Friday, 28 February 2014
សែន ដាវិត
ភ្នំពេញ ប៉ុស្តិ៍
ព្រះវិហារៈ ក្រុមអ្នកភូមិប្រមាណ ១០០ នាក់ បាននាំគ្នាទៅបោះជំរំដេកចាំបន្ទាប់ពីគ្រឿងចក្រក្រុមហ៊ុនដីសម្បទាន ចិន នៅក្នុងស្រុក ត្បែងមានជ័យ បានឈូសប្រទះឃើញព្រះពុទ្ធបដិមា ថ្មភក់សតវត្សរ៍ ទី៨ កាលពីថ្ងៃពុធ។
លោក អ៊ុង វីរៈ អនុប្រធានមន្ទីរវប្បធម៌ខេត្តបានថ្លែងថា ក្រុមហ៊ុន ចិន Lan Feng បានជីករណ្តៅជម្រៅពីរម៉ែត្រនៅក្នុងបរិវេណនៃប្រាសាទ យក្ស ប្លោក នៅពេលពួកគេប្រទះឃើញវត្ថុបុរាណមុនសម័យអង្គរ ដែលមានទំហំ ៦០ សង់ទីម៉ែត្រ គុណ ៦០ សង់ទីម៉ែត្រ និងមានទម្ងន់ប្រហែល ៥០ គីឡូក្រាមនៅមូលដ្ឋាននោះ។
លោក វីរៈ បានថ្លែងបន្តថា៖ «យើងមកធ្វើការស៊ើបអង្កេតនៅក្នុងតំបន់នេះហើយយើងអាចអះអាងថា វាពិតជាប្រភេទបដិមាថ្មភក់ ដែលធ្វើឡើងក្នុងសតវត្សរ៍ ទី៨ នៅតំបន់ប្រាសាទ យក្សប្លោក»។
«ឥឡូវនេះ យើងទុកវានៅក្រុមហ៊ុននោះមុនពេលផ្ទេរវាទៅមន្ទីរវប្បធម៌»។
លោក ម៉ៅ រី ប្រធានការិយាល័យបេតិកភណ្ឌនៃមន្ទីរវប្បធម៌ខេត្ត បានថ្លែងថា មន្រ្តីវប្បធម៌ បានស្នើសុំក្រុមហ៊ុន Lan Feng ឈប់ជីកឈូសឆាយនៅក្នុងតំបន់នោះជាបណ្តោះអាសន្នសិន រហូតទាល់តែអ្នកជំនាញអាចពិនិត្យតំបន់នេះបន្ថែមទៀតដោយលោកកត់សម្គាល់ថា វាអាចនឹងមានវត្ថុបុរាណដទៃផ្សេងៗកប់នៅទីនោះ។
លោកថ្លែងបន្តថា៖ «អ្នកភូមិបានមកប្រមូលផ្តុំគ្នានៅក្នុងតំបន់នេះ ហើយចង់ជីកក្នុងតំបន់នេះ ប៉ុន្តែយើងមិនអាចអនុញ្ញាតឲ្យពួកគេធ្វើដូច្នោះទេ»។ «យើងមានការភ័យខ្លាចថា ពួកគេអាចនឹងធ្វើឲ្យមានការប៉ះពាល់ដល់វត្ថុបុរាណក្នុងតំបន់នេះ។ វត្ថុបុរាណទាំងនោះ ជាទ្រព្យសម្បត្តិរដ្ឋ។ គ្មាននរណាម្នាក់អាចយកវត្ថុបុរណទាំងនោះ ទៅកន្លែងដទៃឬយកទៅលក់បានទេ»។
លោក រី បន្តថា ក្រុមហ៊ុនត្រូវតែជម្រាបទៅអាជ្ញាធរវប្បធម៌ នៅពេលពួកគេប្រទះឃើញវត្ថុបុរាណបែបនេះ។
អ្នកភូមិបានចោទប្រកាន់ក្រុមហ៊ុន Lan Feng ថា បានឈូសឆាយដីដោយមិនគិតពីព្រំដែននៃដីសម្បទានចំនួន ៩០០០ ហិកតារបស់ខ្លួននិងមិនបានគិតអំពីផលប៉ះពាល់ដល់ជីវភាពរបស់ប្រជាជនមូលដ្ឋាន។
កាលពីម្សិលមិញអ្នកភូមិជនជាតិភាគតិចម្នាក់ឈ្មោះ ផាន សុខេត អាយុ ២៥ឆ្នាំ បានថ្លែងថា អ្នកភូមិប្រមាណ ១០០ នាក់បានមកជួបជុំគ្នាការពារកន្លែងនេះពេញមួយយប់ដើម្បីធានាថា ក្រុមហ៊ុនមិនលួចវត្ថុបុរាណ។ លោកបានថ្លែងបន្តថា៖ «យើងភ័យខ្លាចក្រុមហ៊ុនមិនរាយការណ៍ទៅអាជ្ញាធរនៅពេលប្រទះឃើញវត្ថុបុរាណមួយចំនួន ឬក៏ភ័យខ្លាចពួកគេយកទៅទុកស្ងាត់ៗ»។
លោកថ្លែងថា៖ «នោះហើយជាហេតុផល ដែលយើងមកដេកនៅទីនេះ និងឃ្លាំមើល។ កម្មករម្នាក់របស់ក្រុមហ៊ុននេះ បានប្រាប់យើងអំពីបដិមានោះទើបយើងដឹង»។
លោក ឡោ ចាន់ មន្រ្តីសម្របសម្រួលនៅអង្គការសិទ្ធិមនុស្ស អាដហុក បានថ្លែងថា អ្នកភូមិបានស្នើឲ្យអាជ្ញាធរយកបដិមានោះចេញភ្លាមៗដើម្បីយកទៅទុកនៅមន្ទីរវប្បធម៌ មិនមែនទុកនៅក្រុមហ៊ុនទេ»។
ទោះយ៉ាងណាក្តីលោក ហូវ អានតាក អ្នកបកប្រែឲ្យក្រុមហ៊ុនដីសម្បទាន ចិន Lan Feng បានអះអាងថា ក្រុមហ៊ុនមិនមានបំណងលួចវត្ថុបុរាណណាមួយដូចដែលក្រុមអ្នកភូមិបារម្ភនោះទេ ហើយក្រុមហ៊ុននឹងគោរពទៅតាមសំណូមពររបស់មន្ទីរវប្បធម៌ដែលសុំឲ្យផ្អាកការឈូសឆាយបន្ថែមទៀត រហូតទាល់តែក្រុមអ្នកជំនាញបានមកពិនិត្យកន្លែងនេះ។
ទន្ទឹមនេះផងដែរអភិបាលស្រុក ត្បែងមានជ័យ លោក ប៉ាំង យាត បានថ្លែងថា អាជ្ញាធរបានដាក់នគរបាលនៅតំបន់នោះដើម្បីហាមប្រាមមិនឲ្យនរណាទៅរំខានរហូតទាល់តែក្រុមអ្នកជំនាញចុះទៅស៊ើបអង្កេត៕ PS