ថ្ងៃ ពុធ 06 វិច្ឆិកា 2013
ដោយ លាង ដឺលុច
RFI
ឯកអគ្គរដ្ឋទូតសហភាពអឺរ៉ុប និងតំណាងរដ្ឋាភិបាលកម្ពុជាបានចុះហត្ថលេខារួមគ្នានៅព្រឹកថ្ងៃពុធនេះ លើគម្រោងត្រួតពិនិត្យព្រំដែននៅកម្ពុជា ដើម្បីប្រឆាំងនឹងការជួញដូរខុសច្បាប់នូវសារធាតុនុយក្លែអ៊ែរ និងវិទ្យុសកម្ម។ ជាគម្រោងដែលត្រូវគាំទ្រដោយសហភាពអឺរ៉ុប តាមរយៈការផ្តល់នូវគ្រឿងបរិក្ខារស្រាវជ្រាវនូវសាធាតុទាំងនេះ ដែលនឹងត្រូវគេបំពាក់នៅតាមច្រកចេញចូលនៅកំពង់ផែភ្នំពេញ និងនៅអាកាសយានដ្ឋានអន្តរជាតិភ្នំពេញ និងសៀមរាប។
ឯកអគ្គរដ្ឋទូតសហភាពអឺរ៉ុប និងតំណាងរដ្ឋាភិបាលកម្ពុជា ចុះហត្ថលេខារួមគ្នា នៅព្រឹកថ្ងៃទី៦វិច្ឆិកា២០១៣។ @RFI
សហភាពអឺរ៉ុបបានចុះហត្ថលេខាផ្តល់ជំនួយដល់កម្ពុជានៅព្រឹកថ្ងៃពុធនេះ ដើម្បីចូលរួមប្រយុទ្ធប្រឆាំងនឹងការជួញដូរខុសច្បាប់នូវសាធាតុនុយគ្លេអ៊ែរ និងវិទ្យុសកម្មនៅកម្ពុជា។ ការចុះហត្ថលេខាអនុវត្តគម្រោងត្រួតពិនិត្យតាមព្រំដែនប្រឆាំងសារធាតុគីមីគ្រោះថ្នាក់ទាំងនេះ ត្រូវបានធ្វើឡើងដោយឯកអគ្គរដ្ឋទូតសហភាពអឺរ៉ុបប្រចាំកម្ពុជាលោក Jean-Francois CAUTAIN និងលោក ឱម យិនទៀង តំណាងលេខាធិការដ្ឋាននៃគណៈកម្មាធិការជាតិប្រឆាំងនឹងភេរវកម្មរបស់កម្ពុជា។
តាមរយៈគម្រោងជំនួយនេះ សហភាពអឺរ៉ុបនឹងផ្តល់មកអោយកម្ពុជានូវគ្រឿងបរិក្ខាស្រាវជ្រាវវិទ្យុសកម្ម និងប្រព័ន្ធទំនាក់ទំនងប្រកាសអាសន្ន ដែលនឹងត្រូវបំពាក់នៅទីតាំងឆ្លងកាត់ព្រំដែនសំខាន់ៗដូចជា កំពង់ផែទន្លេថ្មីរាជធានីភ្នំពេញ អាកាសយានដ្ឋានអន្តរជាតិភ្នំពេញ និងសៀមរាប។ គ្រឿងបរិក្ខាទាំងនេះ នឹងត្រូវប្រើប្រាស់ដើម្បីស្រាវជ្រាវសម្ភារៈនុយគ្លេអ៊ែរ និងវិទ្យុសកម្ម ក្នុងគោលដៅប្រយុទ្ធប្រឆាំងការជួញដូរខុសច្បាប់ និងការប្រើប្រាស់ដ៏ឧក្រិដ្ឋនូវសារធាតុទាំងនេះ។
ឯកអគ្គរដ្ឋទូតសហភាពអឺរ៉ុប លោក Jean-Francois CAUTAIN បានមានប្រសាសន៍ថា សហភាពអឺរ៉ុប បានប្តេជ្ញាយ៉ាងម៉ឺងម៉ាត់អោយមានពិភពលោកមួយប្រកបដោយសុវត្ថិភាព មានសន្តិសុខ និងស្ថិរភាព។ លោកបន្តថា នេះក៏ជាផ្នែកមួយនៃការអនុវត្តសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិដេលចែងថា ការរីកសាយភាយអាវុធនុយគ្លេអ៊ែរ គីមីសាស្ត្រ វិទ្យុសកម្ម និងជីវសាស្ត្រ និងមធ្យោបាយបញ្ចេញអាវុធទាំងនេះ គឺជាការគំរាមកំហែងដល់សន្តិភាព និងសន្តិសុខអន្តរជាតិ។ តំណាងសហភាពអឺរ៉ុបក៏បានថ្លែងក្តីរីករាយដែលកម្ពុជាបានចូលរួមជាមួយសហភាពអឺរ៉ុបក្នុងកិច្ចការប្រយុទ្ធប្រឆាំងការជួញដូរខុសច្បាប់ និងអំពើឧក្រិដ្ឋ និងភេរវកម្មនៅក្នុងតំបន់អាស៊ីអាគ្នេយ៍ និងតំបន់ផ្សេងទៀត។
គួរបញ្ជាក់ផងដែរថា ដើម្បីអនុវត្តគម្រោងមួយនេះ វគ្គបណ្តុះបណ្តាលជាច្រើនក៏នឹងត្រូវរៀបចំធ្វើឡើងសម្រាប់មន្ត្រីជំនាញមួយចំនួននៃគណៈកម្មាធិការជាតិប្រឆាំងភេរវកម្ម អគ្គនាយកដ្ឋានគយ និងរដ្ឋាករ និងពិសេសមន្ត្រីនៅកំពង់ផែទន្លេថ្មីរាជធានីភ្នំពេញ និងមន្ត្រីអាកាសយានដ្ឋានអន្តរជាតិភ្នំពេញ និងសៀមរាប៕