សមាជិកសភាសហភាពអឺរ៉ុប មួយរូប បានបញ្ចប់ការស៊ើបអង្កេតលើជម្លោះដីធ្លី និងការរំលោភសិទ្ធិមនុស្ស រវាងក្រុមហ៊ុនអភិវឌ្ឍន៍ដីសម្បទានសេដ្ឋកិច្ចដាំអំពៅ នៅថ្ងៃទី៣១ មករា។ សមាជិកសភារូបនោះនឹងរៀបចំរបាយការណ៍ដាក់ជូនទៅឧត្ដមស្នងការខាងពាណិជ្ជកម្ម របស់សហភាពអឺរ៉ុប ដើម្បីត្រួតពិនិត្យឡើងវិញចំពោះការបញ្ជាទិញស្ករស ក្រោមគោលនយោបាយអនុគ្រោះពន្ធគយ សម្រាប់ករណីប្រទេសកម្ពុជា។
ដោយ អាន ស៊ីថាវ
2014-02-01
RFA
ស្ដាប់ ឬ ទាញយកសំឡេង
សមាជិកសភាសហភាពអឺរ៉ុប និងសមាជិកគណៈកម្មការផ្នែកអភិវឌ្ឍន៍ លោក ផែតទ្រីស ទីរ៉ូលែន (Patrice Tirolien) ថ្លែងប្រាប់អ្នកកាសែត កាលពីថ្ងៃទី៣១ ខែមករា ឆ្នាំ២០១៤។ RFA/An Sithav
សមាជិកសភាសហភាពអឺរ៉ុប និងសមាជិកគណៈកម្មការផ្នែកអភិវឌ្ឍន៍ លោក ផែតទ្រីស ទីរ៉ូលែន (Patrice Tirolien) មានប្រសាសន៍នៅថ្ងៃទី៣១ មករា ថា លោកបានចំណាយពេលមួយសប្ដាហ៍ចុះជួបជាមួយប្រជាពលរដ្ឋរងគ្រោះ ដែលរងផលប៉ះពាល់ពីក្រុមហ៊ុនទទួលបានដីសម្បទានសេដ្ឋកិច្ចដាំដំណាំអំពៅ នៅក្នុងខេត្តចំនួនបី គឺខេត្តឧត្ដរមានជ័យ កំពង់ស្ពឺ និងខេត្តកោះកុង។
លទ្ធផលស៊ើបអង្កេតលើដំណើរការផលិតស្ករសរបស់ក្រុមហ៊ុនឯកជនទាំងនោះ បានបង្ហាញថា មានជាប់ពាក់ព័ន្ធនឹងការរំលោភសិទ្ធិមនុស្ស និងការប្រើប្រាស់កម្លាំងពលកម្មកុមារលើកសិឧស្សាហកម្មស្ករអំពៅ នៅក្នុងខេត្តទាំងបីនោះ។ ក្រុមហ៊ុនដែលទទួលបានដីសម្បទានសេដ្ឋកិច្ចច្រើនជាងគេលើការអភិវឌ្ឍដំណាំស្ករអំពៅ គឺគ្រប់គ្រងដោយលោកឧកញ៉ា លី យ៉ុងផាត់។
លោក ផែតទ្រីស ទីរ៉ូលែន បញ្ជាក់ថា ក្រុមហ៊ុនឯកជនទទួលដីសម្បទានសេដ្ឋកិច្ចនោះ គឺមានបរិមាណច្រើនហួសពីច្បាប់កំណត់ ហើយការអភិវឌ្ឍក៏បានប៉ះពាល់ដល់ដីរបស់សហគមន៍ និងដីស្រែបង្កបង្កើនផលរបស់ប្រជាពលរដ្ឋមូលដ្ឋាន។ លោកបន្ថែមទៀតថា ទស្សនកិច្ចនេះមិនមែនជ្រៀតជ្រែកលើបញ្ហានយោបាយរបស់រាជរដ្ឋាភិបាលកម្ពុជា នោះទេ គឺមកដោះស្រាយបញ្ហាទាំងឡាយ ទាក់ទងនឹងការអភិវឌ្ឍសេដ្ឋកិច្ច និងបញ្ហាសិទ្ធិមនុស្ស៖ «បេសកកម្មរបស់យើង គឺមកដើម្បីប្រមូលនូវភស្តុតាង និងព័ត៌មានទាំងអស់ យកមកដោះស្រាយរវាងប្រជាពលរដ្ឋ និងក្រុមហ៊ុនផលិតស្ករអំពៅ ដែលកំពុងកើនឡើងនៅប្រទេសកម្ពុជា»។
