Thursday, 07 November 2013
មាស សុខជា
ភ្នំពេញ ប៉ុស្តិ៍
ភ្នំពេញៈ មេដឹកនាំគណបក្សប្រឆាំង បានកំណត់ឱសានវាទ សម្រាប់ការចរចា ជាមួយនឹងគណបក្សកាន់អំណាច ដើម្បីដោះស្រាយភាពជាប់គាំងខាងនយោបាយ នៅត្រឹមចុងឆ្នាំនេះ បើមិនដូច្នោះទេ ខ្លួននឹងដឹកនាំការធ្វើមហាបាតុកម្មកាន់តែធំ និងមានរយៈពេលកាន់តែយូរ ហើយនិងឈប់រកដំណោះស្រាយតាមរយៈការចរចាទៀតហើយ។
លោក កឹម សុខា អនុប្រធានគណបក្សសង្គ្រោះជាតិ បានប្រាប់អ្នកយកព័ត៌មាន កាលពីម្សិលមិញថា បន្ទាប់ពីលោក និងលោក សម រង្ស៊ី បានទទួលរបាយការណ៍ ពីក្រុមការងាររបស់ខ្លួនទាក់ទងនឹងការចរចាជាមួយនឹងគណបក្សប្រជាជន ហើយឃើញថា មានការមិនឯកភាពគ្នា គឺដោយសារតែគណបក្សប្រជាជន នៅតែមិនព្រមទទួលយកសំណើរបស់គណបក្សសង្គ្រោះជាតិ សូមឲ្យធ្វើការស៊ើបអង្កេតលើភាពមិនប្រក្រតីក្នុងការបោះឆ្នោត និងមិនយល់ព្រម ចំពោះសំណើ សូមឲ្យសមាជិកទាំង ៩ រូបរបស់គណៈកម្មាធិការជាតិរៀបចំការបោះឆ្នោត លាលែងពីតំណែង។
លោក កឹម សុខា បានបន្ថែមថា៖ «យើងទុកពេលវេលាឲ្យគណបក្សប្រជាជន ចាប់ពីពេលនេះរហូតដល់ចុងឆ្នាំនេះ ប្រសិនបើការ ចរចាមិនឈានដល់ការស្វែងរកការពិតជុំវិញភាពមិនប្រក្រតី ក្នុងការបោះឆ្នោតទេ យើងនឹងមានផែនការថ្មី គឺយើងនឹងជូនដំណឹងដល់សាធារណជនថា យើងឈប់បែរទៅធ្វើការចរចាទៀតហើយ»។
លោក បានគូសបញ្ជាក់ទៀតថា៖ «យើងមិនអាចទុកឲ្យគណបក្សប្រជាជន ពន្យារពេលការចរចានេះ ធ្វើឲ្យប៉ះពាល់ដល់ផលប្រយោជន៍ជាតិ និងផលប្រយោជន៍ប្រជាជនតទៅទៀតទេ។ ខ្ញុំ និងលោក សម រង្ស៊ី បានពិភាក្សាថា យើងត្រូវតែកម្រិតពេលវេលាត្រឹមចុងឆ្នាំនេះយូរបំផុត»។ លោក បានបន្តទៀតថា ការមិនព្រមបង្កើតគណៈកម្មការស៊ើបអង្កេតភាពមិនប្រក្រតីក្នុងការបោះឆ្នោត វាមានន័យថា គណបក្សប្រជាជនខ្លាចការពិត។
នៅមុនការ ចាប់ផ្តើមធ្វើការចរចា កាលពីថ្ងៃអង្គារ ដែលពុំទទួលបានលទ្ធផលអ្វីទាល់តែសោះនោះ គណបក្សសង្គ្រោះជាតិ បានដាក់របៀបវារៈចំនួន ៣ ដើម្បីធ្វើការចរចា គឺការស៊ើបអង្កេតលើភាពមិនប្រក្រតីក្នុងការបោះឆ្នោតការលាលែង ពីតំណែងដោយសមាជិក ៩ រូបនៃ គ.ជ.ប និងការធ្វើកំណែទម្រង់ប្រព័ន្ធបោះឆ្នោត ទៅតាមអនុសាសន៍របស់អង្គការសហប្រជាជាតិ និងអង្គការឃ្លាំមើលការបោះឆ្នោត។
