ថ្ងៃ សុក្រ 08 វិច្ឆិកា 2013
ដោយ ស៊ុន មេសា
RFI
ប្រមុខរដ្ឋាភិបាលកម្ពុជា លោកនាយករដ្ឋមន្ត្រីហ៊ុន សែន បានជំរុញឱ្យក្រសួងព័តមានដែលជាក្រសួងសមី ដឹកនាំកិច្ចពិភាក្សាជាមួយដៃគូរពាក់ព័ន្ធដើម្បីអាចឈានទៅរកការតាក់តែងសេចក្តីព្រាងច្បាប់ស្តីពីសិទ្ធទទូលបានព័ត៌មាននាពេលខាងមុខ។ សង្គមស៊ីវិល បានអបអរសាទរចំពោះការជំរុញឱ្យមានច្បាប់នេះ ប៉ុន្តែបានសំណូមពរឱ្យរដ្ឋាភិបាលគួរតែយកយោបល់របស់អង្គការសង្គមស៊ីវិលទៅដាក់ក្នុងសេចក្តីព្រាងច្បាប់នោះដើម្បីធានាឱ្យបាននូវផលប្រយោជន៍ដល់ប្រជាពលរដ្ឋពិតប្រាកដ។
អ្នកកាសែតខ្មែរធ្ចើ (©សុវណ្ណារ៉ា)
ច្បាប់សិទ្ធទទួលបានព័ត៌មានដែលគេទន្ទឹងរងចាំជាច្រើនឆ្នាំមកហើយនោះ ទំនងជាអាចលេចចេញជារូបរាងហើយ បន្ទាប់ពីប្រមុខរដ្ឋាភិបាលកម្ពុជាអាណត្តិទី៥នេះ បានប្រគល់ភារកិច្ចរៀបចំតាក់តែងសេចក្តីព្រាងច្បាប់ទៅឱ្យក្រសួងព័ត៌មាន។ ថ្លែងក្នុងកិច្ចប្រជុំគណៈរដ្ឋមន្ត្រីនៅថ្ងៃទី៨ វិច្ឆិកានេះ លោកនាយករដ្ឋមន្ត្រីហ៊ុន សែន បានសម្រេចប្រគល់ភារកិច្ចឱ្យក្រសួងព័ត៌មានជាអ្នករៀបចំដាក់តែងសេចក្តីច្បាប់នេះ ដោយពិភាក្សានិងពិគ្រោះយោបល់ជាមួយ អ្នកសារព័ត៌មាន អង្គការសង្គមស៊ីវិល រួមទាំងដៃគូរពាក់ព័ន្ធទាំងអស់។
ប្រធានក្លឹបអ្នកកាសែតកម្ពុជា លោក ប៉ែន សមិទ្ធិ បានស្វាគមន៍ចំពោះសេចក្តី ព្រាងច្បាប់ស្តីពីសិទ្ធទទួលបានព័ត៌មាននេះព្រោះទាំងអង្គការសង្គមស៊ីវិល និងអ្នកសារព័ត៌មាននោះបានខិតខំប្រឹងប្រែងឱ្យរដ្ឋាភិបាលគិតគូរពីច្បាប់ដ៏ចម្រូងចម្រាស់នេះផងដែរ។ ប្រធានក្លឹបអ្នកកាសែតរូបនេះ បានលើកឡើងថា ពីសារសំខាន់ នៃច្បាប់នេះថា គឺមិនត្រឹមតែផ្តល់សារៈសំខាន់សម្រាប់អ្នកសារព័ត៌មានប៉ុណ្ណោះទេ ប៉ុន្តែវានឹងផ្តល់ផលប្រយោជន៍ដល់ពលរដ្ឋជាទូទៅផងដែរ។
ប្រធានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ លោក ប៉ាងួនទៀង វិញ បានលើកឡើងច្បាប់នេះ នឹងមានសារប្រយោជន៍ពិតដល់ពលរដ្ឋជាទូទៅ និងសង្គមទាំងមូលប្រសិន រដ្ឋាភិបាលទទួលយកអនុសាសន៍របស់អ្នកសារព័ត៌មាន និងអង្គការសង្គមស៊ីវិលពិតប្រាកដមែននោះ។ ហើយលោកថា ដើម្បីឱ្យច្បាប់នេះមានលក្ខណៈជាបទដ្ឋានជាអន្តរជាតិនោះ អង្គការសង្គមស៊ីវិលស្នើឱ្យរដ្ឋាភិបាលបើកឱ្យមានការពិភាក្សាយ៉ាងទូលំទូលាយ ហើយខ្លឹមសារនៃច្បាប់នោះទៀតសោត គឺមិនមែនការពារចំពោះមន្ត្រីរដ្ឋាភិបាលណាដែលមិនព្រមផ្តល់ព័ត៌មានដល់សាធារណនោះទេ។ ពោលគឺច្បាប់ស្តីពីសិទ្ធទទូលបានព័ត៌មាននេះត្រូវតែបង្ខំមន្ត្រីព័ត៌មានរបស់រដ្ឋាភិបាលឆ្លើយតបចំពោះសារធារណជន និងអ្នកសារព័ត៌មាន។
យ៉ាងណាក៏ដោយ លោក ប៉ែន សមិទ្ធី ប្រធានខ្លឹបអ្នកកាសែតកម្ពុជា បានសង្កត់ធ្ងន់ថា ច្បាប់ស្តីពីសិទ្ធទទួលបានព័ត៌មានអាចបម្រើផលប្រយោជន៍ដល់ពលរដ្ឋនោះ គឺមិនត្រឹមតែការបង្តើតច្បាប់ឱ្យលេចជារូបរាងប៉ុណ្ណោះទេ។ ប៉ុន្តែកង្វះខាតឯកសារជាអេឡិចត្រូនិច គឺជាកត្តាសំខាន់បំផុត៕
