ដោយ៖ តាំង វីដា និង អ៊ឹង ប៊ុនថន
ថ្ងៃសុក្រ ទី8 ខែវិច្ឆិកា ឆ្នាំ2013
http://vodhotnews.com
ស្តាប់សំឡេង៖ |
ចម្លងទុក |
ប្រមុខរដ្ឋាភិបាលកម្ពុជា នៅថ្ងៃសុក្រនេះ អំពាវនាវឲ្យគ្រឹះស្ថានធនាគារ គ្រឹះ ស្ថានមីក្រូហិរញ្ញវត្ថុ និងប្រតិបត្តិករមីក្រូហិរញ្ញវត្ថុ អនុគ្រោះដល់កូនបំណុលដែលរងគ្រោះដោយសារគ្រោះធម្មជាតិ នៅឆ្នាំ២០១៣នេះ។
ក្នុងកិច្ចប្រជុំគណៈរដ្ឋមន្ត្រី នៅថ្ងៃទី៨ ខែវិច្ឆិកានេះ លោកនាយករដ្ឋមន្ត្រី ហ៊ុន សែន ថ្លែងថា បើទោះបីជាប្រជាពលរដ្ឋមួយភាគធំ បានទទួលនូវជំនួយសង្គ្រោះបន្ទាន់ជាបន្តបន្ទាប់ក្តី តែប្រជាពលរដ្ឋមួយចំនួនទៀត គឺរងការខូចខាតទាំងស្រុងតែម្តង ដែលទាមទារការយកចិត្តទុកដាក់ និងជួយទំនុកបម្រុងស្ទើរមួយឆ្នាំ ដើម្បីឲ្យពួកគេអាចមានលទ្ធផល បង្កបង្កើនផលនៅឆ្នាំក្រោយ។
លោកនាយករដ្ឋមន្ត្រី ហ៊ុន សែន ក៏បានអំពាវនាវដល់គ្រឹះស្ថានធនាគារ គ្រឹះស្ថានមីក្រូហិរញ្ញវត្ថុ និងប្រតិបត្តិករមីក្រូហិរញ្ញវត្ថុ យោគយល់ដល់កូនបំណុល ដោយមិនបង្ខំពួកគាត់លក់ ឬរឹបអូសផ្ទះសម្បែង ដីធ្លី ដែលជាទ្រព្យបញ្ចាំធានាឥណទាន ពិនិត្យលទ្ធភាពពន្យាពេលសងឥណទានដោយមិនផាកពិន័យ ឬយកការប្រាក់ទាប និងពិចារណាផ្ដល់ឥណទានបន្ថែម ជាមួយការប្រាក់ទាប ដើម្បីជួយសម្រួលដល់ប្រជាពលរដ្ឋរងគ្រោះដោយទឹកជំនន់ ៖ “បើចង់ឲ្យគាត់មានលទ្ធភាព សងយើងមកវិញ វិធីមួយក្នុងចំណោមវិធីដែលជួយដោះស្រាយឲ្យគាត់ គឺពិនិត្យលទ្ធភាពទៅតាមលក្ខណៈគ្រួសារ នីមួយៗដែលផ្ដល់ឥទានបន្ថែមឲ្យពួក ដើម្បីឲ្យពួកគាត់មានលទ្ធភាពយកឥទាននោះ ឥទានដែលផ្ដល់ថ្មី ហើយមានអត្រាការប្រាក់ទាបដើម្បីឲ្យគាត់អាចយកទៅស្ដានៅអាជីវកម្មរបស់ពួកគាត់ឡើងវិញ ” ។
លោកបញ្ជាក់ថា ការអំពាវនាវធ្វើឡើងចំពោះប្រជាពលរដ្ឋដែលរងគ្រោះដោយទឹកជំនន់ និងប្រកបរបរសុច្ចរិតតែប៉ុណ្ណោះ ជៀសវាងចំពោះអ្នកដែលខ្ចីប្រាក់ ទៅចាញ់ល្បែង ហើយក្លែងខ្លួនជាជនរងគ្រោះ។
វិធានការរបស់រដ្ឋាភិបាលនេះ ធ្វើឡើងបន្ទាប់ពីគណបក្សសង្គ្រោះជាតិ បានអំពាវនាវដូចគ្នាដែរ។