លោក ផែតទ្រីស ទីឡូលែន មានប្រសាសន៍បន្ថែមទៀតថា លោកនឹងរៀបចំរបាយការណ៍ស៊ើបអង្កេតទៅឧត្ដមស្នងការពាណិជ្ជកម្មរបស់សហភាពអឺរ៉ុប ឲ្យពិនិត្យឡើងវិញលើការអនុគ្រោះពន្ធគយ រួមទាំងដាក់សម្ពាធឲ្យក្រុមហ៊ុនផលិតស្ករសនៅកម្ពុជា មានការទទួលខុសត្រូវចំពោះផលប៉ះពាល់ដល់ប្រជាពលរដ្ឋ និងផ្ដល់សំណងសមរម្យដល់អ្នករងគ្រោះ។
ដីអភិវឌ្ឍន៍ដាំអំពៅនៅក្នុងខេត្តទាំងបីនេះ បានប៉ះពាល់ដីប្រជាពលរដ្ឋរាប់រយហិកតារ។
ប្រជាពលរដ្ឋរងគ្រោះម្នាក់មកពីខេត្តកោះកុង លោក យិន ជាវ បានឲ្យដឹងថា ទស្សនកិច្ចរបស់សមាជិកសភារបស់សហភាពអឺរ៉ុប នេះ ពិតជាអាចជួយរកដំណោះស្រាយជម្លោះដីធ្លីរបស់គាត់បាន។ លោកចង់ឲ្យសហភាពអឺរ៉ុប រឹតបន្តឹងការទិញស្ករសពីក្រុមហ៊ុនណាដែលមានការរំលោភសិទ្ធិមនុស្ស ឬការអភិវឌ្ឍនោះ បានធ្វើឲ្យប៉ះពាល់ដល់ដីស្រែចម្ការរបស់ប្រជាពលរដ្ឋ៖ «គឺខ្ញុំយល់ថា ការអភិវឌ្ឍ គឺល្អមែន ប៉ុន្តែរដ្ឋាភិបាល ឬក៏ក្រុមហ៊ុនហ្នឹង អភិវឌ្ឍតែដីសម្បទាន កុំធ្វើឲ្យប៉ះពាល់ដល់ដីប្រជាពលរដ្ឋ គឺថា អភិវឌ្ឍរីកចម្រើន មិនថាតំបន់ណានោះទេ កុំឲ្យប៉ះពាល់ដល់ដីប្រជាពលរដ្ឋ។ អភិវឌ្ឍមានការប៉ះពាល់ដល់ដីប្រជាពលរដ្ឋ គឺមានការរីកចម្រើននោះទេ»។
ចំណែកអ្នករងគ្រោះម្នាក់ទៀតមកពីខេត្តឧត្ដរមានជ័យ អ្នកស្រី ហួយ ម៉ៃ បានឲ្យដឹងបន្ថែមទៀតថា គាត់បានបាត់បង់ដីស្រែប្រមាណ ២០ហិកតារពីគម្រោងអភិវឌ្ឍន៍ដីសម្បទានសេដ្ឋកិច្ចរបស់រាជរដ្ឋាភិបាល ដែលផ្ដល់ឲ្យក្រុមហ៊ុនឯកជនដាំអំពៅរបស់លោកឧកញ៉ា លី យ៉ុងផាត់។ អ្នកស្រីបានដាក់ញត្តិ និងស្នើអ្នកពាក់ព័ន្ធទាំងអស់នៅប្រទេសកម្ពុជា ប៉ុន្តែនៅមិនទាន់រកដំណោះស្រាយបាននៅឡើយ។ ហើយអ្វីដែលអ្នកស្រីទទួលបានពីការទាមទាររកដំណោះស្រាយកន្លងមក គឺការគំរាមកំហែង និងការចាប់ចងដាក់ក្នុងពន្ធនាគារ។
វិទ្យុអាស៊ីសេរី មិនអាចទាក់ទងក្រុមហ៊ុនស្ករអំពៅរបស់លោកឧកញ៉ា លី យ៉ុងផាត់ បានទេ នៅថ្ងៃទី៣១ មករា។ ទោះជាយ៉ាងណា សមាជិកសភារបស់សហភាពអឺរ៉ុប លោក ផែតទ្រីស ទីរ៉ូលែន ដែលបានជួប និងសួរតំណាងក្រុមហ៊ុនស្ករអំពៅ អំពីដំណោះស្រាយ និងការផ្ដល់សំណង ប៉ុន្តែក្រុមហ៊ុនបានឆ្លើយថា មិនទទួលខុសត្រូវអ្វីទាំងអស់ក្រៅពីការបង្កើតការងារសម្រាប់ប្រជាពលរដ្ឋ។
