ប្រជាពលរដ្ឋសហគមន៍ជនជាតិដើមភាគតិច ៣៥គ្រួសារ នៅឃុំល្អក់ ស្រុកអូរជុំ ខេត្តរតនគិរី ព្រួយបារម្ភពីការផ្តល់ដីសម្បទានទៅឲ្យក្រុមហ៊ុន ស៊ី.អ.ឌី (CRD) ដែលធ្វើឲ្យប៉ះពាល់ដល់ព្រៃបម្រុងទុក និងព្រៃកប់សពអ្នកភូមិ។
ដោយ រដ្ឋា វិសាល
2014-01-01
RFA
ស្ដាប់ ឬ ទាញយកសំឡេង
សហគមន៍ជនជាតិដើមគ្រឹង រស់នៅភូមិកាំ ឃុំល្អក់ នៅថ្ងៃអង្គារ ទី១ ខែមករា អះអាងថា ក្រុមហ៊ុនសម្បទានសេដ្ឋកិច្ចវៀតណាម ឈ្មោះ ស៊ី.អ.ឌី បានឈូសឆាយពង្រីកផ្ទៃដីសម្បទានកាន់តែខិតជិតភូមិ ធ្វើឲ្យបាត់បង់ព្រៃត្រៀមបម្រុង និងព្រៃកប់សពរបស់អ្នកភូមិអស់គ្មានសល់។
អនុប្រធានសហគមន៍ លោក ប្រឡុង ពើយ បានកត់សម្គាល់ថា ចាប់តាំងពីខែវិច្ឆិកា ឆ្នាំ២០១៣ រហូតបច្ចុប្បន្ន ក្រុមហ៊ុនបានបង្កើនការឈូសឆាយព្រៃនៅចម្ងាយប្រមាណ ៥០០ម៉ែត្រពីភូមិ ដោយសំអាងថាព្រៃនោះឋិតក្នុងបរិវេណដីសម្បទាន។ លោកបន្តថា បានសុំកិច្ចអន្តរាគមន៍ពីមន្ត្រីអាជ្ញាធរឃុំ ដើម្បីរក្សាព្រៃតំបន់នោះទុកសម្រាប់ការប្រើប្រាស់ និងអាស្រ័យផលរបស់ពលរដ្ឋជនជាតិដើម ប៉ុន្តែមិនឃើញមានដំណោះស្រាយ៖ «ពួកខ្ញុំប្ដឹងម្តងដូចគ្នា ប៉ុន្តែបាត់សូន្យឈឹង ទៅឃុំទៅស្រុក ហើយទៅខេត្ត ចង់ឲ្យក្រុមហ៊ុនហ្នឹងឈប់ឈូសទៅ ប៉ុណ្ណឹងបានហើយ ឥឡូវវាជិតកៀកៗភូមិ»។
កាលពីពាក់កណ្ដាលខែធ្នូ កន្លងទៅ តំណាងសហគមន៍បាននាំយកពាក្យប្ដឹងករណីនេះមកការិយាល័យសមាគមការពារសិទ្ធិមនុស្សអាដហុក (Adhoc) ខេត្តសុំជួយអន្តរាគមន៍ការស្នើសុំរបស់ពលរដ្ឋទៅអាជ្ញាធរពាក់ព័ន្ធឲ្យជួយដោះស្រាយ។
វិទ្យុអាស៊ីសេរី នៅថ្ងៃទី១ ខែមករា មិនអាចទាក់ទងសុំការបញ្ជាក់ពីតំណាងក្រុមហ៊ុន ស៊ី.អ.ឌី បាននៅឡើយ។
ទាក់ទិនករណីនេះដែរ មេឃុំល្អក់ លោក យ៉ាម ប៉ាម មានប្រសាសន៍បញ្ជាក់ថា លោកបានចាត់មន្ត្រីនគរបាលទៅពិនិត្យករណីនេះហើយ ក៏ប៉ុន្តែការឈូសឆាយរបស់ក្រុមហ៊ុន គឺឋិតក្នុងតំបន់ផ្តល់ដីសម្បទាន។ លោកបន្តថា រាជរដ្ឋាភិបាលបានផ្តល់ដីនោះសម្រាប់ក្រុមហ៊ុនសម្បទាន ហេតុនេះការស្នើសុំរបស់ពលរដ្ឋមិនឋិតក្នុងសមត្ថកិច្ចរបស់អាជ្ញាធរឃុំទេ៖ «ម្សិលមិញ ខ្ញុំឲ្យមន្ត្រីប៉ុស្តិ៍រដ្ឋបាលទៅមើលជាក់ស្តែងជាមួយសមាជិកក្រុមប្រឹក្សាឃុំ គេថាអត់ទេ ស្លាកត្រឹមណា គឺគេឈូសត្រឹមហ្នឹង តើធ្វើម៉េចគ្នា»។
ក្រុមហ៊ុន ស៊ី.អ.ឌី ទទួលបានដីសម្បទានជាង ៧ពាន់ហិកតារ នៅព្រំប្រទល់ស្រុកអូរជុំ បរកែវ និងស្រុកអណ្ដូងមាស តាំងពីឆ្នាំ២០១១។