ទោះជាយ៉ាងណា លោក ព្រុំ សុខា រដ្ឋលេខាធិការនៃក្រសួង មហាផ្ទៃ ដែលជាប្រធានក្រុមការងារចរចារបស់គណបក្សប្រជាជន បានថ្លែងកាលពីម្សិលមិញថា ការចរចាលើការស៊ើបអង្កេតភាពមិនប្រក្រតីនៃការបោះឆ្នោត និងសំណើសុំឲ្យមេដឹកនាំ គ.ជ.ប លាលែង គឺជាចំណុចពិបាក សម្រាប់គណបក្សប្រជាជនទទួលយកដោយលោកសង្កត់ធ្ងន់ថា ភាពមិនប្រក្រតីនៃការបោះឆ្នោត ត្រូវបានដោះស្រាយរួចហើយដោយ គ.ជ.ប និងក្រុមប្រឹក្សាធម្មនុញ្ញ ពេលគណបក្សសង្គ្រោះជាតិ បានដាក់ពាក្យបណ្តឹង។
លោក ព្រុំ សុខា បញ្ជាក់ថា៖ «ដូច្នេះ ប្រសិនបើលើកឡើងពេលនេះ ប្រហែលវាជំរុញដោយកត្តានយោបាយជាជាងកត្តាច្បាប់។ គ្មានអ្នកណាម្នាក់អាចបង្ខំឲ្យ គ.ជ.ប លាលែងទេ ព្រោះស្ថាប័ននេះ ជាស្ថាប័នឯករាជ្យ បង្កើតដោយច្បាប់»។
លោកបានបន្ថែមថា ដរាបណា មេដឹកនាំ គ.ជ.ប មិនលាលែងដោយខ្លួនឯង ឬមិនមានជំងឺ គ្មានគណបក្សណាមួយអាចស្នើសុំឲ្យពួកគេលាលែងបានទេ។ លោក ព្រុំ សុខា បានបញ្ជាក់ជាថ្មីថា គណបក្សប្រជាជនឯកភាព ចំពោះការធ្វើកំណែទម្រង់ប្រព័ន្ធបោះឆ្នោត អនុលោមតាមកិច្ចព្រមព្រៀងរវាងភាគីទាំងពីរ ដែលបានជួបប្រជុំនៅថ្ងៃ ទី១៦ ខែ កញ្ញា។
ទាក់ទងនឹងការគំរាមរបស់ លោក កឹម សុខា ក្នុងការធ្វើមហាបាតុកម្មជាថ្មីទៀត ព្រមទាំងឱសានវាទសម្រាប់ការចរចា លោក ព្រុំ សុខា បានថ្លែងថា វាជាសិទិ្ធរបស់គណបក្សសង្គ្រោះជាតិ ប៉ុន្តែគណបក្សសង្គ្រោះជាតិត្រូវតែធ្វើក្រោមក្របខណ្ឌច្បាប់។ លោកបានបន្តថា អ្វីដែលលោក កឹម សុខា បានលើកឡើង វាជាលក្ខខណ្ឌចំពោះគណបក្សប្រជាជន ប៉ុន្តែ លោក កឹម សុខា បានសង្កត់ធ្ងន់រួចហើយថា អ្វីដែលខ្លួនលើកឡើងមិនមែនជាលក្ខខណ្ឌទេ ប៉ុន្តែជារបៀបវារៈសម្រាប់ការចរចា។
ចំណែកឯ លោក អ៊ូ វីរៈ ប្រធានមជ្ឈមណ្ឌលសិទិ្ធមនុស្សកម្ពុជា បានទទួលស្គាល់ថា ឱសានវាទរបស់គណបក្សសង្គ្រោះជាតិរយៈពេលជាង ១ ខែសម្រាប់ការចរចាជាមួយនឹងគណបក្សប្រជាជនកម្ពុជា វាជាពេលវេលាគ្រប់គ្រាន់សម្រាប់ធ្វើការចរចា ប៉ុន្តែលោកចង់ឲ្យគណបក្សជាប់ឆ្នោតទាំងពីររក្សាភាពអត់ធ្មត់បន្តធ្វើការចរចា បើទោះបីជាគណបក្សសង្គ្រោះជាតិធ្វើបាតុកម្មក៏ដោយ៕ TK