ដោយ៖ ស៊ុន ណារិន
ថ្ងៃព្រហស្បតិ៍ ទី2 ខែមករា ឆ្នាំ2014
http://vodhotnews.com
កម្មករនៅរោងចក្រមួយចំនួនក្នុងខេត្តកំពង់ស្ពឺ និងនៅជាយរាជធានីភ្នំពេញ នៅព្រឹកថ្ងៃព្រហស្បតិ៍នេះ ចាប់ផ្តើមតវ៉ានៅខាងមុខរោងចក្រ ដើម្បីទាមទារឲ្យរដ្ឋាភិបាលបន្តដំឡើងប្រាក់ឈ្នួលដល់ទៅ១៦០ដុល្លារ។
បន្ទាប់ពីការតវ៉ារយៈពេលមួយសប្តាហ៍ ចាប់ពីថ្ងៃទី២៥ខែធ្នូ ឆ្នាំ២០១៣ រដ្ឋាបានសម្រេចដំឡើងប្រាក់ឈ្នួល៥ដុល្លារទៀត បន្ថែមលើ៩៥ដុល្លារ ដូច្នេះកម្មករ នឹងទទួលបាន១០០ដុល្លារ សម្រាប់ប្រាក់ឈ្នួល ដែលនឹងត្រូវអនុវត្តចាប់ផ្តើមចាប់ពីដើមខែកុម្ភៈ ឆ្នាំ២០១៤។
កម្មកររាយការណ៍មកVODថា ពួកគេបានប្រមូលផ្តុំគ្នានៅខាងមុខតំបន់សេដ្ឋកិច្ចពិសេសរាជធានីភ្នំពេញនៅស្រុកអង្គស្នួល ខេត្តកំពង់ស្ពឺ ដើម្បីបន្តការតវ៉ា។ ចំណែកនៅគីឡូម៉ែត្រលេខ៦ ក្នុងខណ្ឌឬស្សីកែវ រាជធានីភ្នំពេញ កម្មកររាយការណ៍មកថា ពួកគេ តវ៉ាបិទផ្លូវដើម្បីទាមទារឲ្យមានការដំឡើងប្រាក់ឈ្នួល។
គួរបញ្ជាក់ថា កាលពីថ្ងៃទី៣១ខែធ្នូ សហជីពចំនួន៦ដែលដឹកនាំកម្មករ ធ្វើបាតុកម្ម ទាមទារប្រាក់ឈ្នួលគោលដល់១៦០ដុល្លារក្នុងមួយខែនោះ ប្រកាសផ្អាកតវ៉ានៅមុខក្រសួងការងារ ដោយប្រមូលផ្តុំគ្នាតវ៉ានៅមុខរោងចក្ររៀងៗខ្លួនវិញ៕
សរសេរមកកាន់ លោក ស៊ុន ណារិន តាមរយៈsun_narin@vodhotnews.com