ដោយ៖ ថុល ស្រីលក្ខណ៍
ថ្ងៃអាទិត្យ ទី17 ខែវិច្ឆិកា ឆ្នាំ2013
http://vodhotnews.com
អ្នកភូមិឡពាង៥២គ្រួសារ នៅឃុំតាជេស ស្រុកកំពង់ត្រឡាច ខេត្តកំពង់ឆ្នាំង គ្រោងនាំគ្នាមកតវ៉ានៅក្រសួងយុតិ្តធម៌ និងសាលាឧទ្ធរណ៍ ជាថ្មីទៀតនៅថ្ងៃពុធសប្តាហ៍នេះ ទាមទារឲ្យដោះលែងតំណាងរបស់ពួកគេ ដែលតុលាការឃុំខ្លួនរយៈពេល៦ឆ្នាំឲ្យមានសេរីភាពឡើងវិញ។
ការគ្រោងឡើងមកតវ៉ារបស់ប្រជាជននៅពេលនេះ ធ្វើឡើងបន្ទាប់ពី តំណាងរបស់គាត់ លោក ស សុង ត្រូវបានតុលាការផ្តន្ទាទោសដាក់ពន្ធនាគារចំនួន៦ឆ្នាំ តាំងពីឆ្នាំ២០០៧ ហើយត្រូវដោះលែងវិញនៅថ្ងៃទី២២ខែវិច្ឆិកាខាងមុខនេះ តែមន្ត្រីពន្ធនាគារប្រាប់ថា តំណាងរូបនោះត្រូវបន្តឃុំខ្លួនរយៈពេល១៨ខែបន្ថែមទៀត។
ប្រពន្ធលោក ស សុង អ្នកស្រី ឈិត ខន វ័យ ៥៥ឆ្នាំ ប្រាប់VOD នៅព្រឹកថ្ងៃអាទិត្យនេះថា ប្តីរបស់គាត់បានអនុវត្តទោសគ្រប់៦ឆ្នាំ តាមការសម្រេចរបស់សាលាឧទ្ធរណ៍រួចហើយ មិនគួរបន្តឃុំខ្លួនគាត់ ១៨ខែទៀតនោះទេ។
អ្នកស្រី អ៊ុំ សុភី អះអាងជាតំណាងអ្នកភូមិឡពាង បានឲ្យVOD ដឹងនៅថ្ងៃនេះដែរថា អ្នកភូមិឡពាងទាំងអស់ គ្រោងនាំគ្នាទៅតវ៉ានៅមុខក្រសួងយុតិ្តធម៌ និងសាលាឧទ្ធរណ៍ ឲ្យដោះលែង លោក ស សុង ឲ្យមានសេរីភាពឡើងវិញ នៅថ្ងៃពុធ ទី២០ ខែវិច្ឆិកា ខាងមុខនេះ។ អ្នកស្រីថា តំណាងរបស់ពួក គាត់មិនបានប្រព្រឹត្ត ដូចការ ចោទ កាន់នោះទេ គឺគ្រាន់តែចេញមុខការពារដីធ្លីនៅក្នុងភូមិតែប៉ុណ្ណោះ តែតុលាការបែរជាផ្តន្ទាទោសដោយអយុតិ្តធម៌ទៅវិញ។
នៅថ្ងៃនេះVOD មិនអាចសុំការអធិប្បាយពីមន្ត្រីសាលាឧទ្ធរណ៍ និង លោក សំ ប្រជាមានិត អគ្គនាយករងរដ្ឋបាលនៃក្រសួងយុតិ្តធម៌ បាននៅឡើយទេ។
តំណាងអ្នកភូមិឡពាង លោក ស សុង ត្រូវបានតុលាកាខេត្តកំពង់ឆ្នាំង ផ្តន្ទាទោសដាក់ពន្ធនាគាររយៈពេលជាង១១ឆ្នាំ និងពិន័យជាប្រាក់ ៥លានរៀល ពីបទប៉ុនប៉ងមនុស្សឃាត និងរំលោភយកដីកម្មសិទ្ធិឯកជន តែក្រោយមកសាលាឧទរណ៍បើកសវនាការឡើងវិញ ដោយបន្ថយទោសត្រឹម៦ឆ្នាំ និងពិន័យជាប្រាក់១លានរៀល។
សង្គមស៊ីវិលលើកឡើងថា និទណ្ឌភាពនៅកម្ពុជានៅតែកើតមាន ដោយសារសកម្មជនដីធ្លី ត្រូវបានតុលាកាផ្ទន្ទាទោសដាក់ពន្ធនាគា ដោយឡែកករណីលោក ឈូក បណ្ឌិត ដែលបាញ់កម្មការនី៣នាក់ឲ្យរងរបួសនៅក្រុងបាវិត ខេត្តស្វាយរៀង បន្តស្ថិតនៅក្រៅឃុំនៅឡើយ។
ទំនាស់ដីធ្លីទំហំ១៤៥ហិកតា រវាងអ្នកភូមិឡពាងជាង៥០គ្រួសារ និងក្រុមហ៊ុន KDC របស់លោកស្រី ជា ខេង ភរិយាអតីតរដ្ឋមមន្ត្រីក្រសួងឧស្សាហកម្មរ៉ែ និងថាមពល លោក សុយ សែម នៅស្រុកកំពង់ត្រឡាច ខេត្តកំពង់ឆ្នាំង នេះអូសបន្លាយជាង១០ឆ្នាំមកហើយ។ រហូតមកដល់ពេលនេះ ប្រជាពលរដ្ឋកំពុងប្រឈមនឹងការដាច់ស្បៀង និងអ្នកភូមិខ្លះទៀតជាប់ពន្ធនាគារ៕
សរសេរមកកាន់អ្នកនាង ថុល ស្រីលក្ខណ៍ តាមរយៈ sreyleak@vodhotnews.com