើកសម្ពោធកាស៊ីណូដ៏ធំមួយឈ្មោះថា Diamond Star នៅច្រកព្រំដែនត្រពាំងផ្លុង។
នាងបាននិយាយថា៖«កាស៊ីណូនៅត្រពាំងផ្លុងហ្នឹងគេបានរៀបចំពិធីសម្ពោធដូច្នេះក៏បានជួលក្រុមរបស់ខ្ញុំហ្នឹងទៅរៀបចំការប្រគំតន្ត្រីខ្នាតកណ្តាលមួយនៅទីនោះរយៈពេល៣ថ្ងៃជាប់ៗគ្នាតែម្តងហើយនោះក៏ជាការបើកឆាកសម្រាប់ការរកស៊ីរបស់ខ្ញុំ និងបងរក្សាលើកដំបូងផងដែរ»។
ទោះបីជាការបើកឆាកក្តី តែ កុល ដាវី បានឲ្យដឹងថា ក្រុម Star Band របស់នាងបានទទួលជោគជ័យយ៉ាងខ្លាំង និងបានទទួលកាដូបន្ថែមគ្រប់គ្នាលើប្រាក់ឈ្នួលទៀតផង។ នៅក្នុងកម្មវិធីនោះ កុល ដាវី បានឲ្យដឹងថា ក្រុមStar Band របស់នាងបានទទួលរៀបចំការប្រគំតន្ត្រីថ្នាក់កណ្តាល កម្មវិធីចាប់រង្វាន់ ក្រុមតន្ត្រី និងតារាចម្រៀង។ ក្នុងរយៈពេល៣ថ្ងៃនោះ ពិធីការិនីសិចស៊ីនាង កុល ដាវី បានបញ្ជាក់ថា ការប្រគំតន្ត្រីនោះមានតារាចម្រៀងល្បីៗជាច្រើនដួងបានចូលរួម ដូចជាលោក ឆាយ វីរៈយុទ្ធ អ្នកនាង មាស សុខសោភា ក្រុម Classic កញ្ញា ម៉ាយ៉ាវីន កញ្ញា នី មុនីនាថ និងតារាចម្រៀងជាច្រើនដួងទៀត រួមជាមួយនឹងក្រុមកំប្លែងនាយ ពាក់មី ផងដែរ។
នាងបង្ហើបថា សម្រាប់ការរៀបចំកម្មវិធីនេះ នាងបានទទួលកម្រៃសមរម្យ។
នៅពេលក្លាយខ្លួនជាថៅកែខ្លួនឯង កុល ដាវី និយាយថា៖«ជំហានដំបូងរាងពិបាកបន្តិច តែយ៉ាងណាយើងបានធ្វើដោយជោគជ័យ។ ដូច្នេះយើងសង្ឃឹមថា នៅពេលខាងមុខយើងនឹងអាចទទួលបានការងារកាន់តែច្រើន និងធំៗ»។
តារាលេងដើមទ្រូងរូបនេះបន្តថា៖«សម្រាប់ Star Band យើងមានទទួលរៀបចំការប្រគំតន្ត្រី Mini ពិធីជប់លៀង ខួបកំណើត ពិធីមង្គលការ និងពិធីជាច្រើនទៀត ហើយខ្ញុំ និងក្រុមការងារធានាថា នឹងរៀបចំពិធីទាំងនោះម៉ាពេញចិត្តរបស់ភ្ញៀវតែម្តង»៕