បេក្ខភាពជាប់ឆ្នោត តំណាងរាស្ត្រគណបក្សសង្គ្រោះជាតិ លោកស្រី មូរ សុខហួរ ចាត់ទុកថា នេះជាជំហរដូចគ្នា ក្នុងការជួយប្រជាពលរដ្ឋរបស់គណបក្សសង្គ្រោះជាតិ និងគណបក្សប្រជាជនកម្ពុជា។ តែលោកស្រីថា ដើម្បីដោះស្រាយគ្រោះទឹកជំនន់នៅឆ្នាំខាងមុខៗទៀត គឺរដ្ឋាភិបាល គប្បីមានឆន្ទៈបំបាត់ ឫសគល់នៃបញ្ហាដែលកើតចេញពីការកាប់បំផ្លាញព្រៃឈើខុសច្បាប់ និងអំពើពុករលួយនៃការមិនបង្ហាញតម្លាភាព ថវិកាជាតិ សម្រាប់ជួយដល់ជនរងគ្រោះប្រចាំឆ្នាំ ៖ “គណបក្សសង្គ្រោះជាតិដឹងច្បាស់ណាស់ថា ថវិកាជាតិមានដើម្បីជួយប្រជាពលរដ្ឋនៅពេលរងគ្រោះ ដោយសារទឹកជំនន់ ឫការរាំងស្ងួត ពីព្រោះថវិកាជាតិនេះ ជាថវិកាដែលត្រូវតែទុកសម្រាប់បញ្ហារបស់ជាតិ ដូច្នេះហើយបានជាយើងនិយាយអំពីផលប៉ះពាល់នៃអំពើពុករលួយ ពេលណាពុករលួយហើយ គឺថវិកាជាតិបាត់ហើយ”។
កាលពីថ្ងៃម្សិលមិញនេះ គណបក្សសង្គ្រោះជាតិ ក៏បានអំពាវនាវដល់គ្រឹះស្ថានមីក្រូហិរញ្ញវត្ថុនៅកម្ពុជា សុំផ្អាកការទារបំណុលពីប្រជាពលរដ្ឋ ដែលរងគ្រោះដោយទឹកជំនន់ និងបញ្ចុះតម្លៃការប្រាក់១%ក្នុង១ឆ្នាំ និងបញ្ឈប់ការរឹបអូសទ្រព្យសម្បត្តិ ពីប្រជាជនដែលរងផលប៉ះពាល់ដោយសារទឹកជំនន់ នៅឆ្នាំ២០១៣នេះ។
អ្នកវិភាគសេដ្ឋកិច្ច លោក ចាន់ សុផល យល់ថា ការអំពាវនាវទាំងនេះ គឺជារឿងល្អមួយ ដែលអាចរួមចំណែកជួយដល់ជនរងគ្រោះ រួចផុតពីការចាប់បង្ខំសងបំណុល។ លោកថា ការធ្វើបែបនេះ គឺអាចធ្វើឲ្យម្ចាស់គ្រឹះស្ថានធនាគារ និងមីក្រូហិរញ្ញវត្ថុនានា រងនូវហានិភ័យច្រើន ឬតិចតួច អាស្រ័យលើកម្រិត និងទំហំនៃសេវាកម្មរបស់គ្រឹះស្ថាននីមួយៗ ៖ “ការប្រកបមុខរបររបស់ពួកគេ ជួបបញ្ហាខ្លាំងរបៀបណាយើងពិបាកនិយាយ អាស្រ័យទៅលើស្ថាប័នមីក្រូហិរញ្ញវត្ថុនីមួយ បើសិនជាមានភាគរយខ្ពស់ដែលប្រាក់កម្ចីនោះត្រូវបានខូចខាត ដោយសារទឹកជំនន់ គឺអាចប៉ះពាល់ធ្ងន់ជាង ស្ថាប័នមីក្រូហិរញ្ញវត្ថុរបៀបនោះ”។
គណៈកម្មាធិការជាតិគ្រប់គ្រងគ្រោះមហន្តរាយ ឲ្យដឹងថា យ៉ាងតិចមនុស្ស១៦៨នាក់ស្លាប់ដោយសារទឹកជំនន់ ខណៈប្រជាជនជិត២លាននាក់ (១.៨៨០.០០០នាក់) រងផលប៉ះពាល់ លិចផ្ទៃដីកសិកម្មចំនួន ៣សែន៥ម៉ឺនហិកតា ខូចស្រូវអស់១សែនហិកតា និងធ្វើខូចខាតហេដ្ឋារចនាសម្ព័ន្ធ គិតជាទឹកប្រាក់ជិត១ពាន់លានដុល្លារអាមេរិក៕
សូមសរសរមកកាន់ លោក តាំង វីដា តាមរយៈ vida@vodhotnews.com