ដោយ៖ ឡាយ សាមាន
ថ្ងៃចន្ទ ទី16 ខែធ្នូ ឆ្នាំ2013
http://vodhotnews.com
អាជ្ញាធរខេត្តពោធិ៍សាត់ នៅថ្ងៃចន្ទនេះ បានរារាំងប្រជាពលរដ្ឋជាង១០០នាក់ មកពី៤ភូមិ ក្នុងស្រុកវាលវែង ដោយមិនឲ្យអនុញ្ញាតឲ្យពលរដ្ឋចូលរួមក្នុងវេទិកាសម្តែងមតិសាធារណៈ អំពីបញ្ហារំលោភដីធ្លី ដែលជាប់ពាក់ព័ន្ធនឹងក្រុមហ៊ុន ទ្រី ភាព ។
ប្រជាពលរដ្ឋដែលបាត់បង់ដីធ្លី លោក យក់ ម៉ាជ អាយុ ៥០ឆ្នាំ ប្រាប់ VOD នៅថ្ងៃទី១៦ ខែធ្នូ នេះថា ក្រុមអ្នកតវ៉ាបានព្យាយាមចូលរួមក្នុងវេទិកាសាធារណៈសម្តែងមតិនេះ ប៉ុន្តែត្រូវបានអាជ្ញាធរមូលដ្ឋាន និងក្រុមប៉ូលិសហាមចូលរួម រហូតដល់មានការប៉ះទង្គិចបន្តិចបន្តួចរវាងប្រជាពលរដ្ឋនិង សមត្ថកិច្ច។ លោកបន្តថា ការរាំងនេះរបស់សមត្ថកិច្ច ប៉ះពាល់ដល់សិទិ្ធសេរីភាពរបស់ប្រជាពលរដ្ឋក្នុងការសម្តែងមតិ និងសិទិ្ធផ្សេងៗទៀត។ លោកបញ្ជាក់ថា គាត់រស់នៅលើដីនោះ តាំពីឆ្នាំ១៩៩៦ មកម្ល៉េះ ហើយមានប័ណ្ណកម្មសិទ្ធិទៀតផង ប៉ុន្តែត្រូវបានក្រុមហ៊ុនទ្រីភាព បានរឹបអូសយកដោយពុំមានសំណងត្រឹមត្រូវ។
VOD មិនទាន់អាចទាក់ទងអាជ្ញាធរ ដើម្បីសុំការបកស្រាយលើបញ្ហានេះ បាននៅឡើយទេ។
ជម្លោះដីធ្លីរវាងពលរដ្ឋនៅស្រុកវាលវែង និងក្រុមហ៊ុនទ្រីភាព បានកើតឡើងតាំងពីឆ្នាំ២០១១។ កាលពី៣ឆ្នាំមុន ប្រជាពលរដ្ឋ បានដាក់ពាក្យបណ្តឹងទៅមេឃុំ មេស្រុកនិងក្រសួងពាក់ព័ន្ធ ប៉ុន្តែមិនមានដំណោះស្រាយនៅឡើយទេ។ លោកព្រមានថា ប្រសិនបើក្រសួងមិនមានដំណោះស្រាយទេនោះ ពលរដ្ឋនឹងធ្វើបាតុកម្មទ្រង់ទ្រាយធំ រហូតមានដំណោះស្រាយ៕
សរសេរមកកាន់លោក ឡាយ សាមាន តាមរយៈ laysamean168@yahoo.com