Thursday, 15 August 2013
ឆាយ ច័ន្ទនីដា
ភ្នំពេញ ប៉ុស្តិ៍
ភ្នំពេញៈ មជ្ឈមណ្ឌលសិទ្ធិមនុស្សកម្ពុជា បានសម្តែងការព្រួយបារម្ភទៅលើការនៅតែបន្តរំលោភបំពានលើសិទ្ធិ ដីធ្លី នៅក្រោយការបោះឆ្នោត និងបានដាក់ជាសំណួរថា តើរដ្ឋាភិបាលថ្មីនឹងអនុវត្តតាមការសន្យានូវការដោះស្រាយ រាល់ទំនាស់ទាំងនោះឬយ៉ាងណា?
បើតាមការកត់ត្រារបស់មជ្ឈមណ្ឌលសិទ្ធិមនុស្សកម្ពុជាគ្រាន់តែក្រោយការបោះឆ្នោតថ្ងៃ ២៨ ខែ កក្កដា ភ្លាម មានករណីចំនួន ៤ ផ្សេងគ្នាពាក់ព័ន្ធទៅនឹងការរំលោភយកដីធ្លីពីអ្នកមានអំណាច បុណ្យស័ក្តិ និងមានលុយ ហើយបង្ខំឲ្យពលរដ្ឋរុះរើផ្ទះសម្បែង និងបំផ្លាញដំណាំ និងបោះបង់ចម្ការពួកគេ។
ជាក់ស្តែងអង្គការនេះបានបង្ហាញក្នុង សេចក្តីថ្លែងការណ៍ចុះថ្ងៃទី១៤ ខែ សីហា ថា នៅខេត្ត ឧត្តរមានជ័យ មានការបំផ្លាញទ្រព្យសម្បត្តិដំណាំដំឡូងមីកសិករពីមន្ត្រី យោធាខេត្ត ដោយអះអាងថា ជាដីសម្រាប់ «មូលដ្ឋានយោធា»។ ចំពោះខេត្ត កោះកុង អាជ្ញាធរគ្រោងបណ្តេញប្រជាពលរដ្ឋចេញមិនហួសពីថ្ងៃទី២០ ខែ សីហា បង្ខំឲ្យរុះរើលំនៅឋានដើម្បីយកដីទៅឲ្យក្រុមហ៊ុនឯកជនឈ្មោះ យូញៀន ឌីវេឡុបមិន អភិវឌ្ឍន៍។
រីឯខេត្ត ព្រះវិហារ ប្រជាពលរដ្ឋ ៤០ គ្រួសារបានរងការគំរាមថាឲ្យចេញពីភូមិ និងដកហូតកម្មសិទ្ធិពីពួកគាត់ដែលជា «ទណ្ឌកម្ម» ចំពោះការបោះឆ្នោតឲ្យបក្សប្រឆាំងរបស់ពួកគាត់។
ចំណែកនៅរាជធានីភ្នំពេញ កាលនៅដើមខែ សីហា នេះសន្តិសុខក្រុមហ៊ុន ឃុន សៀ អ៊ិមផត អិចផត បានវាយកម្ទេចសម្ភារលក់បាយរបស់ស្ត្រីម្នាក់ ដោយសារតែគាត់បដិសេធមិនទទួលយកសំណង ១៥ ០០០ ដុល្លារអាមេរិក ពីក្រុមហ៊ុន ដើម្បីឲ្យគ្រួសារគាត់ចាកចេញពីផ្ទះនិង ដី នៅក្នុងសង្កាត់ បឹងកក់ ១ ក្នុងខណ្ឌ ទួលគោក។
ការព្រួយបារម្ភ ខាងលើនេះ ត្រូវបានមជ្ឈមណ្ឌលសិទ្ធិមនុស្សកម្ពុជា អំពាវនាវរដ្ឋាភិបាលបច្ចុប្បន្នឲ្យ «ចាត់វិធានការ ឲ្យមានប្រសិទ្ធភាពទប់ស្កាត់អំពើរំលោភសិទ្ធិពលរដ្ឋ និងយកចិត្តទុកដាក់ក្នុងការរក្សាសន្តិភាព និងប្រកាន់ខ្ជាប់នូវសន្យាទាំងឡាយមុនពេលបោះឆ្នោត ថានឹងធ្វើឲ្យមានភាពប្រសើរឡើងនូវស្ថានភាពសិទ្ធិដីធ្លី»។
