ដោយ៖ ជន ស្រីណុច
ថ្ងៃព្រហស្បតិ៍ ទី30 ខែមករា ឆ្នាំ2014
http://vodhotnews.com
ស្តាប់សំឡេង៖ |
ចម្លងទុក |
មជ្ឈមណ្ឌលសិទ្ធិមនុស្សកម្ពុជា CCHR រកឃើញថា ការផ្តល់ដីសម្បទានសង្គមកិច្ច របស់រដ្ឋាភិបាលនៅឆ្នាំ២០១៣ មានការកើនឡើងដល់ទៅ៥ដង នៃការផ្តល់ដីសម្បទានសង្គមកិច្ចកាលពីឆ្នាំ២០១២ ប៉ុន្តែបញ្ហាដីធ្លី ឬការបណ្តេញពលរដ្ឋចេញ កើតមានស្ទើរគ្រប់កន្លែងក៏កាន់តែកើនឡើងគួរឲ្យកត់សម្គាល់ដែរ។
សេចក្តីថ្លែងការណ៍មជ្ឈមណ្ឌលសិទ្ធិមនុស្សកម្ពុជាចុះថ្ងៃទី៣០ ខែមករានេះឲ្យដឹងថា នៅឆ្នាំ២០១៣ រដ្ឋាភិបាលបានផ្តល់ដីសម្បទានសង្គមកិច្ចចំនួន៤២០ទីតាំង ដោយមានផ្ទៃដីសរុបចំនួនជាង៥០ម៉ឺនហិកតា (៥០២.៤០៤,៤៩ ហិកតា) និងការធ្វើអនុប្បយោគដីសម្បទាន ៤ទីតាំង មានផ្ទៃដីសរុបចំនួនជាង១៦ហិកតា (១៦,៣៥ ហិកតា) ច្រើនជាងការផ្តល់ដីសម្បទានសង្គមកិច្ចនៅឆ្នាំ២០១២ដល់ទៅ៥ដង ដែលមានត្រឹមតែ៨៣ទីតាំងប៉ុណ្ណោះ។
មន្ត្រីសម្របសម្រួលគម្រោងកំណែទម្រង់ដីធ្លីរបស់ មជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត បញ្ជាក់ថា ការផ្តល់ដីសម្បទានសង្គមកិច្ចមានការកើនឡើង ប៉ុន្តែជម្លោះក្នុងការបែងចែកក៏កើនឡើងដែរ ដោយសារការបែងចែកមិនមានតម្លារភាព។ លោកបន្តថា គប្បីសង្គមស៊ីវិល ម្ចាស់ជំនួយ និងប្រជាពលរដ្ឋកម្ពុជា ត្រូវមានការប្រុងប្រយ័ត្ន ខណៈដែលករណីនេះបញ្ហាញឲ្យច្បាស់ថា បទបញ្ជាផ្អាកការផ្តល់សម្បទានដីរបស់រដ្ឋាភិបាល មិនមែនជាមធ្យោបាយបញ្ចប់ជម្លោះដីធ្លីនៅកម្ពុជាទេនោះ នេះដោយសារការគ្រប់គ្រងដីធ្លីមិនមានលក្ខណៈច្បាស់លាស់ «ភាគច្រើនខ្ញុំមើលទៅ ដោយសារការគ្រប់គ្រងខ្សោយ ជាពិសេសជួនកាលឆន្ទៈខាងថ្នាក់ដឹកនាំ គាត់ចង់បញ្ចប់បញ្ហា ប៉ុន្តែដោយសារការគ្រប់គ្រង ការសិក្សាស្វែងយល់របស់គាត់ ហើយគាត់ជឿតាមសំដីថ្នាក់ក្រោម អ្នកបច្ចេកទេសដោយមិនបានសិក្សាស្វែងយល់ឲ្យបានច្បាស់លាស់ អញ្ចឹងគូរផែនទីពីកុំព្យូទ័រ ពីលើទៅម៉េច ដាក់ជូនទៅគាត់សម្រេចម៉េច គាត់ឃើញថាអញ្ចឹង សួរថាច្បាស់ហើយៗ ឲ្យទៅអស់ហើយ ប៉ុន្តែនៅតែប៉ះដីប្រជាពលរដ្ឋដដែល»។
អ្នកនាំពាក្យទីស្តីការគណរដ្ឋមន្ត្រី លោក ផៃ ស៊ីផាន ទទួលស្គាល់ថា ការផ្តល់ដីសម្បទានសង្គមកិច្ចពិតជាមានការកើនឡើងមែន ព្រោះតែគោលនយោបាយនេះ អាចផ្តល់ផលប្រយោជន៍ដល់ប្រជាពលរដ្ឋច្រើន។ តែលោកបដិសេធដែលថា ការបណ្តេញចេញប្រជាពលរដ្ឋពីដីធ្លី ឬលំនៅដ្ឋាន មានការកើនឡើងមិនទាក់ទងគ្នានឹងការផ្តល់ដីសម្បទានសង្គមកិច្ចនេះទេ «ខ្ញុំមិនជឿថា ការដេញមនុស្សចេញនោះ គឺដេញនៅក្នុងករណីថ្មីទេ គឺប្រហែលជាករណីរបស់មនុស្សរំលោភលើដីសាធារណៈ ឬរំលោភទៅលើដីឯកជន ដែលគេមានរួចស្រេច»។
ទោះជាយ៉ាងណាក៏ដោយ អ្នកតាមដានព្រឹត្តិការណ៍សង្គមយល់ថា គណបក្សប្រជាជនកម្ពុជា ដែលធ្លាក់ប្រជាប្រិយភាពបាត់អាសនៈ២២ ក្រោយការបោះឆ្នោត អាណត្តិទី៥ ក៏ជាមូលហេតុចេញពីជម្លោះដីធ្លី ដែលមិនអាចដោះស្រាយបាននេះដែរ។
មជ្ឈមណ្ឌលសិទ្ធិមនុស្សកម្ពុជា បញ្ជាក់ថា ការសិក្សាលើទំនាស់ដីធ្លី ត្រូវបានធ្វើឡើងនៅចន្លោះពីឆ្នាំ២០១១ ដល់ឆ្នាំ២០១៣ ហើយបានចងក្រងចេញជាទិន្នន័យនៅលើផែនទី ពីករណីជម្លោះដីធ្លីនៅកម្ពុជា៕
សូមសរសេរមកកាន់កញ្ញា ជន ស្រីណុច តាមរយៈ chornsreynoch@vodhotnews.com