Friday, 24 January 2014
Miranda Glasser
ភ្នំពេញ ប៉ុស្តិ៍
សៀមរាបៈ ក្រៅពីការទស្សនាប្រាសាទបុរាណខ្មែរនានានៅទឹកដីខេត្តសៀមរាប ក៏នៅមានតំបន់ផ្សេងទៀតដែលកំពុងទាក់ទាញអារម្មណ៍ភ្ញៀវទេសចរ នាពេលបច្ចុប្បន្នគឺតំបន់សហគមន៍បារាយណ៍ (Baray Reach Dak)។ នេះជាតំបន់ថ្មីមួយដែលអ្នកភូមិភាគបារាយណ៍ខាងជើងបង្កើតវាឡើង នៅតំបន់ឧទ្យានបុរាណអង្គរ។
ទីនេះត្រូវបានបើកដំណើរបម្រើភ្ញៀវ ចូលទស្សនាកាលពីឆ្នាំមុនដែលមានការគាំទ្រដោយអាជ្ញាធរជាតិ អប្សរាអង្គការយូណេស្កូ និងគម្រោងអភិវឌ្ឍន៍របស់រដ្ឋាភិបាល អូស្រ្តាលីបន្ទាប់ពីបារាយណ៍នោះបានរីងស្ងួតទឹកអស់ពេលជាង៥សតវត្សរ៍មកហើយ ខណៈក្រុមអាជ្ញាធរអប្សរាបានបូមទឹកបញ្ចូលវិញនៅឆ្នាំ២០០៧។
កញ្ញា ច័រជីណា ឡយ មន្ត្រីគ្រប់គ្រងគម្រោងអភិវឌ្ឍន៍បេតិកភណ្ឌតំបន់អង្គររបស់អង្គការយូណេស្កូបានពន្យល់ថានេះគឺជាគម្រោងដ៏ធំមួយដោយយើងបានយក កត្តាសំខាន់ផ្អែកលើជីវភាពប្រជាជនក្នុងសហគមន៍ដែលអាចឲ្យពួកគាត់ រកប្រាក់ចំណូលពីសេវាកម្មទេសចរណ៍នេះ។
ការបូមទឹកបញ្ចូលទៅក្នុងបារាយណ៍ខាងជើងនោះមិនត្រឹមតែជាវិធីសាស្រ្តទប់ទល់នឹងចរន្តទឹកជំនន់នៃក្រុងសៀមរាបប៉ុណ្ណោះទេថែមទាំងផ្តល់នូវធនធានទឹកសម្រាប់ដំណាំស្រូវរបស់ប្រជាជនសហគមន៍នេះទៀតផង។
ប៉ុន្តែ កញ្ញា ច័រជីណា ឡយ បាននិយាយថា អំឡុងពេលដែលអ្នកភូមិបានបាត់បង់ដីស្រែរបស់ពួកគាត់អស់ទៅហើយ នោះទើបសហគមន៍ទេសចរណ៍មានពន្លកចេញឡើងដើម្បីជាការប៉ះប៉ូវដល់ ពួកគាត់សម្រាប់ជាវិធីសាស្រ្តជួយរកប្រាក់ចំណូលប្រចាំថ្ងៃឲ្យពួកគាត់ចិញ្ចឹមជីវិតបាន។
កញ្ញាបន្ថែមថា៖ «យើងបានជួយដល់សហគមន៍អ្នកភូមិទាំងពីរនេះតាមរយៈការបង្កើតនូវ តំបន់ទេសចរណ៍ជុំវិញបារាយណ៍បុរាណតែម្តងដោយក្នុងនោះមានទេសភាព ព្រៃឈើធម្មជាតិ និងទឹក។ យើងក៏មានក្រុមយុវជនដ៏អស្ចារ្យមានសមត្ថភាពចូលរួមធ្វើការងារជាមួយនឹងពួកយើងផងដែរ។ ពួកគេភាគច្រើនមានវ័យចន្លោះពី១៨ឆ្នាំដល់៣០ឆ្នាំ»។
គេសង្កេត ឃើញមានដំណើរទេសចរណ៍កម្សាន្តចំនួនបីសម្រាប់តំបន់នោះ។ ទីមួយការដើរកម្សាន្តតំបន់ព្រៃធម្មជាតិជាមួយមគ្គុទេ្ទសក៍ទេសចរណ៍ ក្នុងស្រុក និងជិះទូកឈើកម្សាន្តលើផ្ទៃទឹកបារាយណ៍។ ទីពីរដំណើរកម្សាន្តទៅកាន់ប្រាសាទនាគព័ន្ធដែលគេហៅថាប្រាសាទ កោះ និងទីបីការកម្សាន្តជិះទូករយៈពេលខ្លីគយគន់ទេសភាពរស្មីព្រះអាទិត្យហៀបអស្ដង្គតនៅឯប្រាសាទព្រះខ័ន។
កញ្ញា ជាមន្ត្រីគ្រប់គ្រងគម្រោងរបស់អង្គការយូណេស្កូរូបនេះបាននិយាយ ថា បច្ចុប្បន្នតំបន់ទេសចរណ៍ខាងលើទទួលបានជោគជ័យហើយសម្រាប់សហគមន៍ អ្នកភូមិនៅតំបន់បារាយណ៍ខាងជើង។ នាពេលអនាគត គេក៏នឹងមានគម្រោងបង្កើតសេវាកម្មទេសចរណ៍ផ្នែកទោចក្រយានយន្ត និងលក់ផលិតផលអនុស្សាវរីយ៍របស់អ្នកភូមិទៀតផង៕ PR