Friday, 08 November 2013
លាង ផាន់ណារ៉ា
ភ្នំពេញ ប៉ុស្តិ៍
ភ្នំពេញៈ សេចក្តីព្រាងច្បាប់ ស្តីពីម៉ាកសម្គាល់ភូមិសាស្ត្រទំនិញ ដែលជាច្បាប់មួយក្នុងចំណោមច្បាប់ចំនួន ១៤ ដែលកម្ពុជាត្រូវរៀបចំដើម្បីឲ្យស្របតាមក្របខណ្ឌច្បាប់នៃអង្គការពាណិជ្ជកម្មពិភពលោក ត្រូវបានអនុម័តនៅក្នុងអង្គប្រជុំគណៈរដ្ឋមន្ត្រី នៅថ្ងៃសុក្រនេះ។
សេចក្តីព្រាងច្បាប់ស្តីពីម៉ាកសម្គាល់ភូមិសាស្ត្រទំនិញ ដែលមាន ១៧ ជំពូក និង៤១មាត្រា មានគោលបំណងការពារកម្មសិទ្ធិបញ្ញារបស់ផលិតករ ប្រតិបត្តិករ និងការពារអ្នកប្រើប្រាស់ផលិតផលដែលពាក់ម៉ាកសម្គាល់ភូមិសាស្ត្រ ទំនិញ ព្រមទាំងរក្សាអត្តសញ្ញាណជាតិ និងពង្រឹងចំណេះដឹង ចំណេះធ្វើតាមបែបប្រពៃណី និងរួមចំណែកកាត់បន្ថយភាពក្រីក្រ។
សេចក្តីព្រាងច្បាប់នេះក្រោយពីការអនុម័តយល់របស់ស្ថាប័ននីតិប្បញ្ញត្តិ មានវិសាលភាពអនុវត្តលើការចុះបញ្ជី និងកិច្ចការពារម៉ាកសម្គាល់ភូមិសាស្ត្រទំនិញក្នុងព្រះរាជាណាចក្រ កម្ពុជា ចំពោះទំនិញកសិផល ទំនិញកសិចំណីអាហារ ទំនិញសិប្បកម្ម ឬទំនិញផ្សេងៗទៀតដែលផលិតក្នុងតំបន់ភូមិសាស្ត្រឬកែច្នៃស្របតាមបទ ប្បញ្ញត្តិនៃច្បាប់នេះ។
អង្គប្រជុំគណៈរដ្ឋមន្ត្រីក៏បាន សម្រេចលើសេចក្តីព្រាងកម្មវិធីវិនិយោគសាធារណៈ ៣ឆ្នាំរំកិល (ឆ្នាំ ២០១៤-២០១៦) ក្នុងគោលបំណងបង្ហាញពី គម្រោងវិនិយោគសាធារណៈជាអាទិភាពខ្ពស់របស់ក្រសួង ស្ថាប័នដូចមានចែងនៅក្នុងយុទ្ធសាស្ត្រចតុកោណដំណាក់កាលទី២ និងជាផែនទីចង្អុលផ្លូវសម្រាប់គោលនយោបាយដែលមានចែងក្នុងផែនការ យុទ្ធសាស្ត្រអភិវឌ្ឍន៍ជាតិ (ផ.យ.អ.ជ) បច្ចុប្បន្នកម្ម ២០០៩ ២០១៣។
កម្មវិធីវិនិយោគសាធារណៈ (កវស) បីឆ្នាំរំកិល ២០១៤-២០១៦ មានតម្លៃសរុបប្រចាំប្រមាណ ១៦៣៨ លានដុល្លារអាមេរិក ត្រូវបានរៀបចំឡើង ដោយក្រសួងផែនការ និង ដោយមានការចូលរួមពីគ្រប់ក្រសួងស្ថាប័នពាក់ព័ន្ធ ដោយផ្អែកលើតម្រូវការចំណាយសរុបសម្រាប់ការអនុវត្តផែនការយុទ្ធសាស្ត្រ អភិវឌ្ឍន៍ជាតិ (ផយអជ) អាណត្តិថ្មី ២០១៤ ២០១៨ ដើម្បីឲ្យបានស្របតាមស្ថានភាពជាក់ស្តែងនៃការប្រែប្រួលថ្លៃទំនិញ និងអតិផរណា ហើយក៏ផ្អែកលើបរិមាណហិរញ្ញប្បទានសហប្រតិបត្តិការ ដែលដៃគូអភិវឌ្ឍ បានសន្យានៅក្នុងវេទិការសហប្រតិបត្តិការអភិវឌ្ឍន៍កម្ពុជា (វសអក) កន្លងទៅផងដែរ។
ក្នុងចំនួនគម្រោងសរុប៤៤៣ នៃ កវស បីឆ្នាំរំកិល ២០១៤ ២០១៦ នេះ មាន ១៨០ គម្រោងកំពុងដំណើរការ ដែលត្រូវការទុនចំនួន ២.៩៨៧ លានដុល្លារអាមេរិក និង២៦៣គម្រោង ជាគម្រោងសម្រាប់អនុវត្ត ផយអជ ត្រូវការទុនចំនួន ១.៩២៧ លានដុល្លារអាមេរិក។