រថយន្តយោធាដែលទៅដឹកពលករមកពីថៃជួបគ្រោះថ្នាក់។ រូប សហការី
Mon, 16 June 2014
គឹម សារុំ
ភ្នំពេញប៉ុស្តិ៍
កំពង់ឆ្នាំងៈ រថយន្តយោធាបើកទៅដឹកពលករមកពីថៃ បានបុកគ្នាជាមួយរថយន្តដឹកសណ្តែកបណ្តាលឲ្យកៀបអ្នកបើកបរម្នាក់ស្លាប់និងរបួសធ្ងន់ព្រូម្នាក់ ហើយនិងអ្នកបើកបររថយន្តយោធាម្នាក់នៅវេលាទៀបភ្លឺ ថ្ងៃសុក្រ សប្តាហ៍មុននៅក្នុង ស្រុកកំពង់ត្រឡាច ខេត្តកំពង់ឆ្នាំង។
លោក មាស សុភិន អធិការរង ស្រុកកំពង់ត្រឡាច ឲ្យដឹងថា ក្នុងគ្រោះថ្នាក់ចរាចរណ៍អ្នកបើករថយន្តស៊ីវិលស្លាប់ឈ្មោះ ថន សីហា អាយុ ២១ឆ្នាំ រស់នៅ សង្កាត់ផ្សារឆ្នាំង ក្រុង-ខេត្តកំពង់ឆ្នាំង និងព្រូឡានម្នាក់ ទៀតរបួសធ្ងន់ត្រូវបញ្ជូនទៅមន្ទីរពេទ្យ ស្រុកកំពង់ត្រឡាច។ ឯអ្នកបើករថយន្តយោធាឈ្មោះ ស៊ុំ រ៉ាត់ អាយុ ៤៥ឆ្នាំ រស់នៅ ភូមិ-សង្កាត់ឃ្មួញ ខណ្ឌសែនសុខ រាជធានីភ្នំពេញ របួសឆែបថ្ងាសផុងលលាដ៍ក្បាល ត្រូវបញ្ជូនមកសង្គ្រោះនៅរាជធានីភ្នំពេញ។
វេជ្ជបណ្ឌិត តែ វណ្ណា នៃមន្ទីរពេទ្យបង្អែក ស្រុកកំពង់ត្រឡាច បានឲ្យដឹងថា ជនរងគ្រោះបើករថយន្តយោធាត្រូវរបួសថ្ងាសធ្ងន់ហើយត្រូវបញ្ជូនបន្តមកមន្ទីរពេទ្យ ព្រះកេតុមាលា ទីក្រុងភ្នំពេញ នៅទៀបភ្លឺថ្ងៃដដែល។
តាមសាក្សីប្រាប់សមត្ថកិច្ចថា រថយន្តយោធាពាក់ស្លាកលេខ ខ.ម 083 បើកតាមផ្លូវជាតិលេខ ៥ ពីត្បូងទៅជើងក្នុងទិសដៅទៅ ក្រុងប៉ោយប៉ែត ខេត្តបន្ទាយមានជ័យ ចំណែករថយន្តកូរ៉េចំណុះ ២ តោនកន្លះ មានផ្ទុកសណ្តែកពេញពាក់ស្លាកលេខ កំពង់ចាម 3A-0727 ដែលបើកបញ្ច្រាសទិសគ្នាបានបុកគ្នាពេញទំហឹង ត្រង់គីឡូម៉ែត្រលេខ ៦៤-៦៥ ក្នុង ភូមិធ្លកយោល ឃុំតាជេស ស្រុកកំពង់ត្រឡាច។
លោកបន្តទៀតថា លោកមិនដឹងថា រថយន្តយោធានៅអង្គភាពណាទេ ព្រោះរវល់គិតតែជនរងគ្រោះគ្រាន់តែដឹងថា រថយន្តនោះធ្វើដំណើរទៅ ប៉ោយប៉ែត ដឹកពលករមកពី ប្រទេសថៃ។ លោកថា រថយន្តទាំង ២ គ្រឿងត្រូវសមត្ថកិច្ចអូសយកមកទុកនៅការិយាល័យចរាចរណ៍ផ្លូវគោក ខេត្តកំពង់ឆ្នាំង ដើម្បីដោះស្រាយតាមច្បាប់៕