ដោយ៖ ណាត សុភាព
ថ្ងៃអង្គារ ទី11 ខែកុម្ភៈ ឆ្នាំ2014
http://vodhotnews.com
ប្រធានគជប លោក អឹម សួស្តី (អាវខ្មៅ) ថ្លែងនៅក្នុងសន្និសីទ ថ្ងៃទី១១ខែកុម្ភៈ(រូបថតដោយ ណាត សុភាព)
គណៈកម្មាធិការជាតិរៀបចំការបោះឆ្នោត(គជប) នៅថ្ងៃអង្គារនេះ ជូនដំណឹងដល់សង្គមស៊ីវិលជាតិ អន្តរជាតិ និងគណបក្សនយោបាយទាំងអស់ ត្រូវដាក់ពាក្យសុំចុះឈ្មោះជាអ្នកសង្កេតការណ៍ សម្រាប់ការបោះឆ្នោតជ្រើសរើសក្រុមប្រឹក្សារាជធានី ខេត្ត/ក្រុង/ស្រុក/ខណ្ឌ អាណត្តិទី២ ឆ្នាំ២០១៤ ខាងមុខនេះ។
ការបោះឆ្នោតជ្រើសរើសក្រុមប្រឹក្សារាជធានី ខេត្ត/ក្រុង/ស្រុក/ខណ្ឌ អាណត្តិទី២ នឹងប្រព្រឹត្តទៅនៅថ្ងៃទី១៨ ខែឧសភា ឆ្នាំ២០១៤។
ក្នុងសន្និសីទព័ត៌មាននៅទីស្នាក់ការកណ្តាលគជប ប្រធានគជប លោក អឹម សួស្តី ថ្លែងថា តាមច្បាប់ ស្តីពីការបោះឆ្នោត បទបញ្ជា និងនីតិវិធី សម្រាប់ការបោះឆ្នោតជ្រើសរើសក្រុមប្រឹក្សារាជធានី ខេត្ត/ក្រុង/ស្រុក/ខណ្ឌ អាណត្តិទី២ ឆ្នាំ២០១៤ ចែងថា គជប ត្រូវជូនដំណឹងទៅ សមាគម ឬអង្គការជាតិ អន្តរជាតិ គណបក្សនយោបាយ ចាប់ពីថ្ងៃទី១ ខែកុម្ភៈ ដល់ថ្ងៃទី១៥ឧសភា ឆ្នាំ២០១៤។ លោកបន្តថា បើស្ថាប័នទាំងនោះមានបំណងបញ្ជូនអ្នកតំណាងឲ្យទៅសុំចុះឈ្មោះជាអ្នកសង្កេតការណ៍ ត្រូវមកយកគំរូពាក្យសុំចុះឈ្មោះនៅ គជប រៀងរាល់ម៉ោងធ្វើការ នៅការិយាល័យទទួលចុះបញ្ជីគណបក្សនយោបាយ និងទទួលស្គាល់អ្នកសង្កេតការណ៍បន្ទប់ A24។
លោក អឹម សួស្តី ថ្លែងទៀតថា ការចុះឈ្មោះនោះដែរ បើគណបក្សនយោបាយណាមួយ មិនទៅចុះឈ្មោះ ក៏ គជប នៅតែដំណើរការតាមនីតិវិធីដដែល ពីព្រោះស្ថាប័នមួយនេះ ធ្វើតាមតួនាទីរហូតដល់មានអ្នកជំនួស។
ប្រធាននាយកដ្ឋានបូកសរុបខុទ្ទកាល័យគណកម្មាធិការកណ្តាលគណបក្សប្រជាជនកម្ពុជា អ៊ក គឹមហាន ឲ្យដឹងថា គណបក្សប្រជាជនកម្ពុជា បានត្រៀមរៀបចំឈ្មោះសមាជិករបស់បក្សដែលត្រូវបញ្ជូនមក គជប រួចហើយ ប៉ុន្តែគ្រាន់តែនៅរង់ចាំគណៈកម្មការរបស់បក្សនៅរាជធានី ខេត្ត/ក្រុង/ស្រុក/ខណ្ឌ ជាអ្នកសម្រេច រួចនឹងបញ្ជូនមក គជប ឲ្យទាន់ពេលកំណត់របស់ច្បាប់ផងដែរ។
មន្ត្រីគណបក្សសង្គ្រោះជាតិ លោក ហេង យឿន មានប្រសាសន៍ថា ក្រុមការងាររបស់គណបក្សប្រឆាំង នឹងត្រៀមដាក់ពាក្យបញ្ជូនឈ្មោះសមាជិកក្រុមប្រឹក្សារាជធានី ខេត្ត/ក្រុង/ស្រុក/ខណ្ឌ របស់ខ្លួនមក គជប មុនថ្ងៃកំណត់។ លោកបន្តថា មូលហេតុដែលបញ្ជូនឈ្មោះសមាជិកទៅ គជប ដោយសារការបោះឆ្នោតជាអសកល ម្យ៉ាងទៀត ដើម្បីរក្សាសមាជិកជាប់ឆ្នោតទាំងនោះផងដែរ។
របាយការណ៍របស់ គជប ចុះផ្សាយនៅថ្ងៃទី២២ ខែមករា ឆ្នាំ២០១៤ ឲ្យដឹងថា សម្រាប់អាណត្តិទី២ មានសមាជិកក្រុមប្រឹក្សាសរុបចំនួន៣.៣២៤នាក់ ដែលចំនួននេះ កើនឡើង៧០នាក់ បើប្រៀបធៀប ទៅនឹងចំនួនសមាជិកក្រុមប្រឹក្សានៃអាណត្តិទី១៕
សរសេរមកកាន់ លោក ណាត សុភាព តាមរយៈsopheap@vodhotnews.com