ដោយ៖ កាន់ វិច្ឆិកា
ថ្ងៃចន្ទ ទី10 ខែកុម្ភៈ ឆ្នាំ2014
http://vodhotnews.com
សហព័ន្ធសហជីពចំនួន៨ រួមគ្នាអំពាវនាវដល់រាជរដ្ឋាភិបាល ស្ថាប័នជាតិ អន្តរជាតិ និងស្ថានទូតនានា ជួយអន្តរាគមន៍ និងដោះស្រាយបញ្ហាដែលកំពុងកើតមាននៅកម្ពុជា ទាក់ទងនឹងការរំលោភសិទ្ធិមនុស្ស។
យោងតាមញត្តិទាមទារដែលធ្វើនៅថ្ងៃទី១០ ខែកុម្ភៈ ដោយសហព័ន្ធសហជីពចំនួន៨ ដែលតំណាងឲ្យសហព័ន្ធសហជីព និងកម្មករនិយោជិត រួមមាន សហព័ន្ធសហជីពជាតិនៃឧស្សហកម្មវាយនភណ្ឌកាត់ដេរកម្ពុជា (NIFTUC) សម្ព័ន្ធសហជីពចលនាកម្មករ (CUMW) សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (C.CAWDU) សហព័ន្ធសហជីពមិត្តភាពកម្មករ (WFUF) សហព័ន្ធសហជីពយុវជនឯករាជ្យ (IDYTU) សម្ព័ន្ធសហជីពជាតិ (NTUC) សហជីពសេរីកម្មករនៃព្រះរាជាណាចក្រកម្ពុជា (FTUWKC) និងសម្ព័ន្ធសហជីកម្ពុជា (CATU)។
នៅក្នុងញត្តិទាមទារនោះ សហជីពទាំង៨ បានអំពាវដល់រដ្ឋាភិបាល ស្ថាប័នជាតិ អន្តរជាតិ និងស្ថានទូតនានា ជួយអន្តរាគមន៍ និងដោះស្រាយបញ្ហាមួយចំនួនដូចជា ទី១.សុំឲ្យដោះលែងជនជាប់ចោទទាំង២៣នាក់ និងទម្លាក់ចោលរាល់ការចោទប្រកាន់ទាំងអស់ ទី២.សុំឲ្យមានការចរចាឡើងវិញលើប្រាក់ឈ្នួលគោល១៦០ដុល្លារក្នុងមួយខែ ទី៣.ត្រូវដាក់ទោសដល់ជនល្មើសដែលបានប្រើហិង្សានៅមុខរោងចក្រយ៉ាកជីង និងនៅផ្លូវវេងស្រេង ព្រមទាំងផ្តល់សំណងជំងឺចិត្តដល់ជនរងគ្រោះ ដែលបានបាត់បង់ជីវិត ជនរងគ្រោះដែលបានរងរបួស និងជនរងគ្រោះដែលកំពុងជាប់ឃុំឃាំង ទី៤.រដ្ឋាភិបាលត្រូវដកបម្រាមនៃការជួបជុំជាសាធារណៈរបស់ប្រជាពលរដ្ឋចេញវិញ ទី៥.តំណាងក្រុមហ៊ុនទាំងអស់ត្រូវដកបណ្តឹងដែលប្រឆាំងសហជីព និងកម្មករនិយោជិត ទី៦.សុំទទួលយកកម្មករដែលត្រូវបញ្ឈប់ពីការងារឲ្យចូលធ្វើការវិញ ព្រមទាំងផ្តល់ប្រាក់រម្លឹក និងអត្ថប្រយោជន៍ផ្សេងៗ និងទី៧.ត្រូវទូទាត់ប្រាក់ឈ្នួល និងប្រាក់រង្វាន់ទៀងទាត់ជូនដល់កម្មករ ដែលនិយោជកបានកាត់ ក្នុងអំឡុងពេលធ្វើកូដកម្ម។
កន្លងមក មន្ត្រីអង្គការសង្គមស៊ីវិលជាតិ និងអន្តរជាតិ ប្រមាណ៥០នាក់ តំណាងឲ្យស្ថាប័នចំនួន១៩៧ បានដាក់ញត្តិទៅស្ថានទូតចំនួន៧ រួមមានស្ថានទូត សិង្ហបុរី មីយ៉ាន់ម៉ា ប្រ៊ុយណេ ឥណ្ឌូនេស៊ី វៀតណាម ហ្វីលីពីន ចិន និងអង្គការសហប្រជាជាតិ ស្នើឲ្យមានការដោះលែងអ្នកទាំង២៣នាក់ ដែលជាប់ឃុំនៅពន្ធនាគារត្រពាំងផ្លុង ខេត្តកំពង់ចាម។ ប៉ុន្តែរហូតមកដល់ពេលនេះ មិនទាន់មានការអន្តរាគមន៍ណាមួយ ដែលអាចជំរុញឲ្យមានការដោះលែងអ្នកទាំង២៣នាក់ ដែលអាជ្ញាធរបានចាប់ខ្លួន ក្នុងហេតុការណ៍ប៉ះទង្គិច កាលពីថ្ងៃទី០២និងទី០៣ខែមករា នៅពេលដែលកម្មករតវ៉ាទាមទារដំឡើងប្រាក់ខែ១៦០ដុល្លារនៅរាជធានីភ្នំពេញនៅឡើយទេ៕
សរសេរមកកញ្ញា កាន់ វិច្ឆិកា តាមរយៈ vicheika@vodhotnews.com