លោក លី ស្រ៊ាខេង អាយុ ៦៨ ឆ្នាំ ជាប្តីស្ត្រីលក់បាយត្រូវក្រុមហ៊ុនឯកជន ប្រើកម្មករវាយកម្ទេចរបស់របរ ចានឆ្នាំងលក់បាយគាត់ កាលពីដើមខែនេះនៅភ្នំពេញពីម្សិលមិញបានឲ្យដឹងថា លោករស់នៅទីនេះតាំងពីឆ្នាំ ១៩៨២ និងមានលិខិតស្នាម បង្កាន់ដៃ លិខិតអនុញ្ញាតសាងសង់ចេញដោយអាជ្ញាធរ តែត្រូវបានក្រុមហ៊ុន ដែលអះអាងថាទទួលបានដីសាលាសង្កាត់ ពីរដ្ឋាភិបាលនៅជាប់ដីគាត់ គេចង់រំលោភយកថែម។ លោកថា ក្នុងជម្លោះដីធ្លីនេះ គាត់និងកូនប្រុស ក៏ត្រូវគេវាយធ្វើបាប រហូតដល់របួសក្បាលទៀតផងដែរ។
លោកនិយាយថា៖ «ខ្ញុំមាន ស.ជ.ណ ពីគណៈរដ្ឋមន្ត្រី តាមពិតដីខ្ញុំមិនមានក្នុងប្លង់របស់គេទេ។ ដីយើងនេះស្ថិតក្នុងតំបន់វិនិច្ឆយ ដែលនឹងទទួលប្លង់ពេលក្រោយ។ យើងមិនត្រូវការលុយទេ ខ្ញុំត្រូវការរស់នៅទីនេះបន្ត»។
លោក វណ្ណ សូផាត អ្នកសម្របសម្រួលគម្រោងកំណែទម្រង់ដីធ្លីនៃមជ្ឈមណ្ឌលសិទ្ធិ មនុស្សកម្ពុជាថ្លែងថា អង្គការនេះនឹងផ្តើមរាប់ជាថ្មីក្រោយបោះឆ្នោតនូវជម្លោះដីធ្លី ដែលមានរ៉ាំរ៉ៃ និងបន្តដោះស្រាយថាតើបក្សជាប់ឆ្នោតដឹកនាំរដ្ឋាភិបាលថ្មីនឹងដោះស្រាយវិវាទដីធ្លី នេះប៉ុនណា។ លោកបានបន្តថា៖ «គ្រាន់តែបោះឆ្នោតហើយភ្លាម មានរឿងកើតបន្តបន្ទាប់ នេះហាក់ដូចរដ្ឋាភិបាលមិនចាប់អារម្មណ៍យកចិត្តទុកដាក់ មិនដូចអ្វីដែលសន្យាពេលបោះឆ្នោត។ យើងបារម្ភ ក្រោយរដ្ឋាភិបាលថ្មីបង្កើត អាចមានវិវាទដីធ្លីជាបន្តបន្ទាប់ទៀត តែពួកគេត្រូវជំរុញការដោះស្រាយដោយសន្តិវិធី»។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី មានប្រសាសន៍នៅថ្ងៃម្សិលមិញថា ការធ្វើសេចក្តីថ្លែងការណ៍នេះ ជារឿង «អត់ប្រយោជន៍ទេ គ្រាន់តែបង្កើតរឿងធ្វើឲ្យគេវង្វេងគ្រប់គ្នា» តែពួកគេគួរផ្តល់យោបល់វិញសម្រាប់ធ្វើការដោះស្រាយដើម្បីជាប្រយោជន៍ ពលរដ្ឋ។
លោកថ្លែងថា៖ «ច្បាប់មានស្រាប់យើងត្រូវតែអនុវត្តបន្ត អ្នកណារំលោភគេគឺមានតុលាការ(កាត់ក្តី) ។ ការដោះស្រាយដីធ្លីគឺយើងដោះស្រាយតាមផលប្រយោជន៍មហាជន ទោះឥឡូវនេះរដ្ឋាភិបាលមិនទាន់ធ្វើអ្វីជាគោលការណ៍ធំដុំ តែគោលការណ៍ចាស់នៅតែបន្ត។ អ្នកណាមានអារម្មណ៍ថាខ្លួន ជាជនរងគ្រោះ សូមអញ្ជើញទៅតុលាការ»៕