សមាជិកសភាសហភាពអឺរ៉ុប លោក ផែតទ្រីស ទីរ៉ូលែន បានអញ្ជើញមកកម្ពុជា ចាប់តាំងពីថ្ងៃទី២៨ ដល់ថ្ងៃទី៣១ មករា។ ក្នុងដំណើរទស្សនកិច្ចនេះ ក៏មានអ្នកសារព័ត៌មានរបស់សហភាពអឺរ៉ុប ចូលរួមដែរ ដើម្បីមកស៊ើបអង្កេត និងរាយការណ៍អំពីផលប៉ះពាល់លើដំណើរការអភិវឌ្ឍស្ករអំពៅ ដែលជាប់ពាក់ព័ន្ធនឹងការរំលោភសិទ្ធិមនុស្សនៅប្រទេសកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- ពលរដ្ឋ១៥០គ្រួសារនៅបន្ទាយមានជ័យប្រឈមនឹងការរុះរើលំនៅឋានទៅទីតាំងថ្មី
- CCHR ផ្សាយរបាយការណ៍ទំនាស់ដីធ្លីនិងដីសម្បទានឆ្នាំ២០១៣
- ពលរដ្ឋដែលមានជម្លោះដីជាមួយក្រុមហ៊ុននៅកំពង់ឆ្នាំងប្រឈមនឹងដាច់បាយ
- ពលរដ្ឋមានបញ្ហាដីនៅឧត្ដរមានជ័យរកអន្តរាគមន៍ពីសហគមន៍អឺរ៉ុប
- តំណាងពលរដ្ឋនៅព្រះវិហារដាក់ញត្តិសុំអន្តរាគមន៍ដោះស្រាយបញ្ហាដីធ្លី
- ពលរដ្ឋនៅសង្កាត់ព្រែកប្រាចោទក្រុមហ៊ុនសូគីម៉ិចបូមខ្សាច់ពន្លិចយកដី
- អ្នករងផលប៉ះពាល់ដោយគម្រោងសង់ទំនប់វារីអគ្គិសនីសេសានក្រោម២បារម្ភពីសំណង
- តំណាងសហគមន៍អឺរ៉ុបគ្រោងចុះមើលអ្នកគេបណ្ដេញចេញនៅឧត្តរមានជ័យ
- ពលរដ្ឋនៅព្រះវិហារចោទក្រុមហ៊ុនគ្រោងឈូសឆាយរំលោភចូលដីចម្ការ
សូមអោយសភាអឺរ៉ុប ផ្អាកការទិញស្ករសពីកម្ពុជា លុះណាតែអោយរដ្ឋាភិបាលសើុបអង្កេតុរកឃាតករបាញ់សំលាប់កម្មករអោយឃើញសិន!
ខ្មាស់គេណាស់លោកអើយ មិនដកពួករលួយដល់ឆ្អឹងចាោលទេ ទុក្សធ្វើអ្វីនាំខូចបក្ស!!! បក្សមានមនុស្សល្អច្រើន តែមិនយកមកប្រើ ព្រោះគេគ្មានលុយសូក!!!
> . ខ្មែរ ធ្វើបាបខ្មែរ ， ខ្មែរ កេងប្រវ័ញខ្មែរ ， ខ្មែរ សម្លាប់ខ្មែរ ដើម្បី បំរើ យួន !
>. មានតែ សហគមន៍អន្តរជាតិ ដែលជួយ ប្រជាពលរដ្ឋខ្មែរ !
>. ប្រទេសខ្មែរ យើង បើគ្មាន សហគមន៍អន្តរជាតិ . អង្គការសហប្រជាជាតិ . អង្គការសិទ្ធិមនុស្ស
អន្តរជាតិ ជួយ ការពារ ទប់ស្កាត់ ， ប្រហែលពួក អាក្បត់ ហ៊ុន សែន សម្លាប់ប្រជាពលរដ្ឋខ្មែរ
យ៉ាងរង្គាល ដូចរបប ខ្មោច ប៉ុល ពត បាត់ទៅហើយ !
Banh Bev
February 2, 2014 at 8:12 am
—————————————————————————-
ឯកភាពនឹងគំនិតត្រឹមត្រូវ…..នៅក្នុងគណៈបក្សប្រជាជនមិនខ្វះអ្នកស្រឡាញ់ជាតិទេតែមិនអាចទៅរួច.. មិនខ្វះអ្នកមានមានសមត្ថភាពនិងមនសិការជាតិទេ…តែគ្នាទៅមិនរួចនឹងតម្លៃនៃតំណែងនិមួយៗ….ឯអាអ្នកទៅរួច៩៩ភាគរយគឺគេមានលុយនិងជាខ្សែរបស់គេ………….អីចឹងទេគឺថាវាអីចឹងទៅ…រហូតដល់ ឥឡូវប្រជាពលរដ្ឋដកសេចក្តីទុកចិត្តជាងពាក់កណ្តាលប្រទេសទៅហើយរួមទាំងកូនចៅចាស់ជាមន្រ្តី រាជការផង……នេះជាកំហុសអ្នកណាឬអាណា?