ថ្ងៃ អង្គារ 10 កញ្ញា 2013
RFI
អង្គការ UNESCO បានទទួលស្គាល់យកសំណុំបែបបទរបស់កម្ពុជាហើយដើម្បីសុំបញ្ចូលប្រភេទកីឡាល្បុក្កតោជាបេតិកភណ្ឌអរូបីអន្តរជាតិ។ អង្គការនេះនឹងបញ្ជូន គណៈប្រតិភូមកពិនិត្យ និងស្រាវជ្រាវបន្ថែម ក្នុងនៅរយៈពេលដ៏ខ្លីខាងមុខ។
ការប្រកួតកីឡាល្បុក្កតោ
សំណុំបែបបទដែលកម្ពុជា បានផ្ញើរទៅកាន់អង្គការ UNESCO កាលពីខែមេសា ឆ្នាំ ២០១៣នេះ គឺ មានលក្ខណៈត្រឹមត្រូវគ្រប់យ៉ាង ហើយ UNESCO នឹងបញ្ជូនប្រតិភូមកស្រាវជ្រាវពីប្រភេទកីឡាល្បុក្កតោក្បាច់គុនខ្មែរដ៏ចំណាស់នេះបន្តទៀត។ នេះបើតាម លោក ហុក ឈាងគីម អគ្គលេខាធិការនៃសហព័ន្ធកីឡាល្បុក្កតោកម្ពុដែលបានប្រាប់វិទ្យុបារាំងនៅថ្ងៃនេះ។
លោក ហុក ឈាងគីម បានឲ្យដឹងថា ពុំមានអ្វីរាំងស្ទះចំពោះដំណើរការស្នើរសុំដាក់កីឡាល្បុក្កតោជាបេតិកភណ្ឌកីឡាអរូបីអន្តរជាតិនោះទេ ប៉ុន្តែកម្ពុជាត្រូវរងចាំការសម្រេចរបស់គណៈកម្មាការបេតិកភណ្ឌ UNESCO នៅក្នុងការប្រជុំលើកទី ៣៨ នៅឆ្នាំ ២០១៤។
កាលពីសប្តាហ៍មុន គណៈកម្មាធិការជាតិអូឡាំពិកកម្ពុជា ក៏បានទៅចូលរួមប្រជុំ ជាមួយសម្ព័ន្ធកីឡាយុទ្ធសីល្ប៍ពិភពលោក និងអង្គការ យូណេស្កូ នៅក្នុងប្រទេសកូរ៉េផងដែរ។
បើតាមការឲ្យដឹងពីលោក វ៉ាត់ ចំរើន អគ្គលេខាធិការគណកម្មាធិការអូឡាំពិកកម្ពុជា គឺកីឡាល្បុក្កតោខ្មែរ មានសង្ឃឹមច្រើន ក្នុងការចូលជាបេតិកភណ្ឌកីឡាអរូបីអន្តរជាតិ។ ក្តីសង្ឃឹមនេះ កើតឡើងក៏ព្រោះតែ កម្ពុជា មានមូលដ្ឋានវប្បធម៌ច្បាស់លាល់ និងមានគ្រឹះក្បាច់គុនចំណាស់ជាងគេ។ មួយវិញទៀត កម្ពុជា ក៏ជាសមាជិករបស់ អង្គការយុទ្ធសីល្ប៍ពិភពលោក ដែលត្រូវចូលរួមសម្រេចក្នុងការជ្រើសតាំងបេតិកណ្ឌកីឡាអរូបីអន្តរជាតិ នៅឆ្នាំ ២០១៤ផងដែរ។
គួរបញ្ជាក់ថា នៅពេលបច្ចប្បន្ន ទាំងគណៈកម្មាការជាតិអូឡាំពិកកម្ពុជា និងសហព័ន្ធកីឡាល្បុក្កតោ កំពុងតែព្យាយាមផ្សព្វផ្សាយពីប្រភេទកីឡានេះ ឲ្យសាយភាយ ពាសពេញពិភពលោក។ ស្របពេលជាមួយគ្នានេះដែរ គេក៏បានព្យាយាមបណ្តុះបណ្តាលកីឡានេះដល់យុវជនកម្ពុជា ឲ្យយល់ដឹងកាន់តែច្រើនឡើងៗផងដែរ៕