ដោយ៖ ណាត សុភាព
ថ្ងៃសៅរ៍ ទី14 មិថុនា 2014
http://vodhotnews.com
ប្រជាសហគមន៍ជនជាតិដើមភាគតិច ស្ថិតនៅភូមិស្រែអំពិល ខេត្តមណ្ឌលគិរី ចោទអាជ្ញាធររខេត្ត និងមូលដ្ឋានឃុបខិតជាមួយក្រុមហ៊ុនវៀតណាមឈ្មោះ សុវណ្ណ រាជសី ទន្ទ្រានយកដីចំការបម្រុងទុករបស់ជនជាតិដើមភាគតិច ដើម្បីដាំកៅស៊ូ នៅតំបន់នោះ។
តំណាងប្រជាសហគមន៍ជនជាតិដើមភាគតិច ស្ថិតនៅភូមិស្រែអំពិល ឃុំស្រែខ្ទុម ស្រុកកែវសីមា ខេត្តមណ្ឌលគិរី លោក អឿន មៀ ឲ្យដឹងនៅថ្ងៃសៅរិ៍នេះថា អាជ្ញាធរខេត្តមណ្ឌលគិរី និងមូលដ្ឋានបើកដៃឲ្យក្រុមហ៊ុនវៀតណាម ចូលមកអភិវឌ្ឍន៍នៅតំបន់នោះ ដោយគ្រោងដាំកៅស៊ូ លើដីចំការបម្រុងទុករបស់ជនជាតិដើមភាគតិច។ លោកថា បច្ចុប្បន្ន អាជ្ញាធរ និងក្រុមហ៊ុន ព្យាយាមប្រើវិធីសាស្ត្រថ្មីបំបែកបំបាក់សាមគ្គីរបស់ជនជាតិដើមភាគតិចទាំងនោះ តាមរយៈទិញទឹកចិត្តពួកគេចំនួន៧៦គ្រួសារ ដោយក្នុងមួយគ្រួសារទទួលបានប្រាក់ចំនួន១លានរៀល ជាថ្នូរនិងការដោះដូរដីចំនួន២៥០ហិកតា។
លោក អឿន មៀ ស្នើឲ្យជនជាតិដើមភាគតិចទាំងអស់ត្រូវចេះសាមគ្គីគ្នា កុំជឿលើល្បិចកលអាជ្ញាធរ និងក្រុមហ៊ុន បើពុំដូច្នេះទេ ដីចំការបម្រុងទុករបស់ពួកគេនឹងបាត់បង់នៅពេលដ៏ខ្លីខាងមុខ “ខ្ញុំសំណូមពរពួកគាត់ កុំឲ្យចាញ់ល្បិចក្រុមហ៊ុន និងអាជ្ញាធរកំពូលដូចជា ចៅហ្វាយស្រុក ចៅហ្វាយខេត្ត កុំឲ្យគាត់ជឿគេតាមរយៈលុយ បើសិនជាអញ្ចឹងមែនមានផលប៉ះពាល់ច្រើន ទីមួយព្រៃអនុផលទំនៀមទំលាប់ជនជាតិដើមភាគតិច ពីរទៀតគាត់ទៅដល់កូនចៅគាត់ធំ ជំនាន់ក្រោយទៅគាត់អត់មានកន្លែងទីពឹង ព្រោះ មនុស្សកាន់តែកើនដីកាន់តែអស់ ដ៏អញ្ចឹងមានផលប៉ះពាល់ខ្លាំង”។
VOD មិនអាចសុំការអត្ថាធិប្បាយពីភាគីក្រុមហ៊ុនវៀតណាម សុវណ្ណ រាជសី អភិបាលស្រុកកែវសីមា អភិបាលរង អភិបាលខេត្តមណ្ឌលគិរីលោក អាង ប៊ុនហ៊ាង បានទេនៅថ្ងៃសៅរិ៍នេះ ដោយលោកអះអាងថា កំពុងជាប់រវល់ប្រជុំ។
ប្រជាសហគមន៍ជនជាតិដើមភាគតិច ស្ថិតក្នុងភូមិស្រែអំពិល ឃុំស្រែខ្ទុម ស្រុកកែវសីមា ខេត្តមណ្ឌលគិរី ឲ្យដឹងថា ជនជាតិភាគតិចរស់នៅតំបន់នោះមានចំនួន៧៦គ្រួសារ ក្នុងនោះមានជាង៣០០នាក់ និងមានផ្ទៃដីចំការបម្រុងទុកសរុប៥០០ហិកតាធ្វើចំការវិលជុំ។ កាលពីឆ្នាំ២០១១ ក្រុមហ៊ុនសុវណ្ណ រាជសីបានឈូសឆាយម្តងរួចមកហើយលើផ្ទៃដី២៥០ហិកតា និងមានការដាក់សមត្ថកិច្ចរារាំងការតវ៉ា ក្រោយមកនៅខែឧសភា ឆ្នាំ២០១៤នេះ ក៏មានការឈូសឆាយ បោះព្រំដីដែលនាំឲ្យមានការតវ៉ា រហូតដល់អ្នកខ្លះព្រមផ្តិតស្នាមមេដៃលក់ ខ្លះមិនព្រម៕
សរសេរមកកាន់លោក ណាត សុភាព តាមរយៈ sopheap@vodhotnews.com