ដោយ៖ តាំង វីដា
ថ្ងៃពុធ ទី6 ខែវិច្ឆិកា ឆ្នាំ2013
http://vodhotnews.com
លោក សឺហ្គេ ប៉ូលុនស្គី មហាសេដ្ឋីជនជាតិរុស្ស៊ី (Sergei Polonsky) (រូបភាពពី www.forbes.com)
អគ្គស្នងការនគរបាលជាតិអះអាងថា នឹងតាមចាប់ខ្លួនមហាសេដ្ឋីជនជាតិរុស្ស៊ី លោក សឺហ្គេ ប៉ូលុនស្គី (Sergei Polonsky) ដែលគេចមកស្នាក់នៅប្រទេសកម្ពុជា បន្ទាប់ពីបោះបង់ចោលក្រុមហ៊ុនអចលនទ្រព្យ កំពុងជាប់បំណុលនៅក្នុងប្រទេសរុស្ស៊ី។
អ្នកនាំពាក្យអគ្គស្នងការដ្ឋាននគរបាលជាតិ លោក គៀត ច័ន្ទថារិទ្ធ ប្រាប់VOD នៅរសៀលថ្ងៃពុធនេះថា ការសម្រេចតាមចាប់ខ្លួនមហាសេដ្ឋីរុស្ស៊ីនេះ គឺធ្វើឡើងតាមសំណើរបស់រដ្ឋាភិបាលរុស្ស៊ី ហើយអាជ្ញាធរកម្ពុជា បានកំពុងអនុវត្តការងារនេះ ដោយទទួលបានព័ត៌មានថា មហាសេដ្ឋីរូបនោះ កំពុងស្នាក់នៅខេត្តព្រះសីហនុ ប្រទេសកម្ពុជា។ លោក ឲ្យដឹងដែរថា សមត្ថកិច្ចនឹងជូនដំណឹងជាសាធារណៈ បន្ទាប់ពីចាប់មហាសេដ្ឋីរុស្ស៊ីរូបនោះបាន។
លោក ប៉ូលុនស្គី ត្រូវតុលាការរុស្ស៊ីចោទប្រកាន់ថា បានបោះបង់ចោលក្រុមហ៊ុនអចលនទ្រព្យ ដែលកំពុងជាប់បំណុលនៅក្នុងប្រទេសរុស្ស៊ី ហើយបានរត់មកជ្រកកោនលើកោះឯកជនមួយ ក្នុងដែនទឹកកម្ពុជា ក្នុងរយៈពេលប៉ុន្មានខែថ្មីៗនេះ។
កាលពីចុងខែធ្នូ ឆ្នាំ២០១២ លោក សឺហ្គេ ប៉ូលុនស្គី និងមិត្តភ័ក្ត្រពីរនាក់ទៀត ត្រូវបាន អាជ្ញាធរ កម្ពុជាចាប់ខ្លួនដោយរងចោទពីបទប្រើហិង្សាដោយចេតនា និងការឃុំឃាំងមនុស្សខុសច្បាប់លើកម្មករខ្មែរ៦នាក់ ដោយប្រើកាំបិត និងបញ្ជាឲ្យពួកគេលោតចេញពីទូក ក្នុងខេត្តព្រះសីហនុ។ តែក្រោយមក កម្មករខ្មែរទាំង៦នាក់នោះ បានដកពាក្យបណ្តឹងលើករណីនេះ បន្ទាប់ពីបានទទួលសំណងរដ្ឋប្បវេណីចំនួន២ម៉ឺនដុល្លារ។ កម្មករម្នាក់ ទាមទារ៥ពាន់ដុល្លារ តែជនជាតិរុស្ស៊ីរូបនេះ ផ្តល់ឲ្យតែ២ម៉ឺនដុល្លារ សម្រាប់កម្មករទាំង៦នាក់៕
សូមសរសេរមកកាន់ លោក តាំង វីដា តាមរយៈ vida@vodhotnews.com