ដោយ រដ្ឋា វិសាល
2014-06-17
RFA
ពលរដ្ឋនាំគ្នាហែក្បួនលើកបដាពាក្យស្លោកគាំពារទន្លេ និងប្រឆាំងការបំផ្លាញទន្លេ ដោយការសាងសង់ទំនប់វារីអគ្គិសនីសេសានក្រោមពីរ នៅស្រុកសេសាន ខេត្តស្ទឹងត្រែង កាលពីព្រឹកថ្ងៃទី២៨ ខែកុម្ភៈ ឆ្នាំ២០១៤។ RFA/Ratha Visal
ប្រជាពលរដ្ឋអ្នករងផលប៉ះពាល់ដោយសារគម្រោងសាងសង់ទំនប់វារីអគ្គិសនីសេសានក្រោម២ នៅខេត្តស្ទឹងត្រែង ចោទប្រកាន់ថា មានអំពើពុករលួយលូកប្រាក់ឲ្យមន្ត្រីមូលដ្ឋាននិងសហគមន៍ ដើម្បីជំរុញឲ្យប្រជាពលរដ្ឋទទួលយកគោលនយោបាយជម្លៀសប្រជាពលរដ្ឋពីភូមិចាស់ទៅតាំងទៅលំនៅថ្មី។ ចំណែកមន្ត្រីមូលដ្ឋានបដិសេធការចោទប្រកាន់នេះថាមិនពិត។
មន្ត្រីមូលដ្ឋានឃុំក្បាលរមាស និងតំណាងប្រជាពលរដ្ឋសហគមន៍សរុបមានគ្នា ៦នាក់ រងការចោទប្រកាន់ថា បានទទួលប្រាក់សំណូកម្នាក់ៗ ៤០ម៉ឺនរៀល ដើម្បីចលនាឲ្យប្រជាពលរដ្ឋក្នុងភូមិទទួលយកគោលនយោបាយប្ដូរភូមិជាសំណងផលប៉ះពាល់ស្ដីពីគម្រោងសាងសង់ទំនប់វារីអគ្គិសនីសេសានក្រោម២ នៅខេត្តស្ទឹងត្រែង។
ការចោទប្រកាន់នេះធ្វើឡើងបន្ទាប់ពីមន្ត្រីគណៈកម្មការដោះស្រាយផលប៉ះពាល់នៃអាជ្ញាធរខេត្តស្ទឹងត្រែង បានចុះជួបពិភាក្សាលើកទី២ ជាមួយប្រជាពលរដ្ឋជាង ១៤០គ្រួសារនៅភូមិក្បាលរមាស កាលពីថ្ងៃទី១៣ ខែមិថុនា ដើម្បីផ្សព្វផ្សាយពីគោលនយោបាយផ្ដល់សំណងជូនប្រជាពលរដ្ឋ។
ប្រជាពលរដ្ឋរស់នៅភូមិក្បាលរមាស លោក គឹម ឌឿន បញ្ជាក់ថា មន្ត្រីមូលដ្ឋានភូមិឃុំនិងតំណាងសហគមន៍បានទទួលស្រោមសំបុត្រមានទឹកប្រាក់ ៤០ម៉ឺនរៀល ពីអាជ្ញាធរខេត្ត បន្ទាប់ពីអ្នកភូមិធ្វើពហិការដើរចេញពីកិច្ចប្រជុំ និងមិនយល់ព្រមចាកចេញពីភូមិកំណើតទៅតាំងទីលំនៅថ្មីតាមគោលនយោបាយដោះស្រាយសំណងរបស់ក្រុមហ៊ុន។
លោកបន្តថា ប្រាក់ក្នុងស្រោមសំបុត្រផ្តល់ឲ្យមន្ត្រីមូលដ្ឋាន និងតំណាងសហគមន៍ក្នុងគោលបំណងទិញទឹកចិត្តឲ្យមន្ត្រីមូលដ្ឋាន និងតំណាងសហគមន៍ឲ្យខិតខំជំរុញឲ្យប្រជាពលរដ្ឋទទួលយកគោលនយោបាយផ្តល់សំណងរបស់ក្រុមហ៊ុនដោយគ្មានការតវ៉ា៖ «ឃើញមានកញ្ចប់លុយដាក់ក្នុងស្រោមសំបុត្រ ក្នុងមួយកញ្ចប់ហ្នឹង ៤០ម៉ឺន។ មានដុល្លារខ្លះ មានលុយខ្មែរខ្លះហុចឲ្យមេភូមិ បានមេភូមិហ្នឹងទទួលយកមួយស្រោមសំបុត្រ។ ហុចឲ្យអនុភូមិ ក៏សួរថា កញ្ចប់គេស្អីហ្នឹង? កញ្ចប់លុយ លោកអនុភូមិក៏ថាបើលុយគាត់អត់យកទេ»។
មន្ត្រីមូលដ្ឋាននិងតំណាងសហគមន៍ដែលរងការចោទថា បានទទួលប្រាក់សំណូក រួមមានមេឃុំក្បាលរមាស លោក វឿន សម្បត្តិ មេភូមិក្បាលរមាស លោក គ្រុ យូ និងតំណាងសហគមន៍លោក កែវ មិប លោក កែវ សី លោក តាយ ទូន លោក ជ្រុ ញ៉ុង។ ដោយឡែកអនុប្រធានភូមិក្បាលរមាស លោក ស៊ើប ឆុង មិនទទួលប្រាក់នោះឡើយ។
