ដោយ៖ ជន ស្រីណុច
ថ្ងៃពុធ ទី25 មិថុនា 2014
http://vodhotnews.com
ប្រជាពលរដ្ឋ១៨០គ្រួសារ នៅត្រង់ចំណុចវាលវង់ ស្រុកភ្នំក្រវ៉ាញ ខេត្តពោធិ៍សាត់ នៅថ្ងៃពុធនេះ អំពាវនាវសុំអន្តរាគមន៍ពីអាជ្ញាធរ ករណីក្រុមហ៊ុនចិនទប់ទំនប់វារីអគ្គិសនីទី៣និងទី៥ ធ្វើឲ្យទឹកជន់លិចភូមិកររបស់ពួកគេ ខណៈប្រជាពលរដ្ឋមិនទាន់ទទួលសំណងសមរម្យ។
ពលករដ្ឋម្នាក់ដែលអះអាងខ្លួនឯងថា ជាជនរងគ្រោះ លោក ម៉ម សាមិន ប្រាប់ VOD នៅព្រឹកថ្ងៃពុធទី២៥ ខែឧសភានេះថា រដ្ឋាភិបាលបានផ្ដល់សិទ្ធិដល់ក្រុមហ៊ុនចិនធ្វើទំនប់វារីអគ្គិសនីទី៣និងទី៥ ធ្វើឲ្យទឹកលិចភូមិកររបស់ប្រជាពលរដ្ឋ ដែលធ្លាប់រស់នៅតាំងពីសម័យសង្គមរាស្ត្រនិយម ប៉ុន្តែក្រុមហ៊ុនមិនបានផ្ដល់សំណងសមរម្យដល់ប្រជាពលរដ្ឋនៅឡើយទេ។
លោកបន្តថា ខណៈទឹកកំពុងជន់លិចភូមិករនេះ ប្រជាពលរដ្ឋមិនអាចរុះរើផ្ទះសម្បែងចេញភ្លាមៗបានទេ ហើយផ្ទះរបស់ពួកគាត់នឹងលិចបាត់ក្នុងទឹក ក្នុងរយៈពេលដ៏ខ្លីខាងមុខ ចំណែកឯមនុស្សទាំងចាស់ទាំងក្មេងកំពុងកើតជំងឺ។
លោក ម៉ម សាមិន អំពាវនាវទៅគ្រប់ស្ថាប័នពាក់ព័ន្ធទាំងអស់ ពិសេសរដ្ឋាភិបាល ជួយអន្តរាគមន៍ឲ្យមានការផ្តល់សំណងសមរម្យ ដល់ប្រជាពលរដ្ឋនៅស្រុកវាលវែង ខេត្តពោធិ៍សាត់ ដែលកំពុងរងគ្រោះផង។
VOD មិនអាចទាក់ទងលោក ម៉ៅ ភនិន អភិបាលខេត្តពោធិ៍សាត់ ដើម្បីសុំការបំភ្លឺជុំវិញករណីនេះបានទេ ដោយលោកថា កំពុងជាប់រវល់ប្រជុំ។
មន្ត្រីសមាគមការពារសិទ្ធិមនុស្សអាដហុកប្រចាំខេត្តពោធិ៍សាត់ លោក ភួង សុធា ដែលបានតាមដានករណីនេះ មានប្រសាសន៍ថា ប្រជាពលរដ្ឋមិនជំទាស់នឹងការអភិវឌ្ឍរបស់រដ្ឋាភិបាលទេ តែរដ្ឋាភិបាលត្រូវមានទំនួលខុសត្រូវ នៅពេលដែលធ្វើការអភិវឌ្ឍទៅ ប៉ះពាល់ដល់ការរស់នៅរបស់ប្រជាពលរដ្ឋ ជាក់ស្តែងករណីខាងលើ គឺចាត់ទុកថា ជាការរំលោភសិទ្ធិរស់នៅរបស់ប្រជាពលរដ្ឋ។
ប្រជាពលរដ្ឋឲ្យដឹងថា ទឹកដីត្រង់ចំណុចវាលវង់ ភូមិខ្សាំង ឃុំរកាត ស្រុកភ្នំក្រវ៉ាញ ខេត្តពោធិ៍សាត់ នេះពួកគេបានរស់នៅតាំងពីសម័យសង្គមរាស្ត្រនិយម។ ប្រជាពលរដ្ឋឲ្យដឹងទៀតថា ការអភិវឌ្ឍវារីអគ្គិសនីរបស់ក្រុមហ៊ុនចិន ធ្វើឲ្យប៉ះពាល់ដល់ធ្ងន់ធ្ងរដល់ការរស់នៅរបស់ពួកគាត់ ហើយថា ពួកគាត់ធ្លាប់បានដាក់ញត្តិនៅរដ្ឋសភាជាតិម្តងហើយ តែនៅមិនមានដំណោះស្រាយ៕
សូមសរសេរមកកញ្ញា ជន ស្រីណុច តាមរយៈ chornsreynoch@vodhotnews.com