ដោយ៖ កែវ រតនៈ និង អ៊ឹង ប៊ុនថន
ថ្ងៃសុក្រ ទី8 ខែវិច្ឆិកា ឆ្នាំ2013
http://vodhotnews.com
សង្គមស៊ីវិលនៅថ្ងៃសុក្រនេះ ជំរុញឲ្យប្រជាកសិករចេះបន្សុទ្ធពូជដំណាំ និងបន្ស៉ាំទៅនឹងអាកាសធាតុដែលចេះតែប្រែប្រួល ខណៈដែលប្រទេសកម្ពុជា ជួបប្រទះទឹកជំនន់ និងខ្យល់ព្យុះ។
អនុសាសន៍នេះ ត្រូវបានលើកឡើង ក្នុងសិក្ខាសាលាពិគ្រោះយោបល់ថ្នាក់ជាតិស្តីពី ការអភិរក្ស និងការប្រើប្រាស់ពូជស្រូវប្រកបដោយ និរន្តរភាពបន្ស៊ាំនឹងការប្រែប្រួលអាកាសធាតុ ដើម្បីធានាសន្តិសុខស្បៀងនៅកម្ពុជា នៅសណ្ឋាគារ អ៊ឹមភឺរៀល។
នាយកប្រតិបត្តិរងនៃវេទិកានៃអង្គការមិនមែនរដ្ឋាភិបាលស្តីពីកម្ពុជា លោក តឹក វណ្ណារ៉ា មានថា ក្នុងរយៈពេល៥ឆ្នាំចុងក្រោយនេះ ការប្រែប្រួលអាកាសធាតុ និងគ្រោះធម្មជាតិបានធ្វើឲ្យប៉ះពាល់ដល់ប្រជាកសិករយ៉ាងធ្ងន់ធ្ងរ។ លោកជំរុញឲ្យកសិករចេះបន្ស៉ាំនឹងអាកាសធាតុ និងចេះបន្សុទ្ធពូជដំណាំ ដើម្បីឲ្យមានផលចំណេញដើម្បីទប់ទល់នឹងការប្រែប្រួលអាកាសធាតុនេះ ៖
សមាជិកនៃក្រុមប្រឹក្សាស្តារអភិវឌ្ឍន៍វិស័យកសិកម្មនិងជនបទ នៃទីស្តីការគណៈរដ្ឋមន្ត្រី លោក រ័ត្ន វិរៈ មានប្រសាសន៍ថា ការប្រែប្រួលអាកាសធាតុ គឺជាបញ្ហាមួយដែលកំពុងប្រឈម និងបានជះឥទ្ធិពលដល់ការរស់នៅរបស់កសិករកម្ពុជា ជាពិសេសប្រជាកសិករខ្នាតតូច។ លោកបន្តថា បើទោះជាបើទោះជាប៉ុន្មានឆ្នាំចុងក្រោយនេះ ប្រទេសកម្ពុជា ផលិតស្រូវលើសពីកម្រិតមធ្យម ប្រមាណជាងបីលានតោនក្នុងមួយឆ្នាំក្តី ប៉ុន្តែប្រជាពលរដ្ឋនៅតែជួបប្រទះបញ្ហាខ្វះស្បៀងនៅឡើយ ៖
ទឹកជំនន់នៅឆ្នាំ ២០១៣ បានជន់លិច ២០រាជធានី-ខេត្ត ក្នុងប្រទេសកម្ពុជា ហើយបានសម្លាប់ប្រជាពលរដ្ឋ ជាង ១០០នាក់ ប៉ះពាល់ប្រជាពលរដ្ឋ ១,៥លាននាក់ ប៉ះពាក់ផលដំណាំ ប្រមាណ២ សែន ២៥ម៉ឺនហិកតា៕
សរសេរមកកាន់លោក កែវ រតនៈ តាមរយៈ ratanah@vodhotnews.com