ដោយ៖ បូ សាវី និង ដួង សុខា
ថ្ងៃអង្គារ៍ ទី26 ខែវិច្ឆិកា ឆ្នាំ2013
http://vodhotnews.com
ស្តាប់សំឡេង៖ |
ចម្លងទុក |
ពលរដ្ឋជួបជាមួយមន្ត្រីសង្កាត់គោកចក (រូបថត បូ សាវី)
ប្រជាជនរងគ្រោះដោយទឹកជំនន់ ១៣៦គ្រួសារ នៅភូមិនគរក្រៅ សង្កាត់គោកចក ខេត្ដសៀមរាប នៅព្រឹកថ្ងៃអង្គារនេះ ដាក់ពាក្យបណ្តឹងទៅសាលាសង្កាត់នេះ ដើម្បីឲ្យអន្តរាគមន៍ទៅអាជ្ញាធរជាតិអប្សរា ផ្តល់សំណងជាស្រូវពូជ និងថវិកាជាបន្ទាន់ដល់គាត់។
ការដាក់បណ្តឹងនេះធ្វើទ្បើង ដោយសារប្រជាជនទាំងនោះ អះអាងថា អាជ្ញាធរជាតិអប្សរា បានបិទទំនប់តាកៅ ស្ថិតនៅខាងលិចខ្លោងទ្វារប្រាសាទអង្គរធំ បណ្តាលឲ្យជនលិចដំណាំស្រូវ និងផ្ទះរបស់ពួកគាត់។
តំណាងប្រជាជន នៅភូមិនគរក្រៅ សង្កាត់គោកចក ក្រុងសៀមរាប អ្នកស្រី ឌៀប សាខន មានប្រសាសន៍ថា ប្រជាជនរងគ្រោះដោយទឹកជំនន់កំពុងប្រឈមការអត់អាហារទទួលទាន។ អ្នកស្រីថា អាជ្ញាធរជាតិអប្សរាមិនទាន់ឃើញជួយដោះស្រាយបញ្ហាពួកគាត់ជាម្ចាស់អង្គរទ្បើយ ៖ "ហើយម្យ៉ាងទៀតបញ្ហាដីស្រែដែលធ្លាប់ធ្វើ ប្រកបការងាររាល់ឆ្នាំមកហើយ តែអប្សរាបិទទឹកពន្លិចអស់ ស្រូវកំពុងទុំ តែមិនទុកពេលវេលាឲ្យប្រជាពលរដ្ឋច្រូតសិនទេ តែគាត់បិទទឹកពន្លិចអស់ ហើយដីស្រែនោះក៏ចោលបីបួនឆ្នាំហើយ តែមិនបានធ្វើកើតដោយសារតែអប្សរាបិទទឹកពន្លិច ខ្ញុំទាំងអស់គ្នារងចាំមើលក្រែងគេដោះស្រាយ អត់មានគេដោះស្រាយសោះ ដល់ពេលនេះខ្ញុំនាំប្រជាពលរដ្ឋខ្ញុំមកដល់មេឃុំ ដើម្បីឲ្យគេជួយរកដំណោះដោះស្រាយឲ្យយើងខ្ញុំ"។
តំណាងប្រជាជនម្នាក់ទៀត កញ្ញា ខាន់ យ៉ុង ឲ្យដឹងថា ប្រសិនបើអាជ្ញាធរជាតិអប្សរា មិនដោះស្រាយការទាមទារសំណងទេ ប្រជាជនព្រមានទម្លាយទំនប់តាកៅចោល ៖ "ឈ្មួញឬមួយក៏អ្នកបណ្តាក់ទុន ដែលគាត់មកដាក់ទុននៅស្រុកខ្មែរ គាត់ការពារតែផលប្រយោជន៍របស់ពួកគេទាំងនោះទេ ប្រជាពលរដ្ឋលិចស្រែលិចស្រូវអស់ ឲ្យគាត់រីកចម្រើនមានលុយចាយមានអង្ករហូបបានមកពីណា បើសិនជាគាត់ធ្វើបែបហ្នឹង អញ្ចឹងបានន័យថា គាត់អភិវឌ្ឍន៍តែខាងឈ្មួញ ឲ្យមានកើនឡើង ហើយប្រជាពលរដ្ឋកាន់តែអន់ក្រទៅទៀត មួយវិញទៀត គឺឲ្យបើកទំនប់ឲ្យប្រជាពលរដ្ឋខញុំបានធ្វើស្រែនៅស្រែស្ទឹងនោះវិញ ពេលដែលខែប្រាំង អត់មានទឹក គឺឲ្យគាត់បញ្ចូលទឹក ខែវស្សា ទឹកច្រើនលិចខ្លាំង សូមឲ្យគាត់បើកទំនប់គាត់ឲ្យទឹកចេញ"។
អនុប្រធានគណៈកម្មាធិការដោះស្រាយទំនាស់នៃសង្កាត់គោកចក លោក ទិត ឌីរ៉ា ប្រាប់ប្រជាជនថា សង្កាត់មិនមានលទ្ធភាពដោះស្រាយនោះឡើយ។ លោកថា អាជ្ញាធរមូលដ្ឋាននឹងបញ្ជូនពាក្យបណ្ដឹងទៅអាជ្ញាធរក្រុង។
អគ្គនាយកអាជ្ញាធរជាតិអប្សរា លោក ប៊ុន ណារិទ្ធ មានប្រសាសន៍ថា ផលប៉ះពាល់មិនបណ្ដាលមកពីការបិទទំនប់តាកៅនោះទេ គឺដោយសារទ្វារទឹកបារាយណ៍ ដែលគ្រប់គ្រងដោយមន្ទីរធនធានទឹកខេត្ដមិនដំណើរការ។ ប៉ុន្ដែ លោកថា លោកនឹងដោះស្រាយ បើសិនការទាមទារសំណងនោះសមរម្យ៖ "ខ្ញុំមិនទាន់ឃើញសំណងអី ខូចអី ហើយសងយ៉ាងម៉េច អាហ្នឹងទាល់តែយកមកពិនិត្យសិន បានទទួលខ្ញុំពិនិត្យសិន អ្វីដែលវាសមហេតុសមផលយើងដោះស្រាយតាមហ្នឹង ពីព្រោះមែនទែន វាការទទួលខុសត្រូវ កន្លែងណាដែលជាការទទួលខុសត្រូវរបស់ខាងអាជ្ញាធរអប្សរា យើងខ្ញុំនឹងពិនិត្យដោះស្រាយ តែបើមិនមែនជាភារកិច្ច ជាការទទួលខុសត្រូវរបស់យើងខ្ញុំទេ អាហ្នឹងរឿងផ្សេងទៀត"។
ទំនប់ទឹកតាកៅ ស្ថិតនៅពីខាងលិចខ្លោងទ្វារប្រាសាទអង្គរធំ ក្នុងសង្កាត់គោកចក ក្រុងសៀមរាប ត្រូវបានអាជ្ញាធរជាតិអប្សរាទប់ទឹកទុករយៈពេលជាងពីរឆ្នាំមកហើយ ដើម្បីឲ្យមានលំនឹងគ្រឹះប្រាសាទបុរាណ និងបញ្ចៀសការជន់លិចខេត្តទេសចរណ៍នេះ។ ប៉ុន្ដែ ការទប់ទឹកធ្វើឲ្យប៉ះពាល់ដំណាំកសិកម្ម និងលំនៅឋានរបស់ប្រជាជនដែលរស់នៅភាគខាងជើងតំបន់នោះជារៀងរាល់ឆ្នាំ៕
សរសេរមកកាន់លោក បូ សាវី តាមរយៈ savy@vodhotnews.com