ដោយ៖ ពេជ្រ សុធារី
ថ្ងៃចន្ទ ទី16 មិថុនា 2014
http://vodhotnews.com
មជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា នៅថ្ងៃចន្ទនេះ បានផ្តល់នូវគំនិតសំខាន់ៗចំនួន៧ចំណុច សម្រាប់ប្រជាកសិករដើម្បីធ្វើស្រូវបានល្អ ខណៈតំបន់ជាច្រើនពុំមានភ្លៀងធ្លាក់គ្រប់គ្រាន់នាដើមរដូវវស្សានេះ។
នៅក្នុងអត្ថបទផ្សព្វផ្សាយរបស់មជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា ហៅកាត់ថា អង្គការសេដាក ចេញផ្សាយនៅថ្ងៃទី១៦ ខែមិថុនានេះ លើកឡើងថា បើតាមសេចក្តីប្រកាសរបស់ក្រសួងធនធានទឹក នៅរដូវវស្សាឆ្នាំ២០១៤នេះ នៅតំបន់ជាច្រើនពុំមានភ្លៀងធ្លាក់គ្រប់គ្រាន់នៅឡើយនៅដើមរដូវវស្សានេះ តែនឹងមានភ្លៀងធ្លាក់គ្រប់គ្រាន់វិញនៅចុងរដូវ។
អត្ថបទផ្សព្វផ្សាយបន្តថា ដើម្បីជាជំនួយបន្ថែមដល់កសិករឲ្យត្រៀមខ្លួនបានល្អក្នុងការធ្វើស្រូវនៅរដូវវស្សា ជាពិសេសបន្សាំខ្លួនទៅនឹងការមិនមានទឹកគ្រប់គ្រាន់នៅដើមរដូវនោះ ប្រជាកសិករគួរអនុវត្តនូវគំនិតសំខាន់ៗចំនួន៧ចំណុច ក្នុងនោះរួមមាន៖
១. កសិករជាទូទៅគួរកុំអាលសាបស្រូវ (ដោយរង់ចាំសាបនៅពាក់កណ្តាលរដូវ) លើកលែងតែអ្នកដែលមានប្រភពទឹកគ្រប់គ្រាន់សម្រាប់ថែទាំសំណាប។ ក្នុងករណីសាប គួរសាបឱ្យស្តើង និងប្រើជីកំប៉ុស្ត៍ ជាពិសេអង្កាមពុកៗឱ្យបានច្រើន ដើម្បីការពារពីការងាយរងគ្រោះដោយភាពរាំងស្ងួតនិងងាយស្រួលក្នុងការដកសំណាប។
២. កសិករគួរជីកស្រះនៅតាមស្រែ ដែលអាចចាប់ផ្តើមដំបូងពីស្រះតូច (ឧទាហរណ៍ទំហំប្រវែង ៥ម៉ែត្រគុណនឹង ១០ ម៉ែត្រ) ហើយអាចពង្រីកបន្តិចម្តងៗទៅតាមលទ្ធភាពទុន។ ស្រះទឹកនៅក្នុងស្រែ អាចជួយដល់កសិករក្នុងការស្តុកទឹក (នៅពេលរាំងស្ងួត) ជួយរំដោះទឹក និងស្រោចស្រពបន្ថែមពេលខ្វះទឹក។ មិនតែប៉ុណ្ណោះ វាក៏ជាជំរកសម្រាប់ពពួកសត្វមានប្រយោជន៍ដូចជា ត្រី និងកង្កែប ដែលជួយដល់ស្រូវ និងជាអាហាររបស់កសិករផងដែរ។
៣. កសិករគួរចំណាយពេលរៀបចំដី និងជួសជុលភ្លឺស្រែ ដោយគួរលើកភ្លឺស្រែឱ្យបានធំៗ ដើម្បីងាយស្រួលក្នុងការគ្រប់គ្រងទឹកនិងដែលអាចផ្តល់ជាស្មៅសំរាប់គោក្របី។
