ដោយ៖ ស៊ុន ណារិន
ថ្ងៃពុធ ទី20 ខែវិច្ឆិកា ឆ្នាំ2013
http://vodhotnews.com
កាសែតបាងកកប៉ុស្តិ៍ ចុះផ្សាយនៅថ្ងៃពុធនេះថា អាជ្ញាធរថៃ បានបាញ់សម្លាប់ពលរដ្ឋខ្មែរបីនាក់ ក្នុងករណីកាប់ឈើខុសច្បាប់ក្នុងខេត្តស៊ីសាកេតរបស់ថៃ។
កាសែតបាងកកប៉ុស្តិ៍ រាយការណ៍ថា អ្នកកាប់ឈើខុសច្បាប់បីនាក់ មកពីកម្ពុជា ត្រូវបានបាញ់សម្លាប់ក្នុងជម្លោះជាមួយមន្ត្រីព្រៃឈើ កាលពីថ្ងៃអង្គារ ទី១៩ខែវិច្ឆិកា។ កាសែតបន្តថា ខណៈមន្ត្រីព្រៃឈើថៃ កំពុងតែត្រួតពិនិត្យព្រៃឈើនៅតាមព្រំដែនថៃ-កម្ពុជា ក្នុងស្រុកKantharalak នៅម៉ោង៣ទៀបភ្លឺ ពួកគេ បានប្រទះឃើញមនុស្ស៣នាក់ ដែលសង្ស័យថាកាប់ឈើខុសច្បាប់។ កាសែតថៃ ឲ្យដឹងទៀតថា បន្ទាប់ពីការបាញ់ប្រហារក្នុងព្រៃ ជនជាតិកម្ពុជា៣នាក់ ត្រូវបានប្រទះឃើញថាស្លាប់។សាកសពជនជាតិកម្ពុជា ៣នាក់នោះ គ្រោងនឹងត្រូវបញ្ជូនមកកម្ពុជាវិញ។
កាលពីខែធ្នូ ឆ្នាំ២០១២ នៅក្នុងទីក្រុងបាងកក ប្រទេសកម្ពុជា និងថៃ បានឯកភាពគ្នា នឹងធ្វើការតាមដានលើការអនុវត្តជាក់ស្តែងតាមកំណត់ហេតុនៃកិច្ចប្រជុំ គណៈកម្មាធិការចម្រុះកម្ពុជា មានដូចជា ការទប់ស្កាត់មិនឲ្យប្រជាពលរដ្ឋខ្មែរចូលកាប់ឈើក្រញូងខុសច្បាប់ នៅក្នុងទឹកដីថៃ និងហាមកុំឲ្យភាគីថៃ បាញ់សម្លាប់ប្រជាពលរដ្ឋខ្មែរ ចូលក្នុងទឹកដីថៃ ខុសច្បាប់តទៅទៀត៕
សរសេរមកកាន់ លោក ស៊ុន ណារិន តាមរយៈsun_narin@vodhotnews.com