ទាក់ទិនសេចក្ដីចោទប្រកាន់នេះ វិទ្យុអាស៊ីសេរីមិនអាចទាក់ទងមេឃុំក្បាលរមាស សុំអធិប្បាយករណីនេះបានទេ នៅរសៀលថ្ងៃទី១៧ ខែមិថុនា។ យ៉ាងណាតំណាងសហគមន៍ លោក កែវ មិប និងប្រធានភូមិ លោក គ្រុ យូ បដិសេធថា លោកមិនបានទទួលប្រាក់សំណូកអ្វីនោះទេ។
លោកទទួលស្គាល់ថា ប្រាក់ក្នុងស្រោមសំបុត្រគឺសម្រាប់ចែកជូនមន្ត្រីគណៈកម្មការថ្នាក់ស្រុកខេត្តអ្នកចុះដោះស្រាយបញ្ជាជាមួយប្រជាពលរដ្ឋទៅវិញទេ៖ «អារឿងហ្នឹងបានជជែកគ្នាហើយនៅផ្ទះមេភូមិ ហៅគេមកចូលរួមទៅឲ្យដឹងច្បាស់លាស់។ បានតែនិយាយទៅមានបានទទួលលុយកាក់ឯណា សួរមេឃុំទៅស្គាល់ហើយ។ ស្រោមសំបុត្រដែលគេឲ្យ ឲ្យក្រុមការងារគេទេ គេឲ្យក្រុមខាងស្រុកខាងខេត្តគេទេ»។
កាលពីថ្ងៃទី១១ ខែឧសភា កន្លងទៅ ក្រុមការងារដោះស្រាយសំណងផលប៉ះពាល់ប្រជាពលរដ្ឋនៃអាជ្ញាធរខេត្តស្ទឹងត្រែង មិនទទួលបានលទ្ធផលល្អក្នុងការជួបពិភាក្សាជាមួយប្រជាពលរដ្ឋជាង ១០០គ្រួសារ នៅភូមិក្បាលរមាស ស្ដីពីគោលនយោបាយផ្តល់សំណងផលប៉ះពាល់ប្រជាពលរដ្ឋ។
ទាក់ទិនការចោទប្រកាន់នេះដែរ ប្រធានអនុគណៈកម្មការដោះស្រាយផលប៉ះពាល់នៃអាជ្ញាធរខេត្តស្ទឹងត្រែង លោក យូ បាសិទ្ធិ អះអាងដែរថា ប្រាក់ដែលប្រជាពលរដ្ឋចោទថា ជាប្រាក់សំណូកពុករលួយ គឺជារឿងមិនពិត។ លោកថា ក្រុមហ៊ុនបានផ្ដល់ប្រាក់សម្រាប់មន្ត្រីក្រុមការងារចុះបេសកកម្មដោះស្រាយបញ្ហានៅមូលដ្ឋានប្រចាំថ្ងៃតែប៉ុណ្ណោះ៖ «អត់មានទេ អាហ្នឹងមិនមានទិញទឹកចិត្តទេ គឺប្រាក់បេសកកម្មគេទេ គឺ ភើឌាម គេដែលត្រូវប្រើប្រាស់ប្រចាំថ្ងៃទេ»។
របាយការណ៍របស់អាជ្ញាធរភូមិក្បាលរមាស ប្រជាពលរដ្ឋ ៦១គ្រួសារ ជំទាស់មិនព្រមជម្លៀសចេញពីភូមិចាស់ ចំណែកប្រជាពលរដ្ឋ ៨៧គ្រួសារទៀតយល់ព្រមប្ដូរភូមិទៅទីតាំងថ្មីនៅចំណុចបង្គោលគីឡូម៉ែត្រលេខ៥០៣ ផ្លូវជាតិលេខ ៧៨អា។ ដោយឡែកសំណងផលប៉ះពាល់ផ្សេងទៀត ដូចជាតម្លៃផ្ទះសម្បែង ដំណាំហូបផ្លែជាដើម មិនទាន់បានដោះស្រាយឯកភាពគ្នានៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- បញ្ហាចម្រូងចម្រាសក្នុងការផ្ដល់សំណងផលប៉ះពាល់ពីគម្រោងសង់ទំនប់វារីអគ្គិសនី
- បណ្ដាញយុវជនកម្ពុជាស្នើសុំក្រុមហ៊ុនបំភ្លឺគម្រោងសង់ទំនប់វារីអគ្គិសនីស្ទឹងអារ៉ែង
- អ្នករងផលប៉ះពាល់ពីគម្រោងសង់ទំនប់វារីអគ្គិសនីសេសានក្រោម២ធ្វើពិធីបួងសួង
- អ្នកការពារធនធានធម្មជាតិបង្ហាញពីផលប៉ះពាល់នៃទំនប់វារីអគ្គិសនីឆាយអារ៉ែង
- យុវជនខ្មែរមហានគរធ្វើសន្និសីទកាសែតអំពីផលប៉ះពាល់បរិស្ថានទំនប់ឆាយអារ៉ែង
- កម្ពុជាស្នើឲ្យឡាវពន្យារពេលសាងសង់ទំនប់វារីអគ្គិសនីដនសាហុង
- ពលរដ្ឋនៅស្ទឹងត្រែងគ្រោងតវ៉ាទារសំណងប៉ះពាល់ដោយសារសង់ទំនប់វារីអគ្គិសនី
- លោក ហ៊ុន សែន ដឹកនាំគណៈប្រតិភូចូលរួមប្រជុំគណៈកម្មការទន្លេមេគង្គនៅវៀតណាម
- អង្គការទន្លេអន្តរជាតិទាមទារឲ្យឡាវបញ្ឈប់គម្រោងសង់ទំនប់វារីអគ្គិសនី