ដោយ ជិន ជេដ្ឋា
2014-06-17
RFA
អនុប្រធានការិយាល័យអប់រំស្រុកកំពង់ត្រឡាច ខេត្តកំពង់ឆ្នាំង រងការចោទថា បានប្រព្រឹត្តអំពើពុករលួយក្នុងរឿងជំរិតទារប្រាក់ជាច្រើនម៉ឺនរៀល ពីក្រុមគ្រូបង្រៀនសិស្សពីរវេននៅតាមសាលារៀនក្នុងស្រុកនេះ តាមរយៈនាយកសាលានីមួយៗ។ ប៉ុន្តែខាងអនុប្រធានការិយាល័យបដិសេធចំពោះការចោទប្រកាន់នេះ និងពន្យល់ថា អ្នកដែលចោទប្រកាន់ទាំងនោះ គឺជាអ្នកខិលខូច និងប្រើសេរីភាពរបស់ខ្លួនហួសហេតុ។
ក្រុមគ្រូបង្រៀនពីរវេននៅស្រុកកំពង់ត្រឡាច ឲ្យដឹងនៅថ្ងៃទី១៧ ខែមិថុនា ថា អនុប្រធានការិយាល័យអប់រំស្រុក លោក វេង សុភី បានតម្រូវឲ្យលោកគ្រូអ្នកគ្រូដែលបង្រៀនសិស្សពីរវេននៅតាមសាលាមួយចំនួនក្នុងស្រុកនេះ ត្រូវចំណាយប្រាក់ខែមួយខែក្នុងឆ្នាំសិក្សា២០១៤ ជូនទៅខាងការិយាល័យអប់រំ។ ពួកគាត់អះអាងថា លោក វេង សុភី មានការអន់ចិត្តក្រោយពីក្រុមគ្រូបង្រៀនខ្លះបង់ប្រាក់ត្រឹមតែ ៥ម៉ឺន ទៅ ១០ម៉ឺនរៀលក្នុងម្នាក់ គឺមិនគ្រប់ចំនួនទៅតាមការទាមទារនាពេលកន្លងមក។
គ្រូបង្រៀននៅសាលាបឋមសិក្សាមួយក្នុងឃុំថ្មឥដ្ឋ ស្រុកកំពង់ត្រឡាច ថ្លែងក្នុងលក្ខខណ្ឌសុំមិនបញ្ចេញឈ្មោះ ឲ្យដឹងថា ការចាត់ចែងប្រាក់ ភី.ប៊ី (PB) ប្រចាំឆ្នាំរបស់សាលា និងភាពមិនប្រក្រតី នៃការប្រព្រឹត្តអំពើពុករលួយបានកើតមានច្រើន៖ «ដូចថាយើងបង្រៀនពីរពេល គេសុំតែមួយខែអ៊ីចឹងណា ប៉ុន្តែដល់ពួកខ្ញុំគិតថាច្រើនពេក ពួកខ្ញុំអត់បានឲ្យដល់មួយខែទេ ហើយជាក់ស្ដែងខ្ញុំនេះ គឺខ្ញុំអត់បានឲ្យដែរ ព្រោះខ្ញុំទើបមកថ្មី ប៉ុន្តែដោយឡែកបងៗគាត់ឲ្យម្នាក់ ១០ម៉ឺនអ៊ីចឹងទៅណា។ និយាយរួមទៅ អត់ហ៊ានអាង តែគេធ្វើមេៗធ្លាប់សែនចេះតែសែនរហូតរាល់ឆ្នាំអ៊ីចឹងទៅណា»។
ឆ្លើយតបបញ្ហានេះ អនុប្រធានការិយាល័យអប់រំស្រុកកំពង់ត្រឡាច លោក វេង សុភី បានថ្លែងបដិសេធ និងសួររកមុខអ្នកដែលចោទប្រកាន់រូបលោកទៀតផង។ លោកបញ្ជាក់ថា ការកាត់ប្រាក់ខែ ឬការប្រព្រឹត្តអំពើពុករលួយណាមួយ គឺមិនអាចធ្វើទៅរួចឡើយ ដោយសារតែប្រាក់ខែគ្រូបង្រៀនទាំងអស់ ត្រូវបានគេផ្ទេរតាមរយៈធនាគារ អេស៊ីលីដា (Acleda)៖ «ខ្ញុំអត់មានទេ! វានាំគ្នាបើកនៅ អេស៊ីលីដា វានាំយកទៅផ្ទះអស់ហើយ មកឲ្យខ្ញុំយ៉ាងម៉េច? នៅក្នុងហ្នឹងអត់មានអ៊ីចឹងទេ សួរទៅនេះ ខ្ញុំមានគ្រូខ្ញុំនៅជិតនេះពីរបីនាក់»។
ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន យល់ថា ការសម្រេចចិត្តទម្លាយរឿងរ៉ាវពុករលួយក្នុងប្រព័ន្ធអប់រំបែបនេះ គឺទាល់តែមានការគិតគូរច្បាស់លាស់ ឬទាល់តែរឿងរ៉ាវពិតកើតឡើង ទើបលោកគ្រូអ្នកគ្រូហ៊ាននិយាយចេញ។ ដូច្នេះ ថ្នាក់ដឹកនាំក្រសួងអប់រំ គប្បីធ្វើការស៊ើបអង្កេតលើករណីនេះ ដើម្បីកុំឲ្យប៉ះពាល់ដល់សតិអារម្មណ៍របស់គ្រូបង្រៀនទាំងនោះ៖ «ទាក់ទងទៅនឹងការបង្រៀនពីរពេលហ្នឹង វាជាបញ្ហាមួយ ពីព្រោះយើងឃើញកើតមានរឿងច្រើនជាបន្តបន្ទាប់ ឲ្យក្រសួងហ្នឹងត្រូវតែពិនិត្យមើលជុំវិញបញ្ហាហ្នឹងឲ្យមែនទែន ពីព្រោះការប្រព្រឹត្តបែបហ្នឹងធ្វើឲ្យប៉ះពាល់សតិអារម្មណ៍របស់លោកគ្រូអ្នកគ្រូ ហើយជាវប្បធម៌កេងប្រវ័ញ្ចអំពើពុករលួយលុបបំបាត់ទេ បើសិនជាយើងមិនមានវិធានការឲ្យក្ដៅជុំវិញជនឆ្លៀតឱកាសបែបហ្នឹង»។
ក្រុមគ្រូបង្រៀនពីរវេនបញ្ជាក់ថា ការចេញមុខតវ៉ា ឬទម្លាយរឿងពុករលួយរបស់មន្ត្រីថ្នាក់លើ គឺតែងតែមានការគំរាមកំហែង និងគាបសង្កត់ទៅលើលោកគ្រូអ្នកគ្រូ ដែលហ៊ានទម្លាយរឿងរ៉ាវពិត។ ពួកគាត់ស្នើឲ្យមន្ត្រីមានសមត្ថកិច្ចក្នុងជួរដឹកនាំក្រសួងអប់រំ លុបបំបាត់នូវសកម្មភាពផ្ដល់ប្រាក់សំណូកតិច ឬច្រើន ក្នុងន័យមនោសញ្ចេតនាគ្រប់រូបភាព ដែលជាវប្បធម៌មិនត្រឹមត្រូវ និងខុសច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- លោក រ៉ុង ឈុន រិះគន់រដ្ឋមន្ត្រីក្រសួងអប់រំថាមិនដែលឆ្លើយតបសំណើសុំអន្តរាគមន៍
- មន្ត្រីក្រុមប្រឹក្សាឃុំបក្សប្រឆាំងនៅកំពង់ស្ពឺចោទមេឃុំប្រើប្រាស់អំណោយខុសគោលដៅ
- ការផ្ដល់អាហារូបត្ថម្ភពេលព្រឹកដល់កុមារអាចកាត់បន្ថយអត្រាបោះបង់ការសិក្សាបានច្រើន
- ស្ថាប័នប្រឆាំងអំពើពុករលួយឲ្យសមាជិកក្រុមប្រឹក្សាអាណត្តិទី២ប្រកាសទ្រព្យសម្បត្តិ
- អង្គការតម្លាភាពកម្ពុជាអំពាវនាវឲ្យពលរដ្ឋចូលរួមប្រឆាំងអំពើពុករលួយ
- ក្រសួងមហាផ្ទៃនឹងស្រាវជ្រាវភាពមិនប្រក្រតីនៃការធ្វើអត្តសញ្ញាណប័ណ្ណ
- ធនាគារអភិវឌ្ឍន៍អាស៊ី៖ គម្រោងពង្រឹងការអប់រំសម្រេចបានជាង៩០%
- គ្រូបង្រៀននៅកំពង់ចាមត្អូញត្អែរចំពោះការបើកប្រាក់ម៉ោងយឺតយ៉ាវ
- បណ្ដាញសហគមន៍ទូទាំងប្រទេសតវ៉ាដាក់ញត្តិនៅមុខអង្គភាពប្រឆាំងអំពើពុករលួយ