មន្ត្រីឃ្លាំមើលបញ្ហាព្រៃឈើសមាគមអាដហុក លោក ឆាយ ធី មានប្រសាសន៍បញ្ជាក់ថា កន្លងទៅនេះសមាគមលោកទទួលបានពាក្យបណ្ដឹងរបស់ពលរដ្ឋបីករណីផ្សេងគ្នា ដែលចោទប្រកាន់ក្រុមហ៊ុន ស៊ី.អ.ឌី ប្រើប្រាស់អាវុធបាញ់គំរាមសហគមន៍ឈូសឆាយទៅលើស្រែចម្ការសហគមន៍ និងឈូសឆាយព្រៃត្រៀមបម្រុងរបស់សហគមន៍។ លោកអំពាវនាវសុំឲ្យអាជ្ញាធរពាក់ព័ន្ធចុះត្រួតពិនិត្យករណីនេះ៖ «គោលនយោបាយរបស់រាជរដ្ឋាភិបាល ដែលមានការវាស់វែងកាត់ផលប៉ះពាល់ចេញហ្នឹង មិនបានដោះស្រាយសមស្របត្រង់ហ្នឹង ហើយដែលធ្វើឲ្យបងប្អូនជនជាតិដើមភាគតិចប៉ះពាល់ដីព្រៃការពារផង ដីព្រៃបម្រុងទុកផង និងដីកប់សពផង»។
ទោះជាយ៉ាងនេះក៏ដោយ អភិបាលស្រុកអូរជុំ លោក សាក់ សុន មានប្រសាសន៍បញ្ជាក់ថា កន្លងទៅនេះ អាជ្ញាធរជំនាញបានសិក្សាកាត់ចេញដីត្រៀមបម្រុងសម្រាប់ប្រជាពលរដ្ឋរួចហើយ ហេតុនេះក្រុមហ៊ុនមិនអាចបំពានឈូសឆាយព្រៃនោះបានទេ។ លោកអះអាងថា នឹងចុះពិនិត្យសេចក្តីរាយការណ៍នេះ៖ «ទាល់ទៅមើលជាក់ស្តែង កាលណាព្រៃអារក្សព្រៃស្អីគេឲ្យកាត់ចេញ តើគេចុះទៅឆ្វៀលចេញតើ។ ចាំមើលស្អែកខ្ញុំចុះទៅមើលៗ»។
កាលពីសប្ដាហ៍មុន សហគមន៍ជនជាតិដើម ៧ជនជាតិ នៅខេត្តរតនគិរី បានបើកសមាជលើកទី១របស់ខ្លួន ដើម្បីបញ្ជូនសារសំណូមពរជាសំខាន់សុំឲ្យរាជរដ្ឋាភិបាលបញ្ចៀសរាល់គម្រោងដីសម្បទានសេដ្ឋកិច្ចណាដែលបង្កផលប៉ះពាល់ ការរស់នៅប្រពៃណីវប្បធម៌ និងការចិញ្ចឹមជីវិតនៅតំបន់ជនជាតិដើមដោយគ្មានការប្រឹក្សាយោបល់ និងយល់ព្រមពីសំណាក់សហគមន៍ ទទូចសុំឲ្យបញ្ឈប់ការវាស់វែងចុះបញ្ជីដីឯកជននៅតំបន់ជនជាតិដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- ពលរដ្ឋ១៨គ្រួសារនៅឫស្សីកែវបារម្ភខ្លាចអាជ្ញាធរឈូសសំយាបផ្ទះនៅថ្ងៃចូលឆ្នាំសាកល
- អ្នកឃ្លាំមើល៖ ទំនាស់ដីធ្លីនិងព្រៃឈើនឹងបន្តកើតមាននៅឆ្នាំ២០១៤
- ពលរដ្ឋប្រមាណ៥០០នាក់តវ៉ាប្រឆាំងក្រុមហ៊ុនដីសម្បទានសេដ្ឋកិច្ច
- សកម្មជនបក្សប្រជាជនបង្វែរការធ្វើបាតុកម្មបិទសាលាឃុំទៅជាការចរចា
- ពលរដ្ឋនៅក្រចេះលើកគ្នាទៅបញ្ឈប់គ្រឿងចក្រឈូសឆាយដី
- ពលរដ្ឋនៅពោធិ៍សាត់ប្រកាសធ្វើបាតុកម្មប្រឆាំងក្រុមហ៊ុនរំលោភដី
- សកម្មជនបក្សប្រជាជនគ្រោងធ្វើបាតុកម្មបិទសាលាឃុំនៅក្រចេះ
- ពលរដ្ឋមួយចំនួននៅខេត្តព្រះវិហារបារម្ភខ្លាចបាត់បង់ដីស្រែចម្ការ
- បញ្ហាកាប់បំផ្លាញព្រៃឈើនិងទំនាស់ដីធ្លីនៅឆ្នាំ២០១៣