ដោយ៖ ស៊ុន ណារិន
ថ្ងៃចន្ទ ទី21 ខែតុលា ឆ្នាំ2013
http://vodhotnews.com
ក្រសួងសុខាភិបាល នៅថ្ងៃចន្ទនេះ ប្រកាសយុទ្ធនាការអំពីការណែនាំប្រភេទវ៉ាក់សាំងថ្មី ទៅក្នុងកាលវិភាគផ្តល់ថ្នាំបង្ការ ដើម្បីការពារកុមារពីមេរោគចំនួនពីរប្រភេទ គឺមេរោគកញ្ជ្រិល និងស្អូច នៅក្នុងដូសតែមួយ។
សេចក្តីប្រកាសព័ត៌មានរបស់ក្រសួង ចេញផ្សាយនៅថ្ងៃទី២១ខែតុលា ឲ្យដឹងថា យុទ្ធនាការផ្តល់ថ្នាំបង្ការគឺដើម្បីបង្ការជូនកុមារជាង៤លាននាក់ ដែលមានអាយុចន្លោះពី៩ខែ ទៅ១៥ឆ្នាំ ចាប់ផ្តើមពីថ្ងៃចន្ទ ទី២១ ខែតុលា ឆ្នាំ២០១៣ តទៅ ហើយយុទ្ធនាការនេះ នឹងពង្រីកទៅកាន់គ្រប់ភូមិ ឃុំ និង ស្រុកទាំងអស់ ដោយបែងចែកជាពីរដំណាក់កាល គឺក្នុងខែតុលា វិច្ឆិកា និងខែឆ្នូ។ ប៉ុស្តិ៍ផ្តល់ថ្នាំបង្ការ នឹងត្រូវបានរៀបចំឡើងតាមសាលារៀន ដោយមានការសម្របសម្រួលជិតដិតជាមួយមន្ទីរ និង ក្រសួងសុខាភិបាល និង ក្រសួងអប់រំ។
សេចក្តីប្រកាសព័ត៌មានបន្តថា យុទ្ឋនាការដែលធ្វើឡើងទូទាំប្រទេសនេះ នឹងការពាសមិទ្ធិផលរបស់ ប្រទេសកម្ពុជាក្នុងការលុបបំបាត់ជម្ងឺកញ្ច្រិល ហើយស្របពេលជាមួយគ្នានោះ វាក៏នឹងការពារកុមារពីការឆ្លងជំងឺស្អូចនៅពេលអនាគត ព្រមទាំងផលវិបាកធ្ងន់ធ្ងរនៃសញ្ញាជំងឺស្អូចពីកំណើត។
ក្រសួងសុខាភិបាល ឲ្យដឹងថា ការផ្ទុះនៃជំងឺកញ្ជ្រិល ដែលកើតឡើងរៀងរាល់ពីរ-បីឆ្នាំម្តងក្នុងប្រទេសកម្ពុជា អាចមានផលប៉ះពាល់រយៈពេលវែង សម្រាប់ទារក ដែលកើតមកមានសញ្ញាជំងឺស្អូចពីកំណើត (CRC) ដែលនាំឲ្យទារកពិការភ្នែក ថ្លង់ និង មានជម្ងឺបេះដូង។ អង្គការសុខភាពពិភពលោក (WHO) ធ្វើការប៉ាន់ប្រមាណថា កុមាររហូតដល់ ២៦០នាក់ កើតមកមានសញ្ញាជំងឺស្អូចពីកំណើត រៀងរាល់ឆ្នាំក្នុងប្រទេសកម្ពុជា ដោយចំនួននៃករណីនេះកើនឡើងរហូតដល់ ១,៤០០នាក់ នៅពេលផ្ទុះរាលដាលនៃជំងឺនេះ។ក្នុងឆ្នាំ២០១១ វិទ្យាស្ថានជាតិសុខភាពសាធារណៈ ឲ្យដឹងថា ករណីជំងឺស្អូច មានចំនួន ១.០៩២ករណី។
ក្រសួងសុខាភិបាល បន្តថា បើទោះបីជាករណីជំងឺស្អូចភាគច្រើន ត្រូវបានរកឃើញក្នុងចំណោមកុមារអាយុក្រោម១៥ឆ្នាំក៏ដោយ ប៉ុន្តែមានករណីប្រមាណ ៣៦% កើតឡើងទៅលើស្ត្រីដែលមានអាយុចាប់ពី១៥ឆ្នាំឡើង ដែលអាចឲ្យដឹងថា ស្ត្រីមានផ្ទៃពោះទំនងនឹងឆ្លងជំងឺនេះ ហើយកូនរបស់ពួកគេនឹងកើតមកមានសញ្ញាជំងឺស្អូចពីកំណើត៕
សរសេរមកកាន់ លោក ស៊ុន ណារិន តាមរយៈsun_narin@vodhotnews.com