Wednesday, 09 October 2013
សេត គឹមសឿន
ភ្នំពេញ ប៉ុស្តិ៍
ភ្នំពេញៈ ភាពជូរចត់អត់ឃ្លាន និងការប្រមាថមើលងាយគឺជាមេរៀន និងបទពិសោធជីវិតដែលជំរុញឲ្យយុវជន កែវ វាសនា ខាំមាត់សង្កត់ចិត្តជម្នះនូវរាល់ឧបសគ្គទាំងឡាយរហូតប្រែក្លាយខ្លួនជាតារាចម្រៀងមានឈ្មោះបោះសំឡេងម្នាក់នាពេលបច្ចុប្បន្នហើយយុវជនដែលធ្លាប់តែផ្ញើខ្លួនស្នាក់អាស្រ័យជាមួយអ្នកដទៃមួយថ្ងៃដើម្បីមួយថ្ងៃរូបនេះ ក៏ស្វែងរកបានទ្រនំសម្រាប់ខ្លួននៅពេលនេះ បន្ទាប់ពីរូបគេទទួលបានជោគជ័យនៅក្នុងវិស័យចម្រៀង ហើយអាចសន្សំប្រាក់ទិញបានផ្ទះមួយកន្លែងនៅក្នុងបុរីពិភពថ្មី។
ទោះយ៉ាងណាភាពល្បាញល្បីរបស់គេនាប៉ុន្មានឆ្នាំចុងក្រោយនេះ ហាក់មិនទាន់ធ្វើឲ្យ កែវ វាសនា ស្កប់ចិត្តនៅឡើយ ខណៈរូបគេចេះតែឃ្វាងឱកាសចេញទៅក្រៅប្រទេសនោះ។ ការព្យាយាមគង់បានសម្រេច ពិតណាស់នៅឆ្នាំ២០១៣នេះ កែវ វាសនា ក៏ឆក់បានឱកាសផ្ទួនៗតែម្តង ពោលគឺរូបគេឆក់បានឱកាសចាកចេញទៅច្រៀងនៅប្រទេសអូស្ត្រាលីកាលពីល្ងាចថ្ងៃទី១៨ ខែកញ្ញា ហើយក្រោយត្រឡប់មកវិញ រូបគេនឹងបានឱកាសចេញទៅសហរដ្ឋអាមេរិកជាបន្ត។
មិត្តភក្តិជិតដិតរបស់ កែវ វាសនា បានឲ្យដឹងថា៖«អាស្នា វាហេងដែរ ក្នុងរដូវភ្លៀងនេះបានទៅច្រៀងរកប្រាក់នៅអូស្ត្រាលី ហើយពេលមកពីអូស្ត្រាលី វិញ វានឹងបន្តទៅអាមេរិកទៀត»។
គួរបញ្ជាក់ថា កែវ វាសនា បានវេចសម្ពាយចេញពីស្រុកកំណើតនៅភូមិឡទឹកត្រី ឃុំកំពង់ឆ្នាំង ស្រុកកំពង់ឆ្នាំង ខេត្តកំពង់ឆ្នាំង កាលពីដើមឆ្នាំ២០០៦ ក្រោយពេលបញ្ចប់ការសិក្សាត្រឹមថ្នាក់ទី១២ ដើម្បីស្វែងរកភាពល្បាញល្បីនៅក្នុងវិថីតារា ក្រោមពាក្យរិះគន់ និងពេបជ្រាយគ្រប់បែបយ៉ាងពីសំណាក់អ្នករស់នៅជុំវិញខ្លួនជាអ្នកភូមិផងរបងជាមួយ។
តារាចម្រៀងវ័យ២៩ឆ្នាំរូបនេះបាននិយាយថា៖«ខ្ញុំបានចេញពីស្រុកកំណើតមកភ្នំពេញនៅដើមឆ្នាំ២០០៦ ពេលនោះ ខ្ញុំបានទទួលការសើចចំអក ពេបជ្រាយជាច្រើន គេថា ទៅខំអីសិល្បៈហ្នឹង ខ្ញុំហ្នឹងជាអ្នកចម្រៀង? គ្មានអនាគតទេ»។
ទទួលរងការមាក់ងាយពេលចេញពីស្រុកកំណើតមិនអស់ចិត្តនៅពេលមកដល់ទីក្រុងយុវជនដែលទើបមានវ័យ២០ឆ្នាំស្តើងរូបនេះ បានទទួលរងការមើលងាយទិតៀនជាបន្តទៀត ក្នុងនាមជាក្មេងអាស្រ័យជីវិតជ្រកក្រោមដំបូលជាមួយគេ។