៤. កសិករគួរសន្សំជីធម្មជាតិឱ្យបានច្រើន តាមរយៈការប្រមែប្រមូលនូវកាកសំណល់ធម្មជាតិដូចជាស្លឹកឈើ ចំបើង លាមកសត្វ។ល។ ក្រៅពីនេះ កសិករគួរព្រោះសណ្តែកនៅក្នុងស្រែសម្រាប់ធ្វើជី។ នៅពេលកសិករដឹកជីដាក់ក្នុងស្រែ យកល្អគួរធ្វើការភ្ជួរលប់ ដើម្បីជៀសវាងការខាតបង់ជីតាមរយៈការហើរចេញ។
៥. ត្រៀមកន្លែងធ្វើថ្នាលសំណាប សម្រាប់សាបនៅពាក់កណ្តាលរដូវ ដោយរៀបចំជាថ្នាលសំណាបគោក រើសតែពូជស្រូវដែលមានគ្រាប់ពេញល្អយកទៅសាប សាបឱ្យស្តើង និងប្រើនូវជីកំប៉ុស្ត៍ឱ្យបានច្រើន។
៦. សម្រាប់ស្រូវរដូវវស្សា (ពូជប្រកាន់រដូវ) ពេលវេលាដែលអាចនៅស្ទូងបានគឺរហូតដល់ចុងខែកញ្ញា។ អ្វីដែលសំខាន់គឺ ចាប់ពីខែសីហាទៅ ការស្ទូងត្រូវលៃចន្លោះគុម្ពឱ្យគាកត្រឹម ២តឹក ឫតិចជាង ២តឹក ប៉ុន្តែមិនត្រូវឱ្យ តិចជាង ១តឹកទេ ដោយអនុវត្តតាមគោលការណ៍ស្ទូងកាន់តែចុងរដូវ ចន្លោះគុម្ពកាន់តែគៀក។ នៅពេលស្ទូង កសិករគួររើសតែសំណាបថ្លោសល្អយកទៅស្ទូង និងស្ទូងតែមួយដើមក្នុងមួយគុម្ព។
៧. ត្រៀមធ្វើជាមេជីទឹក ឫជីកំប៉ុស្ត៍ទឹកឱ្យបានគ្រប់គ្រាន់សម្រាប់យកទៅបាចបន្ថែមលើស្លឹកស្រូវ នៅពេលស្ទូងរូច។
លោកបណ្ឌិត យ៉ង សាំងកុមារ ប្រធានអង្គការសេដាក មានប្រសាសន៍នៅក្នុងអត្ថបទផ្សព្វផ្សាយថា បើទោះបីជាកសិករនៅតំបន់ជាច្រើន ជួបប្រទះនូវការខ្វះខាតទឹកនៅដើមរដូវវស្សានេះក៏ដោយ ប៉ុន្តែកសិករនៅមានពេលគ្រប់គ្រាន់សម្រាប់ធ្វើស្រែ ហើយបើកសិករត្រៀមខ្លួនបានល្អ នោះនឹងនៅតែទទួលបានទិន្នផលខ្ពស់ពីដីស្រែរបស់ខ្លួន។ លោកបន្តថា កសិករគួរកុំសង្វាតធ្វើស្រែលើដីធំពេក ដោយងាកមកផ្តោតលើការធ្វើនៅលើដីស្រីតូច (ស្រែខ្លឹម) ចំណាយតិច ទទួលបាននូវទិន្នផលខ្ពស់និងចំណេញច្រើន។
បើតាមអត្ថបទផ្សព្វផ្សាយរបស់អង្គការសេដា គឺជាទូទៅ រដូវវស្សាតែងចាប់ផ្តើម ចាប់ពីដើមខែឧសភា ដល់ខែតុលា ជារៀងរាល់ឆ្នាំ៕
សូមសរសេរមកកញ្ញា ពេជ្រ សុធារី តាមរយៈ sotheary@vodhotnews.com