ដោយ៖​ តាំង វីដា​
ថ្ងៃចន្ទ ទី16 មិថុនា 2014
http://vodhotnews.com

មើលរូបភាពបន្ថែម

ក្រុមអ្នកធ្វើការតាមផ្ទះ លើកបដាសុំអន្តរាគមន៍ពីក្រសួងការងារ ដើម្បីលើកកម្ពស់សិទ្ធិកម្មករ (រូបថតពី៖ Young Peace​ Messenger)

​បណ្តាញ​កម្មករ​ធ្វើការ​តាម​ផ្ទះ​នៅ​កម្ពុជា ប្រមាណ​៥០​នាក់ នៅ​ព្រឹក​ថ្ងៃ​ចន្ទ​នេះ ប្រមូលផ្តុំ​គ្នា​ដាក់​ញត្តិ ស្នើឲ្យ​រដ្ឋមន្ត្រី​ក្រសួង​ការងារ និង​បណ្តុះបណ្តាល​វិជ្ជាជីវៈ ចាត់​វិធានការ​ច្បាប់ និង​រដ្ឋបាល ដើម្បី​លើកកម្ពស់ និង​ការពារ​សិទ្ធិ​របស់​កម្មករ​ធ្វើការ​តាម​ផ្ទះ​។​

​ប្រធាន​បណ្តាញ​កម្មករ​ធ្វើការ​តាម​ផ្ទះ នៃ​សមាគម​ប្រជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ កញ្ញា វុន សម្ផស្ស ប្រាប់​VOD ឲ្យដឹងថា ការប្រមូលផ្តុំ​គ្នា​ដាក់​លិខិត ដែល​មាន​ការស្នើសុំ​ចំនួន​៩ ចំណុច ចំ​ថ្ងៃ​នេះ​ទិវា​ពលករ​ធ្វើការ​តាម​ផ្ទះ​អន្តរជាតិ ថ្ងៃទី​១៦ ខែ​មិថុនា​នេះ គឺ​ជំរុញ​ឲ្យ​រដ្ឋាភិបាល​កម្ពុជា ផ្តល់​សច្ចាប័ន និង​ដាក់ឲ្យ​អនុវត្ត​អនុស​ញ្ញា​លេខ ១៨៩ របស់​អង្គការ​ពលកម្ម​អន្តរជាតិ ស្តីពី​ការងារ​សមរម្យ សម្រាប់​កម្មករ​ធ្វើការ​តាម​ផ្ទះ ដើម្បី​ធានា​ការពារ និង​លើកកម្ពស់​សិទ្ធិ​សេរីភាពដល់​កម្មករ​ធ្វើការ​តាម​ផ្ទះ​នៅ​កម្ពុជា​។​

​ក្នុង​លិខិត​ស្នើ​អន្តរាគមន៍​ផ្ញើ​ទៅកាន់ លោក អ៊ិត សំហេង រដ្ឋមន្ត្រីក្រសួង​ការងារ និង​បណ្ដុះបណ្ដាល​វិជ្ជាជីវៈ លើក​ឡើងថា ភាគច្រើន​នៃ​កម្មករ​ធ្វើការ​តាម​ផ្ទះ​នៅ​កម្ពុជា គឺជា​ស្ត្រី ដែល​មាន​វ័យក្មេងៗ និង​ខ្លះ​មិន​ទាន់​គ្រប់​អាយុ ដែល​បាន​ធ្វើ​ចំណាកស្រុក​ពី​តំបន់​ជនបទ​ដាច់ស្រយាល ហើយ​ពួកគេត្រូវបាន​ដាក់​នៅ​ក្រៅ​លក្ខខណ្ឌ​ការពារ​ដោយ​ច្បាប់​។ ញត្តិ​នោះបន្តថា ការមិន​ដាក់បញ្ចូល​អ្នកធ្វើការ​តាម​ផ្ទះ​ស្ថិតនៅក្រោម​ច្បាប់​នេះ បាន​បណ្តាលឲ្យ​កម្មករ​ធ្វើការ​តាម​ផ្ទះ​ជាច្រើន​ម៉ឺន​នាក់ បាន​ធ្លាក់​ចូល​ក្នុង​ស្ថានភាព​កេងប្រវ័ញ្ច និង​ការរំលោភបំពាន​នៅ​កម្ពុជា និង​ក្រៅប្រទេស​។​

យ៉ាងណាក៏ដោយ តាម​ការអះអាង​របស់ កញ្ញា វុន សម្ផស្ស នៅ​ម៉ោង​ជិត​១០​ព្រឹក​នេះ លោក គ្រួច សុ​ផា​រី អគ្គលេខា​រង​ទី​ពីរ​នៃ​អង្គភាព​ប្រឆាំង​បាតុកម្ម កូតកម្ម បាន​ចេញ​មក​ទទួល​ញត្តិ ដោយ​សន្យា​រង់ចាំ​ចំណាត់ការ​ពីរ​ក្រសួង​ការងារ និង​បណ្ដុះបណ្ដាល​វិជ្ជាជីវៈ ក្នុង​ការអនុម័ត​អនុសញ្ញា ILO ១៨៩ នេះ​៕

សូមសរសេរមកលោក តាំង វីដា តាមរយៈ vida@vodhotnews.com