លោកបានបន្តថា៖«ដើម្បីសម្រេចបំណងជាតារាចម្រៀងនេះ ខ្ញុំបានផ្ញើជីវិតជាច្រើនកន្លែងមិនតិចជាង៤កន្លែងទេ។ បើនិយាយទៅលំបាកហួសពេកហើយ ជីវិតរស់នៅជាមួយគេ មិត្តភក្តិ យើងតែងខ្លាចគេគ្រប់ជំហាន។ និយាយពីស៊ូនោះ អស់ពីស៊ូហើយ បើនិយាយទៅកញ្ជះគេតែម្តង»។
ទម្រាំមានថ្ងៃនេះ វាសនាបន្តថា៖«ខ្ញុំស៊ីឈ្នួលលក់ទឹកអំពៅឲ្យគេ គេមើលងាយ មើលស្រាលយើងណាស់ គេថាឲ្យមុខក្រោយ តែពេលនោះមិនដឹងធ្វើយ៉ាងម៉េចចេះតែទ្រាំទៅហើយមកដល់ពេលនេះ ខ្ញុំក៏អត់ចង់និយាយអាក្រក់ពីអ្នកណាម្នាក់ដែរ ព្រោះវាបានកន្លងហួសបាត់ទៅហើយ»។
ស្របពេលដែលកំពុងផ្ញើជីវិតជាមួយគេវាសនា បានឆ្លៀតដើរជ្រៀតជ្រករកកន្លែងច្រៀង ទីបំផុតវាសនា ក៏មានឱកាសបានសាកសំឡេងនៅផលិតកម្ម SSB ហើយប៉ុន្មានថ្ងៃក្រោយមករូបគេក៏បានដំណឹងថា រូបគេបានក្លាយជាអ្នកចម្រៀងជើងថ្មីនៅក្នុងផលិតកម្មនោះ ហើយតាមរយៈបទ «លែងហ៊ានប្រាថ្នា» ក្មេងលក់ទឹកអំពៅវាសនា ក៏ត្រូវគេស្គាល់ជាតារាចម្រៀងវ័យក្មេងម្នាក់។
បន្ទាប់ពីផលិតកម្មSSB ផ្អាកដំណើរការ រូបគេក៏បន្តចូលច្រៀងនៅផលិតកម្ម M ហើយបច្ចុប្បន្នតារាចម្រៀង កែវ វាសនា កំពុងជ្រកក្រោមដំបូលដ៏ត្រជាក់របស់ផលិតកម្មសាន់ដេ ជាទីដែលគេសាងកេរ្តិ៍ឈ្មោះល្បាញល្បី និងអាចរកប្រាក់ចំណូលបានច្រើនរហូតមានលទ្ធភាពទិញផ្ទះមួយកន្លែងនិងអាចផ្លាស់ប្តូរម៉ាករថយន្តទំនើបជិះយ៉ាងសង្ហា។
តារាចម្រៀងតូចល្អិតរូបនេះបាននិយាយថា៖«ពេលនៅសាន់ដេហ្នឹង ខ្ញុំមានបទល្អៗច្រើន ខ្ញុំក៏ចាប់ផ្តើមរវល់ការងារខ្លាំងទាំងច្រៀងតាមខេត្ត និងក្នុងក្រុងតែហត់ខ្លាំងណាស់»។
ទោះបីជានៅពេលនេះ រូបគេទទួលបានផ្លែផ្កាច្រើនពីសិល្បៈតែកែវ វាសនា បានឲ្យដឹងថា ភាពឃ្លេងឃ្លោងនៅក្នុងអាជីពនេះនឹងជំរុញឲ្យរូបគេចាប់យកនូវមុខរបរថ្មីមួយទៀត គឺជំនួញ។ ទោះជាយ៉ាងណារូបគេសុំមិនបញ្ចេញនូវអ្វីដែលគេចង់ធ្វើនោះឡើយ។
តារារូបនេះនិយាយថា៖«សិល្បៈយើងប្រែប្រួល មិនសូវស្ថិតស្ថេរទេ ដូច្នេះនៅពេលខាងមុខខ្ញុំចង់រកស៊ីច្រើនជាង ហើយឥឡូវកំពុងរៀបចំ តែសុំមិនទាន់និយាយសិន»៕